Yeézu Natwáalwa Hali Pilato
(Mariko 15:1; Luka 23:1-2; Yohana 18:28-32)
27
1 Obuchilo kabwaachiile, abakúlu ba abagabe bóona hamo na abanyaampala ba Abayahudi baáloma no kulamula akazeendele okwo balaakola babone kumusikiiza Yeézu. 2 Niho baamuboha, baazeenda náze baamuhicha aha mutégeki we Echirúumi óogwo akaba naayetwa Pilato.Yuda Naayehotola
3 Mbweenu Yuda, óogwo enkoobya wa Yeézu, obuchilo akabona nka nikwo Yeézu yachwáazikilwa nka nikwo ayitwe, yeehulila kubi bwooli. Yeemucha efeeza éezo makúmi ásatu no kuzisubya aha abakúlu ba abagabe na abanyaampala ba Abayahudi. 4 Yaábagaambila aáti, “Nnaáhena kumuhikiiliza omu ngalo zaanyu óogu muuntu atéena ntaambala mubone kumusikiiza.” Náho boónyini baágaamba, “Áago ti geetu íichwe kaandi, no lwaágalalo lwáawe iweényini.”
5 Niho Yuda yaziinaga efeeza éezo omuunzu ya Múungu, yaalugáho, yaazeenda kweéhotola.
6 Abakúlu ba abagabe bazikobya efeeza éezo, baágaamba báti, “No muzilo kutulaaniza efeeza éezo ne efeeza ze éenzu ya Múungu, habwo kuba ne zo obuguzi bwe enságama.” 7 Mbweenu, baáteékatéeka no kulamulaa kwiimucha efeeza éezo no kugula ensaambo yi ibuumba habwo kuziika óomwo abazenyi. 8 Habwe ensoonga éezo, ensaambo éezo neyeétwa Ensaambo ye Enságama kuhicha leélo.
9 Bityo echigaambo chahikiile éecho omubáasi Yeremia akagaamba nka nikwo, “Bakeemucha ebinogoka bye efeeza makúmi ásatu, obukaani óobwo bakekililizana Abaiziraeli habwa weényini. 10 Bagula ensaambo yi ibuumba, nkóokwo Omukáma Múungu yaandagile.”a
Yeézu Naalegelelwa Omuméeso Ga Pilato
(Mariko 15:2-15; Luka 23:2-3, 18-25; Yohana 18:29-19:16)
11 Náwe Yeézu yaáyemeelela omuméeso go omutégeki we Echirúumi. Omutégeki óogwo yaámubuuza aáti, “Ngási, iiwe niwe omukáma wa Abayahudi?” Yeézu yaámugalulila aáti, “Ni iiwe óogwo olikugaamba.”
12 Mbweenu, abakúlu ba abagabe na abanyaampala ba Abayahudi baabaanza kumulégelela Yeézu, náho weényini talabagalulile choóna chóona. 13 Niho Pilato yaámubuuza aáti, “Ngási, tokuhulila áago góona áago balikukulégelela?” 14 Náho Yeézu talagalwíile nóobu aha chilegelelo chimo. Pilato yaásobelwa bwooli.
15 Buli mwaaka omu chilo chikúlu cha Paásika, omutégeki we Echirúumi akaba ayina obuteéka bwo kukomoolola embóhe eémo éezo abaantu bakaba nibeenda. 16 Mbweenu, habwo obuchilo óobwo, ekaba eliho embóhe eémo óogwo akaba naayetwa Baraba. Embóhe éezo ekamanyika bwooli habwe ebiheno éebyo akaba naákola. 17 Ha bwéecho, obuchilo abaantu bakobile áaho, Pilato yaábabúuza aáti, “No oóha óogwo nimweénda mukomolole aha mbóhe éezi ibili? Nimweénda mukomolole Baraba, nali Yeézu óogwo abaantu nibamweéta Masiya?” 18 Pilato akababuuza aátyo, habwo kuba akamanya nka nikwo abakulu ba Abayahudi bakéeza na Yeézu baamuheéleza omungalo zoómwe habwi ichubi kwoónka.
19 Mbweenu, obuchilo Pilato akaba ayikéele aha chitebe éecho cho kuchwaáziikila, omukázi woómwe yamusiindikila empola aáti, “Otakwíiza kumukolela chibi choóna chóona omuuntu óogwo owa amazima, habwo kuba naayagalala bwooli itúumbi omu kulóota habwa weényini.”
20 Náho abakúlu ba abagabe na abanyaampala abáandi ba Abayahudi baábakooba kóoba abaantu nka nikwo bamusabe Pilato abakomoololele Baraba no kumuchwaáziika Yeézu abone kwiitwa.
21 Pilato yaábabúuza kaandi abaantu, aáti, “No oóha óogwo nimweénda mukomolole aha mbóhe éezi ibili?” Bamugalulila báti, “Nitweénda otuchiingulile Baraba!” 22 Pilato yaábabúuza aáti, “Mbweenu mukole íinta Yeézu óogwo abaantu nibamweéta Masiya?” Abaantu bóona batéela eyoombo nibagaámba báti, “Mubaámbe aha musalaba!” 23 Pilato yaábabúuza aáti, “Yakola chiheno chi nka nikwo abaámbwe aha musalaba?” Náho boónyini baáyoongela kuhooyooka báti, “Abaámbwe! Abaámbwe aha musalaba!”
24 Obuchilo Pilato yaasoombookiilwe nka nikwo tiyaákuhicha kuhiindula ebiteékuzo bya abaantu áabo na nka nikwo baabanza omusaámbo, yeemucha améenzi no kunaaba engalo zoómwe bóona nibalola omuméeso gáabo. Niho, yaábagaambila nka nikwo, “Íinye tinyina ntaambala yoóna yóona aha lufu lwo omuuntu óogu owe ntúungwa nzima. Amagaambo áaga galaaba agáanyu íimwe nyini!” 25 Abaantu bóona bamugalulila báti, “Ensagamáye ne ekabe hali íichwe na aha baana béetu!”
26 Niho Pilato yaabakomololela Baraba, na abalwaanila ngoma boómwe kabaabeele baámazile kumutéela enkoba Yeézu, yaámubaha babone kumubáamba aha musalaba.
Abalwaanila Ngoma Nibamunegula Yeézu
(Mariko 15:16-20; Yohana 19:2-3)
27 Niho abalwaanila ngoma bo omutégeki we Echirúumi baamutwáala Yeézu, baazeenda náwe omwi ikulato lyo omutégeki. Babakobya óomwo abalwaanila ngoma abáandi bóona, baámuzoongoloka Yeézu. 28 Bamuzuula Yeézu emyéenda yoómwe, bamuzweeka enkaanzu elikutukula. 29 Baayogosa omukáko gwa amahwa, baamuzweeka omu mutwe no kuluta olusekeyaanda aha ngalo yoómwe yo bulyo abone kubonwa nko omukáma. Batéela ebizwi omuméeso goomwe, niho baaba nibamunegula ahi igayo nibagaámba báti, “Kasiinge, omukáma wa Abayahudi!” 30 Niho baamuchweela amachwaánta, baatwaala olusekeyaanda óolwo omu ngalo zoómwe no kumutéeza téeza nalwo omu mutwe. 31 Obuchilo abalwaanila ngoma áabo baamazile kumunegula bátyo, baámuzuula enkaanzu éezo no kumuzweeka emyéenda yoómwe kaandi. Niho, baazeenda kumubáamba aha musalaba.
Yeézu Nabáambwa Aha Musalaba
(Mariko 15:21-32; Luka 23:26-43; Yohana 19:17-27)
32 Obuchilo abalwaanila ngoma hamo na Yeézu bakaba nibaluga omu chikaali cha Yeruzaléemu, baamusaanga aha muháanda omuuntu oómo óogwo akaba naayetwa Simoni ali Omunya Kurene. Abalwaanila ngoma áabo baámuhatika kusutula omusalaba gwa Yeézu. 33 Niho, baáhika aha ahaantu áaho ahalikweetwa Goligoota. Izíina éeli líina ensoonga nka nikwo, oluhaanga lwo omutwe. 34 Niho, baamuha Yeézu evíini éezo bakaba batulaniize ne echiintu chi itúumbyo.b Náho obuchilo yaaziboongize, yaáyaanga kuzinywa. 35 Bamubaámba Yeézu aha musalaba, baábagana ebizwáalo byoómwe aha kubyeéseza olweeso lwi ibaando. [Kuba chibone kuhika echigaambo echagaambilwe no omubaasi, Bakabagana omuli boónyini ebizwaalo byaanze na ahachizwaalo chaanze bakeesa olweeso.]c 36 Beékala áaho bamweemanye. 37 Ahalugulu yo omutwe gwoómwe, baatáho echibaáho echiina entaambala yoómwe. Hakaandikwa hati, “Óogu ni Yeézu, omukáma wa abayahudi.”
38 Ahaantu áaho, bakaba baliho abaantu bábili abaabele bali abanyagiilizi. Niho abalwaanila ngoma baábabáamba aha misalaba heehi ba Yeézu, oómo olubazu lwo obulyo no oóndi olubazu lwo obumoso. 39 Abaantu abaabele nibalaba áaho, bakaba nibamunegula Yeézu, nibazugumisa emitwe yáabo no kugaamba nka nikwo, 40 “Iiwe okagaamba nka nikwo noohicha kuzikaambula éenzu ya Múungu no kuzoómbeka kaandi aha bilo bísatu, óobu nu mbweenu oyezune weénka! Mbweenu, kabilaaba iiwe niwe Omutábani wa Múungu, otuúke aha musalaba!”
41 Bityo nyini, abakúlu ba abagabe na abeégesa be ebilagilo bya Musa hamo na abanyaampala ba Abayahudi baámunegula Yeézu nka nikwo, 42 “Akaba naachuúngula abáandi, náho tiyaákuhicha kweéchuungula weényini! Kabilaaba mazima ali omukáma wa Abaiziraeli, mbweenu atuúke aha musalaba, niho neechwe tulamwiíkiliza. 43 Weényini naamweetégeza Múungu, na naagaamba nka nikwo, ‘Íinye ndi Mutábani wa Múungu.’ Mbweenu, Múungu amuchuúngule óobu keélaaba mazima nikwo alikweendaho.” 44 Abanyagiilizi áabo bakabaambwa aha misalaba hamo na Yeézu, nabo baámuzuma Yeézu nkóokwo abáandi bakaba nibamuzuma.
Yeézu Naakaba
(Mariko 15:33-41; Luka 23:44-49; Yohana 19:28-30)
45 Mbweenu, kubaandiza esáaha mukáaga nyemisana, ensiimbaazi yaataaha omuunsi yóona kuhika esáaha mwéenda. 46 Obuchilo bwe esáaha mwéenda, Yeézu yaáyaambaza ahi iláka liháango aáti, “Eloi! Eloi! Lama sabakithani?” Ensoonga ya amagaambo áago ne eéti, “Múungu wáanze! Múungu wáanze! Habwaáchi waánnagilana?”d
47 Obuchilo abaantu áabo beémeeliile áaho bakahulila amagaambo áago, abáandi baágaamba báti, “Óogu namweéta omubáasi Eliya.”e 48 Ahonyini, oómo waabo yeeluka bwaangu, yeemucha ikoobyo, yaaliizuza amaálwa ge enkoloote, yaalita ikoobyo éelyo aha olusekeyaanda, yeeza yaaheéleleza Yeézu abone kunywa. 49 Náho abaantu abáandi baágaamba báti, “Leka! Tulole kabilaaba omubáasi Eliya kaleeza kumuchiza!” 50 Áaho, Yeézu yaáyaambaza kaandi ahi iláka liháango, mála yaáfwa.
51 Ahonyini, ichiíngilizo éelyo likaba lili omuunzu ahatakatíifu he éenzu ya Múungu lyaábalaalukamo enkási ibili kuluga olugulu kuhika ahaansi. Kaandi hazila ni iteengeto liháango éelyo elyaaleteliile enchili kwaátika. 52 Eémbi zaálaangaala, na abatakatíifu beenzi abáfwiile baázoolwa. 53 Yeézu kayaazoókile, baasohola kuluga óomwo omuúmbi, baataaha omuchikaali chitakatíifu cha Yeruzaléemu, baabonwa na abaantu béenzi.
54 Obuchilo omwiímeelelezi wa abalwaanila ngoma hamo na abaabele nibamweemanya Yeézu kábaabweene iteengeto lye éensi ne ebíindi byóona éebyo ebyaagwa, baátíina bwooli, baágaamba nka nikwo, “Amazima, omuuntu óogu akaba ali Omutábani wa Múungu!”
55 Áaho bakaba baliho na abakázi béenzi abaabele balugile omuli Galiláaya bamukulaatiile Yeézu kunu nibamuheeleza. Beemeelela hala kunu nibaleeba góona áago gakaba nigakolwa. 56 Omu bakazi áabo, bakaba balimo Mariamu Omunya Magidala, Mariamu nyina wa Yakobo na Yozéfu, na muka Zebedayo ali nyina wa abatábani boómwe.
Yozéfu Wa Alimatea Naamuziika Yeézu
(Mariko 15:42-47; Luka 23:50-56; Yohana 19:38-42)
57 Obuchilo habeele olweébazo, yéeza omuheémba oómo wa Yeézu óogwo akaba naayetwa Yozéfu. Yozéfu óogwo akaba ali omuhíte kuluga omuchaalo cha Alimatea. 58 Yozéfu yaazeenda ahali Pilato, yaámusaba omutúumbi gwa Yeézu. Niho, Pilato yaalagila abalwaanila ngoma boómwe nka nikwo bazeénde bamuhe omutúumbi óogwo. 59 Yozéfu yaazeenda, yaátwáala omutúumbi gwa Yeézu, yaaguziinga omu mweenda gulikwéela. 60 Yaaguta omutúumbi óogwo omuúmbi yoómwe ye enyaanga éezo ekaba etakaziikagwamo omutúumbi gwo omuuntu weéna wéena, enyaanga éezo ekaba esumilwe aha luchili. Niho yaahiliingisizáho ibáale liháango lyaasweeka omulyaango gwe eémbi, yaalugáho. 61 Ha buchilo óobwo, Mariamu Omunya Magidala na Mariamu óogwo oóndi, bakaba beékeele áaho bolekiile eémbi.
Abalwaanila Ngoma Nibaliinda Eémbi
62 Echilo cha kábili, éecho cho kuheleelukila Endaálikizo ya Sabato, abakúlu ba abagabe na Abafalisayo baákoba hali Pilato. 63 Baámugaambila Pilato báti, “Íiwe omukáma, nitwiizuka nka nikwo obuchilo omubeehi óogwo akaba achili omulame, akagaamba nka nikwo, ‘Aha chilo cha kásatu, ndaázooka kuluga omu bafwiile.’ 64 Ha bwéecho, nitusaba obalagile abalwaanila ngoma baawe baliinde eémbi kuhicha echilo cha kásatu. Kabilaaba otatiíleho obuliinzi, abaheémba boómwe bakaáhicha kwiiza kwíiba omutúumbi gwoómwe na kugaambila abaantu nka nikwo yaázoolwa kuluga omu bafwiile. Kabilaaba baákola bátyo, ebisuba byáabo ebya amaheleeluka nibiba bíbi bwooli kusaaga ebisuba éebyo ebya mbele.” 65 Pilato yaábagalulila aáti, “Mwiinabo abalwaanila ngoma, mwiilooko aha eémbi mubóne kuziliinda habwa amagala géenyu góona.”
66 Niho baazeenda ahaámbi, baatáho eméenko yo olumanyiso ahi ibáale éelyo, kuba babone okusombookelwa kabilaaba omuuntu yaálihiliingisa. Niho, baabasiga abalwaanila ngoma áaho babone kuliinda eémbi.