Olwaandiko Lwa Paulo Ha
Abagalatia
Empola
1
1 Íinye Paulo, óogwo ndi entumwa, tiindasiindikilwe na abaantu nali kulagilwa no omuuntu bunaanka, náho nkasiindikwa na Yeézu Kristu weényini ne isiichwe Múungu óogwo akamuzoola Yeézu kuluga omu bafwiile. 2 Íinye hamo na abeekiliza beene béetu bóona abali hamo neenye áaha, nitubaangalucha íimwe áabo muli omu makelezia ga Múungu omuchaalo cha Galatia.3 Embabazi no obuhóolo ebilikuluga hali Isiichwe Múungu, na aha Mukáma Yeézu Kristu, bibe hamo neemwe. 4 Kristu akasohoza obulami bwoómwe, habwo kwiiháho ebiheno byéetu, abone kutuchuúngula kuluga omu biheno byóona bye éensi éezi yo óobu nyini. Akakola aátyo kwiingana ne engoonzi za Múungu, Isiichwe.
5 Múungu akuzibwe obucha no obuchiile. Amina.
Tihaliho Empola Nzima Eéndi Eli Ya Amazima
6 Íinye nniinsobelwa bwooli ha bwéenyu! No omwaanya muche kwoónka guhiingwiile, na bwaangu nimumuleka Múungu óogwo akabéeta habwe embabazi ya Kristu, na mwaabaanza kukulaatila ameégeso agáandi áago abaantu abáandi bageeta nka nikwo, ne Empola Nzima. 7 Amazima ni nka nikwo teliho Empola Nzima eéndi. Náho baliho abaantu áabo abalikubabuyaanganisa na nibeénda kuhiindula Empola Nzima zo mwa Kristu. 8 Keelaaba omuuntu weéna wéena, nóobu tulaba ni íichwe boónyini nali maléeka kuluga omu igulu, naabolekeelela empola éezo etakuzeendana na áago íichwe tukaboólekeelela, omuuntu óogwo achéenwe na Múungu! 9 Nniinsubiilila kubasoomboolela kaandi, nko óokwo nkabagaambila obuchilo óobwo nka nikwo, keelaaba omuuntu naabolekeelela empola eéndi, éezo etakuzeendana ne éezo mukeéyega kuluga hali íichwe, omuuntu óogwo achéenwe!
10 Óobu, nimuteekuza nka nikwo nniindoondela kukuúndilwa na abaantu? Mmahi, íinye nniindoondela kukuúndilwa na Múungu weényini kwoónka. Nali nimuteekuza nka nikwo nniindoondela kusemeleza abaantu? Kabilaaba naakubeele nniindoondela kunuliza abaantu, tinaákubeele omuzáana wa Kristu.
Paulo Naasiindikwa Na Múungu Kwoólekeelela Empola Nzima Habwa Yeézu
11 Abeekiliza beene béetu, nniinyeénda musoomboókelwe nka nikwo, Empola Nzima éezo nkabaátulila tizilalugile aha abaantu. 12 Empola éezo tiindaziinaankwiile kuluga ha muuntu, nali kweégeswa no omuuntu. Náho omu kulabila hali Yeézu Kristu weényini niwe akaánnsuululila.
13 Buzima, íimwe mwaahuliile akazeendele kaanze óokwo kaabele kali obuchilo óobwo nkaba nniindwaánila ediini yaanze ye Echiyahudi. Nimusoomboókelwa óokwo nkaagalaza ha busaago abaantu bo omu kelezia ya Múungu, kuzisikiiza butúnu. 14 Nkachila bazeenzi baanze béenzi be echéemo chaanze habwo kulwaanila ediini yéetu ya Abayahudi. Nkeéyomeleza bwooli omu kweékomya engeso éezi naaheelwe na besiinye enkúlu. 15 Náho Múungu akaanntooza obuchilo ncháali ntakazeelwe, yaánnyeta aha mbabazi yoómwe, yaalamula 16 kumuúnnsuululila Omutábani okwo aáli. Akalamula kukola aátyo, mbone kwaátula Empola Nzima habwo Omutábani ha banyamahaánga.a Íinye tiindaloonzile abaantu bo kuúnnhanuuza éecho nndaakola, 17 nali tiinndahanamile kuzeenda Yeruzaléemu hali áabo abannyebeembeliile kuba entumwa. Náho éecho nkakola no kuzeenda bwaangu óokwo omuunsi ya Arabia. Mbweenu, kanabaliile naásuba kaandi omumuzihwa gwa Damaásiko.
18 Obuchilo yaahiíngwiile emyáaka isatu, nkahanama kuza omuchikaali cha Yeruzaléemu mbone kubugana na Peétero.b Naatuula owoómwe ebilo ikumi na bitaanu. 19 Náho tiindabweene entumwa abáandi, kuleka Yakobo, omulúmuna wo Omukáma Yeézu. 20 Múungu naasoombookelwa nka nikwo, amagaambo áago nnniimbandikila na ga mazima, ti ge ebisuba!
21 Mbweenu, ahakulaatiile nkazeenda omuchaalo cha Siíriya ne echa Kilikia. 22 Obuchilo óobwo, íinye nkaba ntakaboneene na abaantu áabo abalikumwiíkiliza Kristu omu makelezia áago agakaba gali omuchaalo cha Yudea. 23 Echiintu choónka éecho bakaba nibasoomboókelwa habwaánze ne empola éezo baahuliize nka nikwo, “Omuuntu óogwo akaba naatwaagalaza áaho aha bubaandizo, ebilo éebi naayolekeelela okwiikiliza óoku nyini óoku akeenda kusiingaalicha!” 24 Niho, baba baámukuza Múungu habwa áago akaba ankoliile.