Yeézu Naalégelelwa Omuméeso Ga Pilato
(Matayo 27:1-2, 11-14, Mariko 15:1-5, Yohana 18:28-38)
23
1 Kábaabalíile, abakulu áabo bóona ba Abayahudi baáyemeelela, baamutwáala Yeézu hali Pontio Pilato,a óogwo ayaabele ali omwaanaángwa wo omuchaalo cha Yudea. 2 Baabaanza kumulegelela ha busaaye omukugáamba, “Omuuntu óogu, twaamubona naasiisa echaalo chéetu ha kuba nayaangila abaantu nkokwo bataákutoba oluhaambwe hali Kaizaali,b na naagaámba nkokwo weényini niwe Masiya,c omukáma.”3 Niho, Pilato yaámugaambila Yeézu, “Ngási, níiwe omukáma wa Abayahudi?”
Yeézu nawe yaágaamba, “Mbweenu kawachegaambila íiwe nyini!”
4 Áaho, Pilato yaábagaambila abakulu ba abagabe ba Múungu, hamo ne echipípi cha abaantu, “Omuuntu óogu, tihaliho echiheno choóna chóona éecho naabona hali weényini.”
5 Abaantu áabo, baákomeenteleza kugaamba, “Léeba! Ha byeégeso byoómwe, naleéta omusuniko ha baantu! Akabaandiza óokwo Galiláaya, na yaábisaámbeeze mpaka éensi éezi yóona ya Yudea.”
6 Obuchilo óobwo Pilato yaahulile áago, yaábúuza kaálaaba Yeézu no Omugaliláaya. 7 Na káyaamanyile nkokwo weényini no Omugaliláaya wo obutégeki bwa Herode, yaamusiindika hali Herode habwo kuba ebilo éebyo, Herode akaba ali óokwo Yeruzaléemu.
Herode Naamubuúliliza Yeézu
8 Akáanya Herode yaamubwéene Yeézu, akanulilwa bwooli ha kuba akaba yaáhuliile empola zoómwe. Na ha bilo biinzi akaba ategeza kumubona, abone kuleeba emanyiso ezo alaakola Yeézu. 9 Herode yaámubuúliliza Yeézu ha mabuuzo meenzi. Náho Yeézu talamusubiize chigaambo. 10 Abakulu ba abagabe ba Múungu na abeégesa be ebilagilo bakaba baliho, baaba nibamulégelela Yeézu kúbi.
11 Mara Herode na abalwaanila ngoma boómwe baabaanza kumugaya. Nibamusekeelela, baamuzweeka echizwaalo chilikweengelela che echikáma. Káyaabaliile, Herode yaámusubya Yeézu hali Pilato. 12 Na buluga echilo éecho, Herode na Pilato bakaba abanywáani, náho bakaba banobeene ahabubaandizo.
Pilato Naakuúnda Nkokwo Yeézu Ayitwe
(Matayo 27:15-26, Mariko 15:6-15, Yohana 18:38-19:16)
13 Káyaabaliile, Pilato yaábabuganisa abakulu ba abagabe ba Múungu, abategeki ba Abayahudi, hamo na abaantu bo omumuzihwa. 14 Yaábagaambila, “Mwaandetela omuuntu óogu, nimugaámba nkokwo naabasunikad abaantu. Mumanye kuzima nkokwo naámubuúliliize omuméeso géenyu. Na ahakulégelela kwéenyu kwóona, tihaliho echiheno choóna chóona éecho naabona hali weényini. 15 Bityo Herode nawe, takachibweene echiheno hali weényini. Niyo ensoonga yaámusubya hali íichwe. Mumanye kuzima nkokwo omuuntu óogu, tihaliho echigaambo echiyaakola, éecho echihikize ayitwe! 16 Habwéecho niimuteéla óobu, niho ndaamulekulila.”
18 Abaantu áabo bóona, baahamuka hamo omukugáamba, “Omwiíheho omuuntu óogu! Otuchiíngulile Baraba!” 19 Na Baraba óogwo, akaba abohilwe omwiibóhelo habwo kuba akaléeta omusuniko muháango omumuzihwa, no kwiita.
20 Pilato, akaba naayeénda kumulekulila Yeézu, chaaletelela kaandi kugaamba na abaantu áabo. 21 Náho, baaguma kutéela eyoombo, “Mubaámbe ha musalaba! Mubaámbe ha musalaba!”
22 Yaagaamba nabo kaandi entulo ya kásatu, “Íimwe mulamanya! Yaakola ntaambala chi? Habwaáchi tiínkabweene echigaambo choóna chóona hali weényini éecho echihikize ayitwe! Habwéecho nniimuteéla óobu, niho nimulekulila.”
23 Náho, abaantu áabo baaguma kutéela eyoombo bwooli nka nikwo Yeézu abaámbwe ha musalaba. Nikwo, eyoombo záabo zaásíinga.
24 Niho, Pilato yaalamula kumuchwaáziika nkokwo abakolele Abayahudi áabo nka nikwo bakaba nibamusaba. 25 Yaabachiingulila Baraba kwiingana no okusaba kwáabo, nóobwo akaba abohilwe habwo kuleételela omusuniko muháango omumuzihwa, no obwiisi. Yaalamula kubaha Yeézu babone kumukola nkokwo balikweenda kwiingana no kutoonga kwáabo.
Kubáambwa Kwa Yeézu
(Matayo 27:32-44; Mariko 15:21-32; Yohana 19:17-27)
26 Akáanya abalwaanila ngoma bakaba nibamutwaála Yeézu kumwíita, baabugana no omuuntu oómo, izíina lyoómwe Simoni, wo omuzihwa gwa Kurene.e Óogwo Simoni, akaba naaluga omulusaambo. Áaho, baámukwáata, baamutweeka omusalaba gwa Yeézu. Yaazeenda naamukulaatila Yeézu, agwiímukize.
27 Abaantu béenzi bakaba nibamukulaatíla Yeézu. Omuli áabo, abakazi bakaba nibamuchulila ha kuzoolelwa. 28 Yeézu yaábechebuka, yaábagaambila, “Íimwe bahalákazi ba Yeruzaléemu! Mutaanchulila! Náho, mweelilile íimweenyini, muchulile abaana béenyu! 29 Mumanye ha mazima nkokwo omubilo ebilikwiiza, abaantu nibagaámba, ‘Beena omugisa abakazi áabo bali abaguumba. Beena omugisa áabo abataloónkize!’ 30 Mala, Balyaáhamukila amabaanga baáti, ‘mutugwéele!’ Balyaáhamukila emigoongo baáti, ‘Mutusweékelele!’f 31 Habwe ensoonga, kábilaaba éebyo nibikolwa ha muti mubisi, ngási nibibaho bita ha muti gwoómile?”
32 Ha buchilo óobwo, hakaba heena abazilwa bábili. Abalwaanila ngoma bakaba nibamutwaála Yeézu na abazilwa áabo, bazeénde kumwíita hamo nabo. 33 Baahika ahaantu áaho halikwéetwa Oluhaanga lwo Omutwe, baámubaamba Yeézu ha musalaba. Baabaamba abazilwa áabo bábili, buli oómo omusalaba gwoómwe, oómo olubazu lwo omukóno gwo obulyo gwa Yeézu, no oóndi olubazu lwoómwe lwo obumoso.
34 Yeézu yaágaamba, “Íiwe Táata! Obaganyile! Habwo kuba áaga gi balikukola, tibakugasoombookelwa.”g Abalwaanila ngoma áabo baayesa olweeso lwi ibaando ahakubagana ebizwáalo bya Yeézu. 35 Abaantu bakeemeelela áaho nibaleeba. Bakulu ba Abayahudi, baabaanza kumugaya Yeézu omukugáamba, “Léeba akachuúngula abáandi! Mbweenu! Keelaaba weényini niwe Masiyah óogwo ayatooziibwe na Múungu, ayechuungule weényini!” 36 Abalwaanila ngoma nabo, baámugaya. Bakaba nibamwiililila, babone kumuha amaálwa gakoloosile. 37 Bakasubiilila kumugaambila, “Koólaaba íiwe oli omukáma wa Abayahudi, oyechuungule íiwe nyini!”
38 Na halugulu ahamutwégwe, baatáho echibaáho cha amaandiko, gaandikwiilwe gaáti, “Óogu, niwe Omukáma wa Abayahudi.”
39 Oómo wáabo omubazilwa áabo bábili, yaámuzuma Yeézu omukugaamba, “Ngási íiwe niwe Masiya? Mbweenu! Oyezune íiwe nyini! Neechwe, otuchuúngule!”
40 Náho, muzeenzíwe yaámuchaáhukila ha kumukáama ha kugaamba, “Ngási, íiwe tokumutiina Múungu obuchilo néewe nochwaaziíka kufwa nka weényini? 41 Náho íichwe, twaachwaaziíkwa ha mazima, kwiingana ne ebikolwa byéetu. Náho óogu, takozile echiheno choóna chóona.”
42 Mara, yaágaamba, “Íiwe Yeézu! Obuchilo óobwo olaazamo omubukáma bwáawe, neenye olanyizuka!” 43 Yeézu yaámusubiza, “Niinkugáambila mazima, leélo éezi nituba hamo Omubutúulo bwo Kunulilwa.”
Okufwa Kwa Yeézu
(Matayo 27:45-56; Mariko 15:33-41; Yohana 19:28-30)
44 Obuchilo nke esáaha mukáaga zíti nyemisana, haaba ne ensiimbaazi éensi yóona mpaka esáaha mweenda, 45 habwo kuba izóoba likalaala. Ni ipaziya elyaabeele lisiikile ahaantu ahatakatíifu omuunzu ya Múungu,i ahonyini lyaáteemukamo ha binogoka bibili.
46 Niho Yeézu yaáchula ahi iláka liháango, “Íiwe Táata! Omuungalo zaawe naákuheéleza omwooyo gwaanze.” Káyaabeele yaámazile kugaamba aátyo, omwooyo gwoómwe gwaahwaamo.
47 Omwiímeelelezi wa abalwaanila ngoma áabo akabona byóona éebyo ebyáagwa. Niho yaakuza Múungu omukugaamba, “Ha mazima, omuuntu óogu takozile echiheno choóna chóona!”
48 Abaantu bóona, kábaabweene ebyáagwa éebyo, baasuba omúka owáabo, nibeteéle aha kalezi kaabo aha ntíimba. 49 Na bóona áabo abaamumanyile Yeézu, bakaba beémeeliile haláho káche, na bakabona éebyo byóona ebyáagwa. Omuli áabo abaabele beémeeliile, bakaba balimo na abakazi áabo baabele nibamukulaatíla kuluga omu iboma lya Galiláaya.
Kuziikwa Kwa Yeézu
(Matayo 27:57-61; Mariko 15:42-47; Yohana 19:38-42)
50-51 Hakaba haliho omuuntu oómo, izíina lyoómwe Yozéfu, wo omu chaalo cha Alimatea, omuunsi ya Yudea. Yozéfu akaba ali oómo wáabo wa abakulu ba Abayahudi. Náho talakuundileene na bazeenzíbe ha chigaambo éecho cho kumwíita Yeézu, ha kuba akaba ali omuuntu ayetegeeliize no owe entuungwa nzima omuméeso ga Múungu. Na kaandi akaba ategamiliile obukáma bwa Múunguj bwiíze.
52 Niho, Yozéfu yaazeenda kumusaba Pilato nkokwo atwaále omutúumbi gwa Yeézu. 53 Pilato kayekiliize, Yozéfu yaazeenda kuguhanaantula kuluga hamusalaba. Yaaguziingilila kwaanza isaanda. Káyaabaliile, yaaguziika omuúmbik eyaabele esumilwe aha luchili. Omuumbi óomwo, hatakazikilwe omuuntu weéna wéena omugati.
Eémbi éezo ekasumwa ahaluchili nali omunyaanga. (23:53)
55 Abakazi áabo abeezile hamo na Yeézu kuluga Galiláaya, baazeenda hamo na Yozéfu ahaámbi. Baázibona eémbi, na nka nikwo omutúumbi gwa Yeézu okugwaalyaámikizwe omugati. 56 Kábaabalíile, baasuba omúka, baaloonza amazuta ne emizeeze.m Náho baáhuúmula ha chilo cha Sabato, nke echilagilo cha Abayahudi nkokwo chilikulagila.n