Olwaandiko Lwa Paulo Ha
Abagalatia
Obweébeembezi
Galatia ne echaalo echikaba chili ahagáti ye eensi éezo ebilo éebi neyetwa Buturuki. Paulo na Balinaba bakoolekeelela Empola Nzima habwa Yeézu omu maboma bunaanka áago gakaba gali omu chaalo cha Galatia. Abaantu béenzi bakeekiliza Empola Nzima habwa Yeézu, baaba Abakristu. Náho omwáanya gukahiíngula, abaantu bunaanka baayegesa Abakristu nka nikwo babe nibeekomya ebilagilo no obuteéka bwa Abayahudi, na babe nibasalwa ikóba lyo obuséeza.
Aha lwaandiko óolu, Paulo naayizukiza Abakristu ba Galatia nka nikwo, Múungu naachuúngula abaantu bóona áabo abalikumwiikiliza Kristu, tibo áabo abalikweékomya ebilagilo nali obuteéka bunaanka. Paulo naasoomboola kuzima nka nikwo, titukwiíle kuba abaantu abeena amazima omuméeso ga Múungu habwo kweékomya ebilagilo byoómwe, náho na habwo okwiikiliza kwéetu kwoónka. Paulo naasoomboola nka nikwo obulami bwa Abakristu bwoongelwe no Omwooyo Mutakatíifu, tubone kukoondoókela echilagilo chikúlu cha Múungu cho kweenda abaantu abáandi.