Amakúlu Ge Entumwa Za Yeézu
Endagano Yo Omwooyo Mutakatíifu
1
1 Owe engoonzi Teofiilo, omuchitabu chaanze cho kutaándika,a nkakwaándikila habwa amagaambo góona áago Yeézu yaakozile no kweégesa, kuluga habubaandizo 2 kuhika echilo éecho yaatweelwe kuzeenda omwiigulu. Atakatwéelwe, akabalagila entumwa zoómwe ha muhaanda gwo Omwooyo Mutakatíifu habwe emilimo éezo balaakola. Entumwa áabo yaatoólize. 3 Ha mwaanya gwe ebilo makumi aána káyaabeele yaayagaleezwe mpaka kufa, akaba naayeyoleka hali éezo entumwa kaandi na kaandi, naayemanyisa butúnu nkokwo ali mwooyo, no kubeégesa amagaambo go obukáma bwa Múungu.4 Echilo chimo, obuchilo Yeézu akaba naálya hamo ne entumwa áabo, akabalagila, “Mutalugamo omu chikaali cha Yeruzaléemu. Choónka mutegamilíle omwo nyini, kuhika obuchilo óobwo mulaayanaankula Omwooyo óogwo Táata yaabeésagiize íimwe kulabila amagaambo gaanze áago mbele niimbagaambila. 5 Kuba, Yohana akabatiza abaantu aha meenzi, náho ahaleéza ha bilo bíche íimwe nimubatizwa ahali óogu Mwooyo Omutakatíifu.”
Yeézu Naasutúka Kuzeenda Omwiigulu
6 Bityo, omubuchilo entumwa áabo kabaakobile hamo na Yeézu, baámubuuza, “Mukáma wéetu, obuchilo óobu niho olaabasubiza Abaizilaeli obukáma bwáabo?” 7 Nawe yaábagaambila, “Obuchilo nali emihaanguko za amagaambo áago, tí géenyu kumanya, ha kuba ni Táata weénka óogwo ha buzizi bwoómwe yaalamwíile nigabáho iíli. 8 Náho niimwaanaánkula obuhicha obuchilo Omwooyo Mutakatíifu aleeza hali íimwe, nimuba nimuunyatula iinye omuli Yeruzaléemu ne embazu eziindi zóona ze éensi ya Yudea, na Samalia, no kuhika hoona hamuhelo gwi ihaanga lye éensi.”
9 Obuchilo Yeézu yaamazile kubagaambila entumwa zoómwe áago, nibamuleeba bóona, ahonyini akasutulwa kuzeenda omwiigulu. Obwíile bwaámusweekelela, tibalamubweene kaandi. 10 Obuchilo bakaba bacháali nibalaangamila améeso gáabo olugulu, bwaangu ahonyini, héehi nabo, baayemeelelaho abakwaáta bábili áabo bakaba baazweele ebizwáalo bilikwéela! 11 Baágaamba, “Íimwe bakwaáta ba Galiláaya, kamweemeeliile áaha nimuleeba omwiigulu? Óogu Yeézu ayaátwaalwa kuluga hali íimwe kuzeenda omwiigulu, aleeza kaandi aátyo nyini, nkokwo mwaamuleeba naazeénda omwiigulu.”
Mathiya Naatoozwa Kuba Entumwa
12 Mala entumwa baalugáho áaho ahi ibaanga éelyo elilikwéetwa Mizeyituni, baasuba omu chikaali cha Yeruzaléemu. Hakaba hali héehi, oluzeendo lwa nke echilo cha Sabato.b 13 Baataaha omumuzihwa, baázeenda baahanama omuchiseenge echoombeekilwe olugulu ye éenzuc omwo baabele nibeekala. Éezo ntumwa nibo áaba: Peétero, Yohana, Yakobo, Andrea, Filipo, Tomaso, Balitolomayo, Matayo na Yakobo, ali mutábani wa Alifáayo. Kaandi bakaba baliho Simoni, óogwo akaba ali Muzelóote, na Yuda, ali mutábani wa Yakobo. 14 Áaba bóona bakaba bakoba áaho kumusaba Múungu ha ensoonga eémo, hamo na Mariamu nyina wa Yeézu, na abakazi abaandi, na badugu ba Yeézu.
15 Omumwaanya óogwo, hakaba heena mukobo gwa abadugu omuli Kristu. (Obwiinzi bwa abaantu bukaba buli igana límo na makumi ábili báti). Niho Peétero yaáyemeelela hagati yáabo, 16 yaábagaambila, “Beene béetu, amagaambo áago agayaandikilwe omuMaandiko Amatakatíifu ha bwa Yuda, gakaba gali lwaampaka gahikiílizwe. Áago gakagaambwa no Omwooyo Mutakatíifu kulabila hali Daudi ha bwe empola za Yuda, ayaabebeembeliile áabo abamukwaásile Yeézu. 17 Akabalwa kuba entumwa muzeenzi wéetu, akaboneswa ikola éeli hamo neechwe.”
18 (Obuchilo óobwo, Yuda akagula ensaambu ha lyeezo mpilya éezo yaayanaánkwiile kwiingana ne echikolwa choómwe chibi. Óomwo niho yaagwíile buzuúma, eenda yoómwe ekaátika, na amala goómwe gaaseeseka ahéelu. 19 Empola ze echigaambo éecho zaámanyiika ha batúuzi bóona ba Yeruzaléemu. Habwéecho baáziha ensaambu éezo izíina lya Akeldama kuluga omululimi lwáabo, ensoonga yaáho, Ensaambu yo Obwáamba.)
20 Peétero yaázeendelela omukugaamba, “Kuba amagaambo áago gaandikilwe omuchitabu che Enzina nigo áaga,
‘Éenzu yoómwe eébe no obufuuzi,
hataákubaho omuuntu óogwo alaasigala áaho.’d
“Kaandi chaandikilwe,
‘Omulimo gwoómwe gwo kweémeelelela,
ahaábwe omuuntu oóndi.’e
21 “Habwéecho, ni lwaampaka atoózwe omuuntu oóndi óogwo ayaakulatileene neechwe obuchilo bwóona óobwo Omukáma Yeézu akaba ali hamo neechwe, 22 kubaandiza obuchilo óobwo Yeézu yaabátiizwe na Yohana mpaka obuchilo óobu yaátweelwe kuzeenda omwiigulu. Óogwo alaatoózibwa, naayeendelwa aábe hamo neechwe kugaamba obubona bwo okuzooka kwa Yeézu.”
23 Bityo, baatáho amazíina ga abaantu bábili. Oómo akaba ali Yozéfu ayaabele naayetwa Barsaba, kaandi akaba ayina izíina eliindi Yusto. No wa kabili, akaba ayetwa Mathiya. 24 Baámusaba Múungu omukugaamba, “Mukáma, níiwe olikumanya emiganya ya abaantu bóona. Habwéecho, nitukusaba otwoóleke noóha omuli áaba bábili waamutoólize nka nikwo, 25 atwaále omwáanya óogu gwo obuheéleza bwe entumwa éezo Yuda alekile, obuchilo yaáfwiile no kuzeenda ahaantu áaho ahalikumugasa.” 26 Mala baayesa olweeso, lwaámugweela Mathiya, yaatelaniswa na áabo entumwa abaandi ikumi no oómo.