2
1 Obuchilo yaahiíngwiile emyáaka ikumi ne eéna, naáhanama kaandi kuzeenda Yeruzaléemu hamo na Balinaba, no omu luzeendo óolu naámutwáala Tito twaákwaatanisa náwe. 2 Nkahanama kuzeenda Yeruzaléemu aha buchilo óobwo, habwo kuba Múungu akaba ansuululiile nka nikwo nzeénde. Obuchilo twaahikile, twaabugana na abatégeki be ekelezia aha lubazu. Naábasoomboolela abatégeki áabo Empola Nzima éezo nkaba nniinyolekeelela abanyamahaánga. Nkalamula kubamanyisa echigaambo éecho, kubona emilimo éezo nkaba nniinkola ne éezo ndikuzeendelela kukola, etaákwiiza kuba ya busa. 3 Baákuundilana neenye. Nóobu muzeenzi waanze Tito óogwo atali Muyahudi, talahatikilwe kweékomya ebilagilo bya Musa habwo kusálwa ikóba. 4 Echigaambo éecho cho kusálwa ikóba, chikabuulilizwa na abaantu abaabele nibeekola kuba ni badugu béetu, náho bakeetaasha aha bucheluke kucheéngelela obwiiyagaaluzi bwéetu óobwo twiinabwo omuli Kristu Yeézu. Echihika cháabo chikaba no kutukóla tube abahálila be ebilagilo bya Musa. 5 Íichwe titulakuundileene nabo no obuche bwa káti, kubona amazima ge Empola Nzima ezeendelele kusigala neemwe ebilo byóona.6 Náho abatégeki áabo be ekelezia áabo abalikukuzwa bwooli na abaantu, tibalabeele ne echigaambo choóna chóona chisha cho kuúngaambila. Na mazima bakakuzibwa bwooli, náho hali iinye éezo teyina ensoonga, habwo kuba Múungu takusaaswa ikuzo lyo omuuntu. 7 Abatégeki áabo baamanya nka nikwo, Múungu akaannsiíndika nnyolekeelele Empola Nzima habwa Yeézu aha abanyamahaánga, nka nikwo akamusiíndika Peétero ayolekelele omu Bayahudi. 8 Habwo kuba Múungu óogwo ayaabonesize Peétero kuba entumwa yoómwe ha Abayahudi, niwe óogwo nyini ayaambonesa íinye kuba entumwa yoómwe aha abanyamahaánga. 9 Mbweenu, Yakobo, Peétero na Yohana, abaabele bali abatégeki abakulu, bakasoombookelwa nka nikwo Múungu niwe akaampa emilimo éezi aha mbabazi zoómwe. Ha bwéecho, baatukwáata engalo íinye na Balinaba nko oluméenko lwo obumo bwéetu. Tukakuúndilana nka nikwo íichwe tuzeénde kukola emilimo ha banyamahaánga, na boónyini bakole emilimo ha Abayahudi. 10 Abatégeki áabo bakatusaba echigaambo chimo choónka, nka nikwo, tube nitwiizuka abahabi omu beekiliza bo óokwo Yeruzaléemu. Neenye nnyiyomeliize bwooli kukola echigaambo éecho.
Paulo Namukaama Peétero
11 Kagaabele gaáhweele áago, Peétero akeeza Antiokia. Kayeezile, nkamuhakanisa butúnu omuméeso ga abeekiliza, habwo kuba akahena. 12 Obuchilo óobwo Peétero yaahikile, akaba naálya ebyookulya hamo na abeekiliza áabo bakaba bali abanyamahaánga hatéena kábi. Náho obuchilo abaantu bunaanka kuluga ahali Yakobo kábaahikile, akeéliga na abeekiliza áabo abaabele bali abanyamahaánga, yaaleka kulya nabo ebyookulya. Akakola aátyo, habwo kuba akeeganya abaantu abaabele nibakomeenteleza nka nikwo abeekiliza bóona babe nibasalwa amakoba go obuséeza. 13 Kaandi, abeekiliza abáandi be Echiyahudi baabaanza kukola nkóokwo Peétero akakola, kunu bamanyile nka nikwo no obugóbya. Nóobu Balinaba náwe akakoobwa, yaakóba omubugóbya bwáabo.
14 Mbweenu, óobu nkabona nka nikwo tibakukola nko óokwo amazima ge Empola Nzima gali, naámugaambila Peétero aha bweélu nka nikwo, “Iiwe oli Omuyahudi, náho óokwo olikukola ni nko óokwo abanyamahaánga balikukola. Na habwaáchi óobu obahatike áabo abatali Abayahudi kukulaatila obuteéka bwe Echiyahudi?”
Abaantu Bóona Nibachuungulwa Habwo Kumwiíkiliza Yeézu Kristu
15 Na mazima nka nikwo íichwe obuteéka bwéetu tuli Abayahudi, tituli abanyamahaánga abali “abaheni.” 16 Náho nitumanya nka nikwo, omuuntu tiyaákuhicha kubalwa kuba omuuntu wa amazima omuméeso ga Múungu habwo kweékomya ebilagilo bya Musa, náho na habwo kumwiíkiliza Yeézu Kristu weénka. Tútyo neechwe kaandi, tumwiikilize Kristu Yeézu tubone kubalwa kuba abaantu ba amazima omuméeso ga Múungu habwo kumwiíkiliza Kristu, ti habwo kweékomya ebilagilo bya Musa. Na mazima nka nikwo táliho omuuntu óogwo yaakaáhicha kubalwa kuba omuuntu wa amazima omuméeso ga Múungu habwo kweékomya ebilagilo bya Musa.a 17 Mbweenu, nituleengesa kubalwa kuba abaantu ba amazima omuméeso ga Múungu habwo kukwaátana na Kristu, náho nitupéetwa na abaantu abáandi nka nikwo íichwe nabo twaabele abaheni. Ngási, na amazima nka nikwo Kristu naatukola kuba abaheni? Mmahi, no obuche bwa káti! 18 Náho kabilaaba nniinsubiilila kwiikiliza omweétégeko gwa kala ogwo kweékomya ebilagilo, omweétégeko óogwo nkáanga, áaho mbweenu iinye, niímba ndi omuheni. 19 Obuchilo óobwo nkaba nniindeengésa kweékomya ebilagilo bya Musa, ebilagilo bikaanchwaazika, naáfwa. Náho óobu, tiínkuleengesa kaandi kutúula habwo kweékomya ebilagilo éebyo, mbone kuhicha kutúula nko óokwo Múungu alikweendaho. 20 Óobu Kristu akafwa ahamusalaba, no obulami bwaanze bwa kala bukafwa. Óobu ndyo omulame, náho ti nko óokwo kunaabele ndi kala, náho óobu ni Kristu óogwo alikutuula omuli íinye. Obulami óobwo inyinabwo obuchilo óobu, nniintuúla omu kumwiíkiliza Mutábani wa Múungu. Weényini akaányeenda no kubusohoza obulami bwoómwe hali íinye abone kunnchuúngula. 21 Tiínkusuucha embabazi ya Múungu. Ha kuba kabilaaba amazima nigahicha kubonwa kulabila ebilagilo bya Musa, mbweenu Kristu akafwa busa!