Paulo Naakwaátwa Ne Enzóka Óokwo Malita
28
1 Obuchilo twaabele twaágoba kuzima ahachambo, twaasoombookelwa nkokwo tuli omwiiziinga elilikweetwa Melita. 2 Abatuuzi ba áaho baatunyegeza kuzima bwooli. Baatuheembela echikoome, habwo kuba bukaba buli obuchilo bwe embého, ne enzula ekaba neégwa. 3 Paulo yaaseenya oluba lwe enkwi. Obuchilo akaba naazita omumulilo, enzóka yaásohola óomwo ahabwe chifuúnda, yeéziinga ziinga aha mukono.4 Áabo baantu ba áaho, obuchilo baabweene nka nikwo éezo enzóka yeeleleembya aha mukono gwa Paulo, beégaambila, “Na amazima nka nikwo óogu muuntu no omwiisi, habwo kuba noolu yaachuunguka ne éezi nziba, Múungu takumwiíkiliza nka nikwo aábe no obulame.” 5 Áaho Paulo yaazisuunsumulila éezo enzóka omuchikoome, na talahutéele nóolu kache. 6 Áabo baantu baaba nibaléeba keélaaba Paulo naaziímba, nali naágwa ahaansi, aáfwe. Baamala omwáanya mula baliho nibamuléeba bwooli óokwo alaabaho. No obuchilo baabweene nka nikwo tihaliho choóna chóona éecho yaába, baahindula ebiteékuzo byáabo nibagaamba nka nikwo weényini ni múungu.
Paulo Naamuchiza Iíse Wo Omutegeki Wo Óokwo Malita
7 Aaho hatwaayaambukiile hakaba hali héehi no omusili gwo omutegeki wi iziinga éelyo, izíina lyoómwe ni Publio. Óogwo Publio akatwaángisa habufula owoómwe, twaamala ebilo bisatu óomwo. 8 Omubuchilo óobwo, iíse wa Publio akaba alyaamile ahachitabo, habwo kuba akaba ayina omuswíiza, male akaba naatulukiilila ensagáma. Paulo yaazeenda kumwaángalucha owoómwe, yaámusabila, yaamuteelaho engalo zoomwe, yaámuchiza. 9 Áago gaakola abalwéele abaandi bóona omuli éelyo iziinga baaba nibamwiízaho Paulo, nabo baáchízwa. 10 Áabo baantu ba áaho baatuzilila isima liháango bwooli. Obuchilo twaabeele nitweenda kubuga, baátuzuna buli chiintu éecho twaabele nitweenda.
Paulo Naahika Omumuzihwa Gwa Ruumi
11 Bityo obuchilo twaabeele twaámala ameezi ásatu omuli éelyo iziinga, twaabuga no obwaato obuundi bwi itaanga obwaabele buli aaho buliindiliile obuchilo óobwo obwe embého buhiingule. Óobwo bwaato bukaba nibuluga omumuzihwa gwo óokwo Alekisaandilia, eméenko yo obwo bwaato ni Baamungu Babili Balikususana nka Amaloongo. 12 Twaahika omu chaalo cha Sirakusi. Obuchilo twaamazile óomwo ebilo bisatu, twaalugamo, 13 twaayaambuka kuza omumuzihwa gwa Regio. Kábwaachíile, omuyaga gwaaluga olubazu lwa nyakaziinzakazi, gwaátutwaala, na nyeéncha eémo tuba twaáhika omu chaalo cha Puteoli. 14 Áaho twaabugana na abadugu béetu omuli Kristu, baátusaba nka nikwo twiikale nábo ebilo musaanzu. Na ahamuhaanda óogu twaáhika omu chikaali cha Ruumi. 15 Abadugu béetu abo óokwo Ruumi, kábaahuliile nka nikwo tuli omumuhaanda kuzeenda owaabo, beeza kutunyweégela omwiigulizo lya Apio, no óokwo ahalikwéetwa éenzu Isatu za Abazenyi. Obuchilo Paulo yaababweene omuméeso, yaasiima Múungu, yaáguma omumwooyo.
Paulo Naayolekeelela Abaantu Ba Ruumi Habwa Yeézu
16 Obuchilo twaabeele twaáhika omuchaalo cha Ruumi, Paulo yaakuúndilwa nka nikwo asigale omuunzu yoómwe weénka, baamuha omulwaanila ngoma wo kumweékomya.
17 Obuchilo káyaamazile áaho ebilo bisatu, yaayeta abakulu ba Abayahudi abáaho. Kabaakobile, yaábagaambila, “Íimwe beene béetu, tiindaheniile noolu omuuntu oómo wo lugaanda lwéetu nali entuungwa eémo yi twaaleekiilwe na besiichweénkulu. Nóolu bityo, nkakwáatwa okwo Yeruzaléemu, naatebwa omuungalo za Abaruumi. 18 Áabo Abaruumi kábaabeele baámbuulize kuzima, baayeenda kuúndekulila, habwo kuba tibalabweene echiheno éecho nkakola kutwaáliilila nyitwe. 19 Náho Abayahudi kabayaángile nka nikwo ntaákuchiingulilwa, chaankola nsabe nka nikwo ekéesi yaanze echwaaziíkwe kunu ahali Kaizaali. Éezo teyina ensoonga kugaamba nka nikwo nkéenda kubalégelela abaantu béetu. 20 Kwiingana na áago, nicho chileeteliile naabéeta, tubone kuhooya hamo. Kuba echigaambo éecho ndikubohelwa ne eminyololyo éezi, nicho éecho nyini éecho balikutegeza bazeenzi béetu Abaizilaeli.”
21 Áaho áabo abakulu ba Abayahudi baámusubiza Paulo nibagaámba, “Íichwe, titwíina olwaandiko oolwo twaábweene kuluga Yudea habwiiwe. Kaandi taliho omudugu Omuyahudi omuliichwe óogwo alugile óokwo, ayaátusoombooliile ebilegelelo nali kugaamba echigaambo chibi habwiiwe. 22 Íichwe nituliindilila kwoónka kuhulila áago olikuteékuza íiwe, habwo kuba edíini éezi yoólikukulaatila, nitumanya nka nikwo neelegelelwa kubi buli hoona.”
23 Habwéecho baakuundilana na Paulo echilo éecho balaakoba óokwo omuunzu éezo akaba atúula. Echilo éecho kachaahikile, áabo Abayahudi baakoba béenzi. Paulo yaamala echilo chóona naabamanyisa habwe Empola zo obukáma bwa Múungu, yabakoonza koonza no kubasoomboolela obwaátuzi bwa amagaambo agalikugaambwa habwa Yeézu omu maandiko agayaandikilwe na Musa, no omubitabu bya ababáasi.
24 Áago magaambo gi yaagaambile Paulo, abaandi omuli áabo Abayahudi baakoonzibwa nago, náho abaandi baágaanga. 25 Niho Paulo yaagaamba echigaambo choómwe cho okuheleeluka. Aaho Abayahudi baabaanza kulugaho, bateena kukuúndilana omuli boónyini boónka. Paulo akaba agaambile aáti, “Omwooyo Mutakatíifu akabagaambila amazima beesiimwe enkúlu aha muhaanda gwo omubáasi Isaya omukugaamba aáti,
26 ‘Ozeénde hali áaba baantu, obagaambile óoti,
“Kuhulila, mulaaba nimuhulila, náho timukusoombookelwa nakáti.
Kuleeba, mulaaba nimuleeba, náho timulihwéeza nakáti.
27 Kuba emiganya ya áaba baantu tekuhicha kusoombookelwa,
na amatwi gáabo nigalemeela kuhulila,
na améeso gáabo tigakuhicha kubona.
Byaakubeele bitali bityo, baakaáhweélize kwa améeso gáabo,
bakaáhuliile kwa amatwi gáabo,
bakaásoombookiilwe hamiganya yáabo,
kuhicha baansubile, mbone kubachiza.”a’ ”
28 Paulo yaázeendelela kugaamba, “Habwéecho, mumanye óobu nka nikwo óobu obuchuúnguzi obulugile ahali Múungu butwéelwe ha Abanyamahaánga. Nabo nibahulila no kwiikiliza!” [ 29 Obuchilo Paulo káyaamazile kugaamba amagaambo áago, áabo Abayahudi baázeenda nibahakana bwooli.]