Yeézu Nakáama Abafalisayo Na Abeégesa Be Ebilagilo Bya Musa
23
1 Mbweenu, Yeézu yaabagaambila embága za abaantu na abaheémba boómwe nka nikwo, 2 “Abeégesa be ebilagilo na Abafalisayo beena obuhicha bwo kweégesa abaantu ebilagilo bya Musa. 3 Ha bwéecho, mukoondookele kuluunzi áago nibabeegesa no kugakola góona. Náho mutaákuba nimukulaatila ebikolwa byáabo, habwo kuba boónyini tibakukola éebyo nibabeégesa. 4 Boónyini bakoma ebilagilo byóona nke emigugu elikulemeelaa no kubatwéeka abaantu omu mabeega, náho boónyini tibakwéenda kugolola nóobu olukuumu luumo kubona bahwéele kubiimucha. 5 Góona áago bakola, bakola babone béeyoleeka aha abaantu. Óoku baalikuzwáala omu buso bwáabo no omu engalo záabo ebinogóka biháango bye eémpu biina amagaambo ge ebilagilo,b no kwóongela olukugilo lwe emyéenda yáabo ye esaalac zibe ndeehi kuchila eza abáandi. 6 Omu bilo bya amazenyi, baaba abalikwéenda kwíikala omu bitebe bya abazenyi abeena isima. Nóobu omu masomelo gáabo, baaba abalikwéenda kwíikala omu bitebe byo omuméeso ebi isima. 7 Kaandi, beenda basuulwe na abaantu habwi isima omu magulizo, na nka nikwo babe nibeetwa, ‘mweégesa.’d8 “Náho íimwe, mutaákuba nimukuunda kwéetwa, ‘mweégesa’, habwo kuba mwiina Omweégesa oómo weénka, neemwe bóona na abadugu. 9 Kaandi, mutaákuba nimumwéeta omuuntu weéna wéena, ‘Táata’ omuunsi éezi, habwo kuba mwiina Táata oómo weénka ogwo ali omu igulu. 10 Kaandi, mutaákuba nimukuunda kwéetwa, ‘omweébeembezi,’ habwe ensoonga mwiina Omweébeembezi oómo weénka, náwe niwe Masiya. 11 Ahagáti yaanyu, óogwo ali mukúlu kusaaga abáandi, naayeendelwa kuba omuhálila wáanyu. 12 Omuuntu weéna wéena aleékuza weényini, Múungu alyaámusubya aheéfo. Náho omuuntu weéna wéena ogwo alikweésubya aheéfo, Múungu alyaamwiínula.
13 “Nimwiilóoko yaanyu, íimwe abeégesa be ebilagilo bya Musa neemwe Abafalisayo! Íimwe na abagóbya, habwo kuba nimubachigilila abaantu kuza omubukáma bwo omu igulu habwa ameégeso gáanyu. Íimwe boónyini timukutaahamo óomwo, kaandi timukubakuundila abaantu abáandi áabo nibeénda kutahamo.
[ 14 “Nimwiilóoko yaanyu, íimwe abeégesa be ebilagilo bya Musa neemwe Abafalisayo! Íimwe na abagóbya, habwo kuba nimusaba Múungu aha okusaba kuleehi bwooli mubóne kwéeyoleka aha abaantu, kunu nimwaaka entuúmbakazi ebiintu byáabo. Mbweenu, musoomboókelwe nka nikwo omu echilo cho omuchwaáziiko, mazima nimwiinaánkula amachwáaziko maháango kuluga hali Múungu.]
15 “Nimwiilóoko yaanyu, íimwe abeégesa be ebilagilo bya Musa neemwe Abafalisayo! Íimwe na abagóbya, habwo kuba nimuzoongoloka omulaambo gwoona no kwáambuka enziba, mubóne kumukoobya omuuntu ogwo ti Myaahudi kuba omuheémba we ediini yaanyu. Náho keelaaba yeekiliize omuuntu óogwo, nimumukola kuba omuuntu ogwo chimugasize omulyoongoola lyo omulilo gwa kuzimu entulo ibili kuchila íimwe!
16 “Nimwiilóoko yaanyu, íimwe abatégeki abahume, habwo kuba nimweegesa abaantu nka nikwo, ‘Keelaaba omuuntu naalahila habwe éenzu ya Múungu, echilahiloche ti chiintu. Náho keelaaba naalahila habwe ezaháabu éezo elyo omuunzu ya Múungu, omuuntu óogwo naayeendelwa kukola nko óokwo yaalahíile.’ 17 Íimwe basilu, kaandi abahume! Ni chiiha éecho echili chikúlu kusaaga echíindi, ne éezo ezaháabu éezo elyo omuunzu ya Múungu, nali ne éenzu ya Múungu éezo ekola ezaháabu ebone kuba entakatíifu habwa Múungu? 18 Kaandi nimweegesa abaantu nka nikwo, ‘Kaálaaba omuuntu naalahila habwi itaámbilo lyo omuunzu ya Múungu, echilahiloche ti chiintu. Náho keelaaba naalahila habwe echitáambo éecho chili ahalugulu yi itaámbilo, omuuntu óogwo naayeendelwa kukola nko óokwo yaalahíile.’ 19 Íimwe empume! Ni chiiha echiina obukáani buháango kuchila echíindi, ne echigabo nali itaámbilo elyo elilikwéeza echigabo? 20 Mbweenu, keelaaba omuuntu naalahila habwo itaámbilo, naalahila na habwe ebitáambo éebyo bili ahalugulu yi itaámbilo. 21 Kaandi, keelaaba omuuntu naalahila habwe éenzu ya Múungu, naalahila habwe éenzu na habwa Múungu ogwo naatuúla óomwo. 22 Kaandi, keelaaba omuuntu naalahila habwi igulu, bityo naalahila omu chitebe cho obuzizi cha Múungu na hali Múungu weényini ogwo ayikala ahalugulu yaácho.
23 “Nimwiilóoko yaanyu, íimwe abeégesa be ebilagilo bya Musa neemwe Abafalisayo! Íimwe na abagóbya, habwo kuba nimukwáata ebilagilo byo kusohoza ezáaka nóobu habwe ebiintu byo obukáani buche bwooli, nko otubabi two kuluungisa, ebiinzali no omubwoonza. Náho, nimuleka kukola amagaambo ge ensoonga bwooli omu ebilagilo bya Musa, éebyo no kuba ne ntúungwa nzima, kuzila echiganyizi, no kuba omuuntu omweésigwa ha baantu abáandi. Náho nimweendelwa kugakola góona, amahaánga na máche hamo. 24 Íimwe na abatégeki abahume, habwo kuba nimuhwiitiza emiibo omu kunywa, náho nimumila ntwaangabuleende yóona!
25 “Nimwiilóoko yaanyu, íimwe abeégesa be ebilagilo bya Musa neemwe Abafalisayo. Íimwe na abagóbya, habwo kuba nimwiíkola aha abaantu nka nikwo muli abaantu musemiile omuméeso ga Múungu. Nimweéza hakweétegeeleza ahéelu yo omutaho no olulaangahi, náho timukubyeetaho kwéeza omuli íimwe, óomwo bulimo obulofo bwiinzi, bwo obusaakuzi no kubulwa okwiíbalilila. 26 Íimwe Abafalisayo abahume! Hakubaanza mubileke ebiheno éebyo bili omuli íimwe, nko kwéeza obulofo obuli omu chikóombe. Bityo, ebikolwa byéenyu ebili aheelu nabyo nibiba ebya amazima.
27 “Nimwiilóoko yaanyu, íimwe abeégesa be ebilagilo bya Musa neemwe Abafalisayo! Íimwe na abagóbya, habwo kuba muli nke eémbi éezo zitonile echokaa. Ahéelu nizisemela, náho omugati agezwiile amagúfa ga bafwiile no obulofo bwe engaanda bunaanka bunaanka. 28 Tútyo neemwe, ahéelu nimwooleka habwa abaantu kuba abeena ntuungwa nzima omuméeso ga Múungu, náho amazima ni nka nikwo aha miganya yéenyu mwiizwiile obugobya no obufu kwoónka.
29 “Nimwiilóoko yaanyu, íimwe abeégesa be ebilagilo bya Musa neemwe Abafalisayo! Íimwe na abagóbya, habwo kuba nimwoombeka eémbi za ababáasi ba Múungu no kuzichuma kuluunzi eémbi za abaantu abáandi abaabele beena ntúungwa nzima omuméeso ga Múungu. 30 Niho nimugaámba nka nikwo, ‘Íichwe katwaakubeleho aha obuchilo óobwo baguúku béetu bakaba bali abalame, titwaakuhichize kuteelana nabo kwiita ababáasi ba Múungu.’ 31 Óobu, habwo kugaamba mútyo, nimwaatula nka nikwo neemwe na abaana ba baguúku baanyu áabo abaayisile ababáasi ba Múungu! 32 Mbweenu, mwiizulize obuzilwa óobwo ba baguúku béenyu baataandikile! 33 Nzóka mwe, íimwe oluzáalo lwe empili! Mulyeeliga muta no omuchwaáziiko gwa Múungu gwo kunagwa omulyoongoola lyo omulilo gwa kuzimu?
Múungu Alaachwáaziika Abaantu ba Izilaeli
34 “Habwo kuba bityo, léeba, nibasiindika hali íimwe Abayahudi, ababáasi ba Múungu, abaantu abeena amasala habwa Maandiko Matakatiifu, na abeégesa. Náho omu lyáabo, nimubeeta no kubabaamba aha musalaba. Abáandi nimubakona enkoba omu masomelo gáanyu, na nimubakulaatiila no kubabiinga buli iboma kwi iboma. 35 Ha bwéecho, Múungu alyaabachwáazika íimwe habwe enságama eyaaseesekile ahaansi habwo kwiitwa bóona abeena ntúungwa nzima. Abo bakéetwa bátyo, kulugiilila obuchilo Kaini akamwiita Hábeeli ogwo akaba atena ntaambala yoóna yóona, kuhicha kwíitwa Zakariya, omwaana wa Barakia, óogwo mwaayisiile ahagáti ye éenzu ya Múungu ni itaámbilo.e 36 Mazima nniimbagaambila nka nikwo, Múungu alyaachwáaziika abaantu bo oluzáalo óolu habwe ebiheno éebyo byóona.”
37 Niho Yeézu yaágaamba, “Íiwe Yeruzaléemu! Íiwe Yeruzaléemu! Noyíita ababáasi no kubatéela na amakúlugusi abaantu áabo Múungu abasiindikile hali íiwe. Entulo nyinzi nyeenzile kubakobya kobya íimwe nkóokwo enkóko okwo ekobya kobya otuzwíiyo twaáyo omu manana gaayo, náho timuleenziile! 38 Léeba, Múungu nazileka eéka yaanyu kuba amatoongo.f 39 Íinye nniimbagaambila nka nikwo, tímuliimbona kaandi kuhicha obuchilo óobwo nimugaamba nka nikwo, ‘Ayina ikuzo ogwo alikwiiza ahi izíina lyo Omukáma Múungu!’ ”g