Yuda Kwiikiliza Amunóbe Kwo Kumuguza Yeézu
(Matayo 26:1-5, 14-16; Mariko 14:1-2, 10-11; Yohana 11:45-53)
22
1 Echilo Chikúlu che Emikáate Zitéena Ituumbyo, yeéliliza. (Niyo elikwéetwa Paásika.a) 2 Abakulu ba abagabe ba Múungu, hamo na abeégesa be ebilagilo, bakaba nibaloondela omuhaanda gwo kumwíita Yeézu. Náho, bakatíina habwa abaantu.3 Áaho, Izimu Elikúlub lyaamuzamo Yuda. Óogwo akaba ayetwa Iskaliote, akaba ali oómo wáabo abaheémba ba Yeézu ikumi na bábili. 4 Niho, Yuda yaazeenda ha bakulu ba abagabe ba Múungu, na ha habatwaálilizi ba abalwaanila ngoma be éenzu ya Múungu. Yeehanuuza nabo nka nikwo alaamukooba Yeézu no kumusohoza hali boónyini. 5 Áago, gaábasemelela bwooli, baákuundilana hamo kumuliha empilya. 6 Yuda yaákuunda, ahonyini yaabaanza kuloondela omwáanya gwo kubaha Yeézu obuchilo abaantu béenzi tibaliho.
Oluhelo Lwo Omukáma
(Matayo 26:17-30; Mariko 14:12-26; Yohana 13:21-30; 1 Abakoliinto 11:23-25)
7 Echilo Chikúlu che Emikáate Zitéena Ituumbyo, chaáhika. (Nicho echilo éecho omwaana gwe entaama gwa Paásika guhikiiliilwe kubáagwa.) 8 Niho, Yeézu kubatuma Peétero na Yohana, akabagaambila, “Muzeénde kutuloongeza echookulya cha Paásika, tubone kwíiza kulya hámo.” 9 Baámubúuza, “Nooyeénda tuchiloongeze nkáhi?”
10 Yaábasubiza, “Obuchilo mlataahamo omumuzihwa,c nimubugana no omukwaáta oómo, ayimuchize ensuha ya améenzi. Mumukulaatile muhike omuunzu éezo alataahamo, 11 mumugaambile owe éenzu, ‘Omweégesa naakubuúza, “Echiseenge cha abazenyi chili nkáhi? Niinyeénda kulya echookulya cha Paásika hamo na abaheémba báanze omwo.” ’ 12 Áaho, naabatwaála omuunzu elyo olugulu, naabooleka echiseenge echiháango. Omwo nimusaánga chilóongize. Omwoonyini mutuloongezemo echookulya cha Paásika.”
13 Abaheémba áabo bábili, obuchilo obu baahulíile éebyo, baalugáho áaho, baazeenda, baasaanga byóona byaábeele nka Yeézu okuyaabagaambiile. Baabaanza kuloonza echookulya cha Paásika.
14 Akáanya ko kulya kaáhika. Niho Yeézu kwiikala haluhélo, hamo ne entumwaze. 15 Yaábagaambila aáti, “Ndigiile bwooli kulya echookulya éechi cha Paásika hamo neemwe ncháali ntakaágaléezwe! 16 Habwéecho niimbagaambila nkokwo, tiínkulya kaandi mpaka ensoonga yaáho yóona ehikiílizwe omubukáma bwa Múungu.”
17 Ahonyini, Yeézu yeemucha echikóombe. Káyaabeele yaámazile kusiima, yaágaamba aáti, “Mutwaále éezi, munyweeleláne! 18 Niimbagaambila nkokwo, tiínkunywa kaandi eviinid kuhicha áaho buliíza obukáma bwa Múungu.”
19 Kaandi, Yeézu yeemucha omukaate. Káyaabeele yaámazile kusiima, yaágumenyula, yaábaha, ha kubagaambila, [“Óogu, no omubili gwaanze, ogulaasohozwa habwéenyu. Mukole múti, ha kunyizuka.”
20 Kábaabeele baámazile kulya, bityo nyini, Yeézu yeemucha kaandi echikóombe éecho, yaágaamba, “Echikóombe éechi che eviini ne endaganoe eénsha. Múungu naagahikiíliza, habwo kusululuka kwo obwáamba bwáanze ha bwéenyu.]
21 “Náho muléebe! Engalo zo óogwo alaannóba, zili hamo neenye nitukóza hamo. 22 Omwaana wo Omuuntu, naazeenda kwíitwa, nkokwo akaba alamuliilwe. Noobu bityo, nelóoko hali óogwo alaamunóba!” 23 Aaho, entumwa za Yeézu baabaanza kweébuuza, noóha hali íichwe yaakaákozile áago.
Ameégeso Go Obukúlu
24 Haabáho eémpaka omuuntumwa za Yeézu, nkokwo noóha alikuteékuzwa omuli boónyini aláaba mukúlu kuchila bazeenzíbe. 25 Chaamukola Yeézu kubagaambila, “Abakáma ba amahaánga baba nibabategeka abaantu báabo ahakubazíikiliza. Áabo abategeki, bába nibesiingiza nkokwo na abeétegezwa.
26 “Náho íimwe, mutaákuba mútyo. Omuli íimwe, omuuntu kaálaaba mukúlu kuchila abaandi, aábe nko omuuntu ali muto bwooli kuchila abáandi. Na kaálaaba naategeka, aábe nko omuuntu ali omuhalila. 27 Mbweenu! Noóha ali mukúlu bwooli? No óogwo ali ahaluhélo naálya, nali óogwo ali kuléeta ebyookulya? Niinzila aánti no óogwo ali ahaluhélo naálya! Náho, iinye ndi ahagáti yéenyu, nko omuhalilaf wéenyu.
28 “Íimwe, omwáanya gwóona obu mbele niindeengeswa, mubele muli hamo neenye. 29 Ha bityo, niimbakola abategeki omubukáma bwaanze, nkokwo Táata wáanze yaankozile kuba omukáma. 30 No omubukáma bwaanze, nituba nitulya ebyookulya no kunywa hamo. Na nimwiikala aha bitebe byo obukáma, nimuchwaaziíka no kutégeka Abaizilaeli ne engaanda záabo ikumi ne ébili.”
Yeézu Naamanyisa Nkokwo Simoni Peétero Naamwaánga
(Matayo 26:31-35; Mariko 14:27-31; Yohana 13:36-38)
31 Yeézu yaágaamba, “Íiwe Simoni, íiwe Simoni! Omanye kuzima nkokwo Izimu Elikúlug lyeékililiziibwe kubaleengesa mwéena. Nikuba nko kweelula omuchele.h 32 Náho, naákusabiile hali Múungu, nkokwo otaákulekaho okwiikiliza kwáawe. Na kaandi koólaaba waángwiile omumagulu, ozeénde kubaha amagala bazeenzi baawe.” 33 Náho, Simoni yaámusubiza, “Íiwe, Mukáma wéetu! Iinye ndi buligiligi kuzeenda kubohwa hamo neewe omwiibóhelo, noobu kwíitwa hamo neewe!”
34 Yeézu yaámugaambila, “Íiwe Peétero! Niinkugaambila nkokwo, leélo enkoókolomi tekukoókoloma, otakanyaángile entulu isatu nka nikwo tokuúmanya!”
Agaayandikilwe Habwa Yeézu Nigakolwa Óobu
35 Káyaabaliile, Yeézu yaabuuza abaheémba boómwe, “Obuchilo naabatumile mutéena enfulebe ye empilya, nali omugugu, nali ebilaátu, ngási mukabulilwa choóna chóona?” Baámusubiza, “Mmahi!”i
36 Yeézu yaábagaambila, “Náho óobu, kaálaaba omuuntu ayina enfulebe ye empilya, nali omugugu, abitwáale. Na kaálaaba atéena lubáadi, aguze ebebo yoómwe, abone kulugula lúmo. 37 Habwo kuba chaandikilwe, ‘Akapeetwa hamo na abakola biheno.’j Áago magaambo gakaandikwa habwaánze. Niimbagaambila amazima iínti ni lwaampaka kuhikiilizwa hali iinye, nago gali héehi kukolwa óobu.”
38 Áabo baámugaambila, “Íiwe Omukáma wéetu! Léeba! Áaha heena embáadi ibili.” Nawe yaágaamba, “Mubileke éebyo.”
Yeézu Kusaba Múungu Ahi Baanga Lye Emizeyituni
(Matayo 26:36-46; Mariko 14:32-42)
39 Yeézu yaalugáho áaho, yaazeenda ahi Ibaanga lye Emizeyituni,k nkokwo yaabele amanyiile. Na abaheémba boómwe bakaba nibamukulaatíla. 40 Káyaahikile ahi ibaanga éelyo, yaábagaambila, “Mumusabe Múungu, mutaákwiiza mukaza omubileengeso.”
41 Niho, kubaleka áaho, akeelila akáanya káche, nko obula bwo kunaguza ibáale. Yaateela ebizwi, yaámusaba Múungu aáti, 42 “Íiwe Táata! Koólayeénda, onyihilého olwaágalalo óolu olulikwíiza óobu.l Náho, buli éecho olikweenda íiwe, chikolwe. Náho chitaákuba éecho ndikweenda iinye!” [ 43 Áaho, maléeka kuluga omwiigulu yaámwiisulukiza Yeézu, yaamutamo amagala.
44 Yeézu akaba ayina obusáasi bwo olwaágalalo luháango bwooli, yaaguma kumusaba Múungu ahachihika. Empiita yoómwe, yaasusana na amatoónya go obwáamba, yaaba neetoónya ahaansi omwiitaka.]
45 Na káyaama zile kumusaba Múungu, yaáyemeelela, yaasuba aha baheémba boómwe, yaabasaanga bahuniile ha kuba bakaba beene entíimba. 46 Yaábagaambila, “He! Habwaáchi muhuníile? Mwiimuke! Mumusabe Múungu, mutaákwiiza mukaza omubileengeso.”
Yeézu Naakwaátwa
(Matayo 26:47-56; Mariko 14:43-50; Yohana 18:3-11)
47 Obuchilo Yeézu akaba acháali naagaámba éebyo, baamwiizáho abaantu béenzi. Abaantu áaba, bakeebeembelelwa na Yuda, oómo wáabo wa abaheémba boómwe ikumi na bábili. Niho, Yuda yaamwiililila héehi Yeézu, abone kumunyweégela.
48 Yeézu yaámugaambila, “Íiwe Yuda! Ngási, nomunóba Omwaana wo Omuuntu ha kumunyweégela?” 49 Abaheémba ba Yeézu, obuchilo kábaabweene okwo bilaába, baámubuuza, “Íiwe Omukáma wéetu! Ngási, tubatemaateme ne embáadi?”
50 Ahonyini, oómo wáabo yaámuteela omuhalila wo omukwaátanisi mukúlu no lubáadi, yaamutema okutwi kwo obulyo. 51 Yeézu yaágaamba, “Mubileke éebyo!” Yaakukolaho okutwi kwo omuhalila óogwo, yaámuchiza.
52 Omuli áabo baantu áabo bakéeza kumukwáata Yeézu, bakaba balimo abakulu ba abagabe ba Múungu, na abakulu ba abasilikale be éenzu ya Múungu, hamo na abanyaampala ba Abayahudi. Yeézu yaábabúuza, “Íimwe! Habwaáchi mwéeza ne embáadi ne engoligo, nkokwo mweezila omunyagiilizi? 53 Habwaáchi buli chilo, tukaba nitusíiba hamo omuunzu ya Múungu, na timulaankuúmizeho! Náho óobu, nibwo obuchilo bwéenyu, obuchilo bwo okutégeka kwe ensiimbaazi.”
54 Ahonyini, áabo baantu baámukwáata Yeézu, baamutwáala mpaka omuunzu ha omugabe omukúlu. Peétero yaábakulaatila haláho.
Peétero Naamwaánga Yeézu
(Matayo 26:57-58; Mariko 14:53-54, 66-72; Yohana 18:12-18, 18:25-27)
55 Akáanya áabo baantu baahika ha lubúga lwe éenzu, baaheemba echikoome, beékala. Peétero nawe, yéeza kwiikala omuli áabo hamo nabo. 56 Ne echikoome éecho chaámumulika, no omuhalákazi oómo omuzanakazi yaámuleeba ha kumukómela, yaágaamba, “Mazima omuuntu óogu, akaba ali hamo náze.” 57 Náho Peétero yaáyaanga, “Íiwe mukazi! Tiínkumumanya!”
58 Káyaabaliile káche, omuuntu oóndi yaámubona Peétero, yaámugaambila, “Neewe oli muzeenzi wáabo.” Náho Peétero yaámusubiza, “Íiwe mukáma! Tí iinye!”
59 Káyaabeele yaáhiingwiile esáaha eémo eéti, omuuntu oóndi yaámukomeenteleza, “Omumazima, óogu muuntu akaba ali hamo nawe! Habwo kuba weényini nawe no Omugaliláaya!” 60 Náho Peétero yaámusubiza, “Íiwe mukáma! Áago olikugáamba, tiínkugamanya!”
Acháali naagaámba áago, ahonyini enkoókolomi ekoókoloma, “Koo kolíikooo!” 61 Omukáma yaámweechebuka, yaámuleeba Peétero ahaméeso. Ahonyini, Peétero yeézuka áago magaambo go Omukáma gi yaamugaambíile, “Leélo, enkoókolomi etakakoókolomile, noóba waányongile entulo isatu.”
62 Áaho, Peétero yaasohola ahéelu, yaabaanza kuchula ha kuzoolelwa na amaziga meenzi.
Abachuungi Kumugaya Yeézu
(Matayo 26:67-68; Mariko 14:65)
63 Abakwaáta áabo abakaba nibamweekomya Yeézu, baaba nibamusekeélela. Hámo na áago, bakaba nibamuteéla bwooli. 64 Baámusweekelela ahaméeso, ha kumugaambila buli ntulo, “Gaámba obubáasi! Noóha ayaákuteela?” 65 Baáguma kumuzuma ha magaambo meenzi ge ebizumi.
Yeézu Naalégelelwa Omuméeso Ga Abakulu
(Matayo 26:59-66; Mariko 14:55-64; Yohana 18:19-24)
66 Obuchilo bwo omulucheelelélwa, abanyaampala ba Abayahudi beékobya, hamo na abakulu ba abagabe ba Múungu, na abeégesa be ebilagilo. Yeézu yaaletwa omuméeso gáabo omu Itegekelo ya Baalusiingo Ba Abayahudi.m 67 Niho baámubuuza, “Íiwe! Kólaaba niwe Masiya,n otugaambile.”
Yeézu yaábasubiza, “Mazima naakubagaambiile, timwaákukuunzile. 68 Na kinakubabuulíze, timwaákuunsubiize. 69 Náho kubaandiza óobu, Omwaana wo Omuuntuo naába ayikeele olubazu lwo obulyop bwa Múungu wo obuzizi bwóona.”
70 Bóona, baámubúuza Yeézu kaandi, “Habwéecho, íiwe oli Omwaana wa Múungu?” Yeézu yaábasubiza, “Habwaáchi íimwe nyini mwaágaambíle nkokwo iinye niwe!”
71 Ahonyini, abakulu áabo baágaamba, “Mbweenu! Nitweendela chi obwaátuzi obuundi? Léeba íichwe boónyini twaáhuliile echigaambo éechi kuluga aha munwa gwoómwe weényini!”