Abagalatia 4

1 Mbweenu, echigaambo éecho ndikweenda kubasoomboolela ni nka nikwo, weéna wéena óogwo alikuhuungula ebiintu bye iíse obuchilo achili omwaana, téena kuchilana bwooli no omuzáana, nóobwo ebiintu byóona bili ebyoomwe. 2 Obuchilo óobwo bwóona, omuhuunguzi aba ali omukutégekwa omuungalo ze endiinza na abaantu áabo bali abeémeelelezi be ebiintu byoómwe, kuhicha obuchilo óobwo iíse akaba aloongíze. 3 Ne éechwe kaandi ni bityo nyini, obuchilo óobwo Kristu akaba acháali kwiiza, tukaba tuli nka abaana, tukaba tuli abahálila bo obuteéka óobwo obulikutégeka éensi éezi. 4 Náho obuchilo óobwo obwaaloongizwe kabwaahikile, Múungu yaamusiíndika Omutábani omuunsi éezi. Óogwo mutábani, akazaalwa no omukázi nke éechwe, yaaba naatuula omukutégekwa ne ebilagilo bya Musa. 5 Akasiindikwa abone kutuchuúngula íichwe áabo tukaba tuli abahálila be ebilagilo bya Musa. Akakola aátyo, kuba íichwe bóona tubone kuba abaana ba Múungu.

6 Habwo kuba tuli abaana ba Múungu, weényini akasiindika Omwooyo gwo Omutábani omu miganya yéetu. Óogwo Mwooyo niwe alikutukola tumweete Múungu “Aba” ensoonga yaáho “Isiichwe!” 7 Mbweenu, óobu kaandi íimwe timuchili abazáana, náho muli abaana ba Múungu. Ha bwéecho, nimwiinaánkula obuhuunguzi óobwo Múungu ateelileho abaana boómwe.

Paulo Nabakaama Abagalatia

8 Íimwe kala mukaba mutakumusoombookelwa Múungu. Obuchilo óobwo, mukaba muli abahálila bo okulamya amagala go obuteéka, áago agatakuluga hali Múungu owa amazima. 9 Náho óobu, nimumusoombookelwa Múungu, no obusáago bwa áago weényini naabasoombookelwa íimwe. Mbweenu na habwaáchi nimweénda kutégekwa kaandi no obuteéka óobwo obulikutégeka éensi éezi? Obuteéka óobwo tibwiina obuhicha nali ensoonga yoóna yóona. Nali kaandi nimweénda bubakole kuba abahálila? 10 Mucheétegeeleza ebilo bikulu bye Echiyahudi! Nimweétegeeleza echilo bunaanka cho obwooyo, cha améezi, ne cho omwaaka! 11 Nnniinyeganya nka nikwo lúundi emilimo yaanze yóona éezo nkakola ha bwéenyu, nkeéyagalaza busa kwoónka. 12 Beene béetu, nniimbasaba nka nikwo, mube nkéenye habwo kuba iinye ndi nke éemwe.

Óobu nkaba ndi hamo neemwe, timulaanheniile nakáti. 13 Nimumanya nka nikwo aha bubaandizo, endwáala éezo nkaba nyina, niyo ekaletelela naabonesa omwáanya gwo kuboólekeelela Empola Nzima. 14 Nóobu endwáala yaanze ekabaleengesa kuúnngaya nali kuunnyaanga, timulazizile mútyo. Náho éecho mukakola no kuunnyegeza nka maléeka wa Múungu, nali nóobu kuunnyegeza nka nikwo yaakubeele ali weényini Kristu Yeézu. 15 Obuchilo óobwo, mukaba mwiina manulilwa, náho óobu, ni chiíha echáaba? Niinnkumuúcha amazima nka nikwo, obuchilo óobwo kabyakukuundileene, mukaáhichize nóobu kuhopolamo améeso gáanyu mugaámpa iinye. 16 Ngási, óobu naaba omubisa wáanyu habwo kuba nniimbagaambila amazima?

17 Áabo beégesa be ebisuba nibabaagalalila íimwe, náho echihika cháabo ti chizima. Nibeénda kubataáganisa íimwe muunnuge iinye, nka nikwo íimwe mubaágalalile boónyini ha chihika. 18 Ne echigaambo chizima kweéyomeleza, náho eébe aha kukola ebikolwa ebizima. Mukole mútyo obuchilo bwóona, nóobu habwo obuchilo óobwo tiíndi hamo neemwe. 19 Abaana báanze, éezi ne entulo eéndi kaandi hali íinye kuhulila obusuungu ha bwéenyu, nkokwo omukázi owe eenda alumwa no obusuungu ha buchilo bwo kweéchuungula. Niinnyehulila ntyo nyini, kuhicha entúungwa za Kristu zilaabonwa omu ntúungwa zaanyu. 20 Naakaáligiile bwooli kuba hamo neemwe obuchilo óobu, lúundi naakaáhooyile neemwe ha buchuleezi. Niinntahwa tahwa bwooli ha bwéenyu!

Omugani Gwa Haájili Na Sáara

21 Óobu muunngaambíle, íimwe áabo mulikweenda kuba abahálila kutégekwa ne ebilagilo bya Musa, ngási nimusombookelwa kuzima óokwo ebilagilo bilikulagila? 22 Chaandikilwe omu Maandiko Matakatíifu nka nikwo, Ibrahímu akaba ayina abaana bábili. Oómo akamuzáala na Haájili óogwo akaba ali omukázi omuhalila, no oóndi akamuzáala na Sáara óogwo akaba ali omukázi alikweéyagaalula. 23 Omwaana wo omukázi omuhalila akazaalwa habwo omweétégeko gwa abaantu. Náho omwaana wo omukázi ayeyagaalwiile, weényini akazaalilwa habwe endagano ya Múungu. 24 Abakázi áabo bábili nibahicha kubonwa nko omususano gwe endagano ibili. Haájili naayemeelela habwe ndagano yo kubaanza éezo eyaakoliilwe ahi ibaanga lya Sinai omu eensi ya Arabia. Abaana boómwe bakazaalwa nka abazáana omubutégeki bwe ebilagilo bya Musa. 25 Haájili naayemeelela habwe endagano éezo Múungu akakola ahi ibaanga lya Sinai omu eensi ya Arabia. Abaantu ba Yeruzaléemu ba háti ni nka abaana ba Haájili, habwo kuba na abahálila omubutégeki bwe ebilagilo bya Musa, nka weényini Haájili na abaana boómwe bóona. 26 Náho Sáara naayemeelela ahali Yeruzaléemu yo omu igulu, éecho chili echikaali echeéyagaalwiile, no óogwo nigwo nyinéechwe. 27 Omu Amaandiko Matakatíifu, chaandikilwe habwa weényini nka nikwo,

“Nulilwa iiwe omuguumba óogwo otakuhicha kuzáala,

yaambaza iláka iiwe óogwo otakahichaga kuhulila obusuungu bwo kweéchuungula omwaana,

habwo kuba abaana ba óogwo alekilwe weénka ni béenzi,

kusaaga óogwo ayina iíba.”

28 Mbweenu óobu, beene béetu, íimwe muli abaana ba Múungu habwe endagano yoómwe, nko óokwo Izáaka akaba ali. 29 Náho aha bilo éebyo, omwaana óogwo akazaalilwa habwo omweétégeko gwa abaantu, akamwaágalaza omwaana óogwo akazaalwa ha obuhicha bwo Omwooyo Mutakatíifu. Ebilo éebi, abaantu abali kutégekwa ne ebilagilo nibabaágalaza íimwe áabo mwiina obweéyagaaluzi bátyo nyini. 30 Náho Amaandiko Matakatíifu nigagaámbaho gáta? Nigagaámba nka nikwo, “Biínga omukázi omuhalila hamo no omwaana woómwe, habwo kuba omwaana wo omuhalila tiyaákuhicha kuhuungula hamo no omwaana wo omukázi ayeyaagaalwiile.” 31 Ha bwéecho, beene béetu, íichwe tituli abaana bo omukázi omuhalila, náho tuli abaana bo omukázi ayeyaagaalilwe.