Paulo Yaatwaalwa Omumuzihwa Gwa Ruumi
27
1 Káhaabaliile yaalamulwa nka nikwo tubuge no obwaato bwi itaanga kuza omuunsi ya Italia. Bityo Paulo ne embóhe abaandi baahikiilizwa aha mwiímeelelezi oómo wa abalwaanila ngoma, izíina lyoómwe ni Juliasi, we embága ya abalwaanila ngoma eyaabele neeyétwa Embága yo Omukáma Agusto. 2 Bityo twaahanama omu obwaato bumo bwi itaanga bwo omuzihwa gwa Adramitio obwaabeele nibuzeénda no kugoba omubyáambo bunanka byo omuchaalo cha Asia. Kátwaalugileho, tukaba tuli hamo na Aristariko, owo muzihwa gwa Teesalonike omuunsi ya Makedonia.3 Kábwaachíile, twaagoba aha chaambo cho omu chaalo cha Sidóoni. Áaho óogwo Juliasi yaamunyegeza Paulo kuzima aha kumukuúndila azeende kubonana na abanywáani boómwe, babone kumuzuna ebikozeso byo kumugasa weényini. 4 Kuluga óokwo twaazeendelela no oluzeendo lweetu, twaateelwa omuyaga. Bityo twaalabila olubazu lwi iifo lwi iziinga lya Kipro tubone kweéliga no omuyaga kuba óokwo tigulabeeleyo mwiinzi. 5 Tukaambuka éezo enziba kuzeenda aha kulabila ahaangeégeelo yo omuchaalo cha Kilikia, ne ya Paamfilia, twaahika omu chaalo cha Mira omuunsi ya Likia. 6 Áaho, óogwo mwiímeelelezi wa abalwaanila ngoma yaabusaanga áaho obwaato bwi itaanga kuluga omuzihwa gulikweetwa Alekisaandilia obwaabele nibuzeénda omuunsi ya Italia. Niho yaatuhanamika omuli óobwo obwaato.
7 Twaamala ebilo biinzi omuli óobwo bwaato tulyóomu kubuga mpóla mpola aha lwaágalalo, tuba tweélilila omumuzihwa gwa Nido. Áaho omuyaga muháango gwaátulema kuhiíngula olubazu óolwo tukaba tutegiize tulabile, yaaleetelela tuzeende enyuma yi iziinga lya Kirete, kulabila olusoonga olulikweetwa Salimone. 8 Twaazeenda nituchecheéla heehi ne engeégéelo aha lwaágalalo, twaálemwa twaahika ahalikwéetwa Omwiigobelo Lyo Obuhóolo, héehi no omu chaalo cha Lasea.
9 Omwáanya mula gukaba gwaáhiingwíileho, nóolu echilo chikúlu che Echisiibo chaaba chaáhiingwíile. Chaabaho nka nikwo kabilaaba nituzeendelela no óolwo luzeendo, twakaáhicha kuba omu ntaambala.a Habwéecho Paulo yaábahanuuza áabo bazeenzíbe ahakugaamba, 10 “Íimwe baséeza, naabona nka nikwo óolu luzeendo lwéetu nilutuleetela entaambala. Óobu bwaato bwi itaanga hamo ne éezi emigugu yaáyo, byóona nibisiingaalikila omuunziba. Nóolu omuli íichwe, heena áabo abalaasingaalicha obulami bwáabo.”
11 Náho óogwo omwiímeelelezi wa abalwaanila ngoma taleekiliize obuhanuuzi bwa Paulo yaabona nka nikwo tibukugasa, yaakoonzwa koonzwa amagaambo go omugobi wo óobwo bwaato, na aga kaanyina obwaato. 12 Hamo na áago, aaho lili éelyo igobelo hakaba hatali hazima omubuchilo bwe embého. Habwéecho abaantu beenzi omuli óobwo bwaato bwi itaanga baalamula obuhanuuzi nka nikwo balugého áaho, baleebe kabaakuhicha kuhika omwiigobelo elíindi omuli éelyo nyini iziinga lya Kirete ahalikwéetwa Foonikisi. Aaho niho bakeenda basigale omubuchilo óobwo obwe embého. Éelyo igobelo lya Kirete nilyoolekela obutuluka bwa nyakaziinzakazi hamo no omubutuluka bwa chiziba cha ntumwa.
Paulo Na Bazeenzíbe Nibaagalala Bwooli Habwe Echiihúle Omuunziba
13 Mbweenu, omuyaga gwe echineembe gwaabaanza kuheemba kuluga olubazu lwa nyakaziinzakazi. Gwaabakola abo obwaato óobwo bateekúze nka nikwo baabona omwáanya gwo kuzeendelela no óolwo luzeendo lwáabo, óokwo baabele beénzileho. Habwéecho baasiimbuláyo enaanga. Baábuga nibachecheéla héehi ne engeégeelo ye éelyo iziinga lya Kirete. 14 Náho tigulahiingwiileho omwáanya mula, kuluga omuli éelyo iziinga gwéeza omuyaga muháango bwooli gwe echiihule gwaáteela, ogulikwéetwa, Obutuluka bwa Chiziba cha Ntumwa. 15 Óogwo muyaga gukaba niguteéla omuumbazu zo óobwo obwaato bwi itaanga. Noolu twaasiingaangeene nágwo, náho gukatulema. Twaábéha kuza omuunziba.
16 Twaaba twaálaba enyuma ya akazíinga kache akalikwéetwa Kauda, kaatuchiingilizaho kache. Aha lwaágalalo tukahicha kubukoma engóye obwáato bwéetu obucheb 17 twaabona tubuhanamike omu bwaato bwi itaanga. Obuchilo twaabele twaábutiilemo óomwo, áabo ababugi baábuziíngilila ne engóye óobwo bwaato obuháango obwi itaanga, butaákuhicha kwaátika. Baátiina nka nikwo bwaakaáhatila ahamukuúngulu gwi ikóondo lya Sirti.c Habwéecho baatúula itaangad lyo óobwo bwaato, baabuleka obwaato busiindikwe no omuyaga.
18 Echiihule chiháango chaazeendelela kuheemba no kubutéela muno óobwo bwaato. Nikwo nyeenche eémo, áabo babugi baalamula kunaguza emigugu omuunziba. 19 Echilo cha kásatu, beeyaho ebikozeso byo obwaato, baabizugunya omuunziba aha ngalo záabo nyini. 20 Byaahiingula ebilo biinzi izóoba ne enyeyéezi tizikubonwa, ne éezo enziba yaaba neezeendelela kubíiha. Yaaleetelela tubulwe itegezo nka nikwo titukuchila.
21 Áabo ababugi, kábaabeele baámazile ebilo biinzi omuli éezo nziba batakulya chiintu, Paulo yaáyemeelela omugati yáabo, yaábagaambila, “Íimwe babugi, obuchilo óobwo nkabahanuuza óokwo Kirete nka nikwo tutaákulugaho áaho, mukaba nimuhikiililwa kuumpuliiliza. Kamwakubéele muúmpuliilize, ebiintu byaanyu tibyaákusiisiikéele no kusiingaalika biti. 22 Nóolu bityo, niimbasaba óobu nka nikwo mutiímbye emiganya. Ensoonga tihaliho nóolu oómo omuli íimwe alaáfwa, náho obwaato nibwo bulasikiila.
23 “Iinye ndyo omuuntu wa Múungu, na male ndyo omuhalila woómwe. Omuchilo cha leélo maléeka woómwe oómo ayimeeliile omuumpelo yaanze, 24 yaángaambila, ‘Íiwe Paulo, otaákutiina! Ni lwaampaka oyimeelele omuméeso ga Kaizaali. Male omanye nka nikwo bóona áabo abalikubuga hamo neewe, Múungu akuheéle aha mbabazi zoómwe.’ 25 Habwéecho íimwe abaséeza, mutiimbye emiganya, kuba niinyesiga Múungu nka nikwo amagaambo áaga nigaba nkóokwo angaambiile. 26 Nóolu bityo, nituhatikwa kubéha omwiiziinga bunaanka.”
Paulo Na Bazeenzíbe Nibachuunguka Omuunziba
27 Omubilo ikumi na bina tukaba nitusiindikwa no óogwo omuyaga muháango kunu no óokwo omuli éezo nziba ya Adilia. Obuchilo kihaabeele omwiituumbi, áabo ababugi beehulila nka nikwo hámo beeliliza ahachaambo bunaanka. 28 Nikwo baatuula endeengo omuunziba, baabona nka nikwo kuhika ahaansi heena ebita makumi ábili. Kábeeliile mbele kache, kaandi baatuula éezo endeengo omuunziba, baabona nka nikwo kuhika ahaansi heena ebita ikumi na bitaano. 29 Baátiina nka nikwo obwaato bukaágoongile aha byáazi, habwéecho baatubiza omumeenzi enaanga iína za ahanyuma yo obwaato obuháango. Baaba nibasaba nka nikwo hache bwaangu.
30 Áaho áabo ababugi baaleengesa kuchweéngela kuluga omubwáato. Baatuucha akaato omumeenzi, beekola nkokwo nibeénda kunaguza enaanga olubazu lwo omuméeso go obwaato obuháango. 31 Ahonyini Paulo yaágaambila óogwo omwiímeelelezi wa abalwaanila ngoma, hamo na abalwaanila ngoma boómwe naagaámba, “Áaba ababugi, kabaláaba batasigeéle hamo neemwe omuli obu bwaato obuháango, timukuhicha kuchila.” 32 Habwéecho áabo abalwaanila ngoma baanogola engóye ezaabeele zikomile óobwo bwáato obuche, baabulekula enziba ebutwáale.
33 Obuchilo kihaabeele heélilila omulutulutulu, Paulo yaábaneémbelela áabo bazeenzíbe bóona balye ebyookulya kunu naagaámba, “Leélo mwamala ebilo ikumi na bina mulyo omu kutahwa tahwa, na tihaliho echiintu éecho muliíle. 34 Habwéecho niimbasaba mulye, mubóne kuhicha kuzeendelela kuba no obulame. Taliho weéna wéena omuli íimwe alaabuza noolu olusoke lumo omumutwe gwoómwe.”
35 Obuchilo Paulo káyaamazile kugaamba aátyo, yaatwaala omukáate, yaámusiima Múungu omuméeso ga áabo bóona, yaágumenyula, yaabaanza kulya. 36 Ahonyini áabo bóona baatiimbwa emiganya, nábo baálya. 37 Twéena omubwáato tukaba tuli abaantu magana ábili na makumi musaanzu na mukaaga. 38 Áabo bóona, obuchilo baabele baáhaagile, baanaguza engano omuunziba, babone kubukola obwo bwáato buhuhuúke.
39 Obuchilo kábwaachíile kuzima, áabo ababugi baabona ikóondo elikaba liina omusenyi ahachaambo, náho tibalamanyile ne lya eensi chi. Baalamula nka nikwo babwoolekeze oobwo bwáato buzeende buhase omuli éelyo ikóondo, keélaaba chiíkililizéene. 40 Nikwo baanogola engóye ze éezo enaanga baazisigayo omuunziba, baasumuulula engóye ezaabeele zikomile ensuukáani, ensuukáani zibone kutúuka omumeenzi kubugisa obwaato. Male baahanamika itaanga eliche éelya mbele lyo obwaato bubone kusiindikwa no omuyaga kuzeendela omuli éelyo ikóondo ahachaambo. 41 Náho óobwo bwaato kábweeliileho mbele, bwaahika omwiiteelanilo lye engezi ibili, oomwo bwaáhatila ahamukuúngulu. Aaho bweekala obutanyegenyuka, bwaateelwa lwa amani na amakoonzo ahachitako kuhicha bwaásiingaalika.
42 Áabo abalwaanila ngoma bakeéhanuuza nka nikwo babanigaze áabo embóhe bóona, kuba atabaho nóolu omuuntu oómo omuli áabo ayaakuhicha kuziha akatoloka. 43 Náho óogwo mwiímeelelezi wáabo talayeenzile nka nikwo Paulo ayitwe, habwéecho yaábaangila bataákukola obweéhanuuzi bwaabo. Áaho yaábalagila nka nikwo áabo abalikumanya kuziha beénaguze omumeenzi, babone kwaambuka kuza olugulu. 44 Abalaasigalila batwaále embaáhu, nali ebinogoka ebiindi byo obwaato, nibyo bazihise. Bityo nikwo bóona bakaambuka baaba baáhika kuzima ahachaambo.