Abagalatia 3

Ebilagilo Nali Okwiikiliza

1 Íimwe Abagalatia, mubeele abafeéla bwooli! Noóha abahoonile? Nkaboólekeelela butúnu habwa chi Yeézu Kristu akabaambwa aha musalaba. 2 Nniinyeénda mbabuuze echigaambo chimo. Ngási, mukeenaankula Omwooyo Mutakatíifu habwo kuba mkeekomya ebilagilo bya Musa, nali na habwo kuba mukahulila no kwiikiliza Empola Nzima habwa Yeézu? 3 Na habwaáchi mubeele abafeéla mútyo? Mukabaanza obulami bwaanyu obusha habwa amagala go Omwooyo Mutakatíifu, náho óobu nimweénda kuhikiilizibwa habwa amagala géenyu íimwe nyini? 4 Ngási, ebyaágalalo byóona éebyo bikabasaanga, bikaba bili ebya busa? Tibilabeele bya busa! 5 Mbweenu muungaambíle, ngási Múungu abaha Omwooyo Mutakatíifu no kukola amahano omuli íimwe habwo kuba mkeekomya ebilagilo bya Musa, nali habwo kuba mukahulila no kwiikiliza Empola Nzima habwa Yeézu?

6 Muteekuze empola za Ibrahímu. Amaandiko Matakatíifu nigagaámba nka nikwo, “Akamwiíkiliza Múungu, ha bwéecho Múungu yaamupeetela kuba omuuntu owa amazima omuméeso goómwe.” 7 Óobu mbweenu, musoomboókelwe nka nikwo abaantu áabo abalikumwiíkiliza Múungu, nibo bali abaana ba Ibrahímu ba mazima! 8 Amaandiko Matakatíifu gakabaasa nka nikwo Múungu yaakapeesile abanyamahaánga kuba abaantu ba amazima omuméeso goómwe habwo okwiikiliza kwáabo. Múungu akeebeembela kumwoólekeelela Ibrahímu éezo Mpola Nzima nka nikwo, “Kulabila hali iiwe, abanyamahaánga bóona nibafuuhwa.” 9 Habweecho, abaantu áabo abalikumwiíkiliza Múungu, nibafuuhwa, nko óokwo Ibrahímu akafuuhwa habwo kuba akamwiikiliza.

Abeekiliza Bachuúngwiilwe Kuluga Áaha Mucheeno Gwe Ebilagilo Bya Musa

10 Náho bóona áabo abalikutegeza kuchuúngulwa habwo kukola áago galikweendelwa ne ebilagilo bya Musa, áabo bacheenilwe. Amaandiko Matakatíifu nigagaámba nka nikwo, “Weéna wéena óogwo atakukwáata no kukola góona áago agaandikilwe omu chitabu che ebilagilo, óogwo acheenilwe.” 11 Mbweenu, na amazima nka nikwo, taliho omuuntu óogwo alikubalwa kuba omuuntu wa amazima omuméeso ga Múungu habwo kweékomya ebilagilo bya Musa, habwo kuba Amaandiko Matakatíifu nigagaámba nka nikwo, “Omuuntu owa amazima alyaálama omu kwiikiliza.” 12 Ebilagilo bya Musa tibikutegeza okwiikiliza, náho nibitegeza ebikolwa byo omuuntu éebyo alikukola. Ni nko óokwo Amaandiko Matakatíifu galikugaamba nka nikwo, “Omuuntu óogwo alikukola góona áago agalikweendelwa ne ebilagilo, naába no obulami habwo kweékomya ebilagilo éebyo.”

13 Kristu akatuchuúngula kuluga aha mucheeno gwe ebilagilo, habwo kwiimucha óogwo omucheeno gwéetu. Habwo kuba Amaandiko Matakatíifu nigagaámba nka nikwo, “Weéna wéena óogwo abaambilwe aha musalaba, acheenilwe.” 14 Akatuchuúngula, kuba omugisa óogwo yaaheelwe Ibrahímu, guhikile abanyamahaánga kulabila Kristu Yeézu. Bityo, óobu íichwe bóona tukaáhicha kwiinaankula Omwooyo Mutakatíifu óogwo Múungu akatweésagiza kutuha, habwo omuháanda gwo kumwiíkiliza Kristu Yeézu.

Endagano Za Múungu Ahali Ibrahímu Ne Echihika Che Ebilagilo Byoómwe Ahali Musa

15 Beene béetu, nsohoze omugani kuluga omu bulami bwéetu bwa buli chilo. Tugaámbe nka nikwo heena abaantu bábili beekililizene habwe echigaambo bunaanka. Kabilaaba beekililizeene omu kukuúndilana, tihaliho omuuntu óogwo alihicha kubigaya nali kwoongela choóna chóona omu kukuúndilana kwáabo. 16 Mbweenu, Múungu akasohoza endagano habwa isiichweénkulu Ibrahímu, hamo ne enzáalwa yoómwe. Amaandiko Matakatíifu tigakusoombola nka nikwo, “Na aha nzaalwa zoómwe,” ensoonga yaáho ni nka nikwo ti béenzi, náho nigagaámba nka nikwo, “Ne enzáalwa yoómwe,” ensoonga yaáho nka nikwo no oómo, niwe Kristu. 17 Éecho ndikweenda kugaamba ni nka nikwo, Múungu akakola no kusuumba endagano yoómwe emyáaka magána aána na makúmi ásatu, obuchilo ebilagilo bya Musa bitakabéeleho. Ha bwéecho, ebilagilo éebyo tibikuhicha kusúucha omulago óogwo nali kusaambulula endagano yoómwe. 18 Kabilaaba abaantu baakubweenaánkwiile obuhuúnguzi bwáabo kuluga ahali Múungu omu kweékomya ebilagilo, mbweenu obuhuúnguzi óobwo tibwaakuhikize kaandi kutegeza endagano ya Múungu. Náho Múungu, habwe embabazi yoómwe, akamuha Ibrahímu obuhuunguzi bwe ndagano habwo kuba akamweésagiza aátyo.

19 Mbweenu, ebilagilo biina mulimo chi? Ebilagilo bikateebwáaho habwo kwoóleka obufu bwa abaantu, kuhicha obuchilo óobwo aleéza omuzaalwa wa Ibrahímu, óogwo Múungu akalagana nka nikwo aléeza. Ebilagilo éebyo, Múungu akamuha Musa kulabila hali maléeka, na Musa yaaba omukwaátanisi wa Múungu na abaantu boómwe. 20 Omukwaátanisi naayeendelwa kubaho keelaaba enkási ibili nizikola endagano. Náho Múungu no oómo, weényini akakola ndagano na Ibrahímu, hatéena kubaho omukwaátanisi.

21 Óobu ngási, ebilagilo nibihakana ne endagano éezo Múungu alageene? Mmahi, no obuche bwa akáti! Kahakubeele heena obuhicha bwe ebilagilo kubabonesa abaantu obulami obusha, niho twakaáhichize kubalwa kuba abaantu ba amazima omuméeso ga Múungu habwo kweékomya ebilagilo. 22 Náho tikwo bili. Amaandiko Matakatíifu nigagaaámba nka nikwo, abaantu bóona babohilwe omu butégeki bwe ebiheno. Bityo, Múungu alaábaha éecho yalageene ahali bóona áabo abalikumwiíkiliza Yeézu Kristu.

23 Obuchilo óobwo abaantu tutakabele no okwiikiliza ahali Yeézu Kristu, ebilagilo bya Musa bikatweémanya no kutukóla kuba embóhe zaábyo. Tukaba nituliindilila obuchilo bwo kwiiza kwo okwiikiliza omuli Yeézu Kristu kusuululwe. 24 Ebilagilo bya Musa bikaba nibitweebeembelela nko omulezi wéetu, kuhicha obuchilo óobwo Kristu akeeza. Ha bwéecho óobu, na habwo kumwiíkiliza Kristu nka nikwo tukaáhicha kubalwa kuba abaantu ba amazima omuméeso ga Múungu. 25 Náho óobu, okwiikiliza omuli Yeézu Kristu kwaáhikile, ha bwéecho tituchili kaandi omukutégekwa ne ebilagilo 26 Óobu íimwe bóona muli abaana ba Múungu habwo okwiikiliza kwéenyu, habwo kuba mukwateene kulabila omuli Kristu Yeézu. 27 Íimwe bóona áabo mubatizibwe, mukwateene na Kristu, mwaábeele nka abamweésweekile Kristu. 28 Ha bwéecho, táliho kuchilanisa omu Muyahudi no óogwo atali Muyahudi, nali omuzáana no omuuntu ayeyaagaalwiile, nali omukwaáta no omukázi. Bóona nimwiingana, habwo kuba mukwateene kulabila omuli Kristu Yeézu. 29 Íimwe na bo mwa Kristu, na aha muháanda óogwo mubeele oluzáalo lwa Ibrahímu, na nimwiinaánkula obuhuúnguzi óobwo Múungu akalagana.