Obweéyagaaluzi Bwo Omukristu
5
1 Kristu atuheele obweéyagaaluzi, kuba tubone kutúula omu bweéyagaaluzi. Ha bwéecho mwiimeelele bweémi, muteekiliza kusuba kaandi omu kutégekwa no kuza omu buzáana bwe ebilagilo. 2 Muhuliilíze éecho íinye Paulo ndikubagaambila! Keelaaba nimukuúnda kusálwa ikóba habwo kweékomya ebilagilo bya Musa, áaho Kristu naaba atéena ensoonga yoóna yóona hali íimwe. 3 Niimbagaambila butúnu kaandi nka nikwo, omuseeza weéna wéena óogwo alikukuunda kusálwa ikóba, naayeendelwa kweékomya ebilagilo byóona bya Musa. 4 Keelaaba nimutegeza kubalwa kuba abaantu ba amazima omuméeso ga Múungu habwo kweékomya ebilagilo, mbweenu musoomboókelwe nka nikwo mwaátaganisizwe na Kristu, na muli hala ne embabazi za Múungu. 5 Náho íichwe nitutegeza habwo obuhicha bwo Omwooyo Mutakatíifu nka nikwo, Múungu naatubala kuba abaantu ba amazima, habwo kuba nitumwiikiliza Yeézu. 6 Mbweenu, keelaaba tukobeene omuli Kristu Yeézu, kusálwa ikóba nali kuleka kusálwa tiheena ensoonga yoóna yóona. Echiintu che ensoonga no okwiikiliza kwéetu óokwo kulikukola emilimo omu ngoonzi.7 Akazeendele kaanyu mbele kali kazima! Óobu noóha abazibiile Mutakwáata ameégeso ga amazima? 8 Óobwo obukoonza koonzi tibukuluga ahali Múungu óogwo abeesile. 9 Náho musoomboókelwe nka nikwo, áago ameégeso ge ebisuba, ni nko óokwo abaantu balikugaamba nka nikwo, “Akatuumbyo kache kwoónka nikatuumbisa ensaano yóona!”a 10 Nniimbeesiga nka nikwo íimwe nimuteelana no Omukáma Yeézu, ha bwéecho timukwiikiliza kubéehwa béehwa. Náho omuuntu weéna wéena óogwo alikubabuyaanganisa, nóobu alaaba aábe oóha, naachwaaziikwa.
11 Beene béetu, abaantu abáandi nibagaámba nka nikwo, íinye ncháali nniinyolekeelela nka nikwo abaseeza bóona nibeendelwa basálwe amakoba. Kabyaakubeele bili mazima nka nikwo nniinyolekeelela iíntyo, habwaáchi óobu Abayahudi nibaanyagalaza? Kabilaaba naakubeele nniinyolekeelela iíntyo, okwoólekeelela kwaanze habwe empola zo olufu lwa Yeézu ahamusalaba, tikwaákuleteliile Abayahudi baanntamwe. 12 Nniindígila nka nikwo abaantu áabo nibababuyaanganisa habwa amagaambo go kweésala amakoba, beésale boónyini!
Kutúula Habwo Obuhicha Bwo Omwooyo Mutakatíifu
13 Íimwe beene béetu, mwaayetelwa mubone kwoónka kuba abeéyagalwiile. Náho mutazila obweéyagaaluzi bwaanyu nko olugazi lwo kukulaatila etuúnku zo omubili, náho muhweélane omu ngoonzi. 14 Ebilagilo byóona bya Musa nibiteelaniswa aha chilagilo chimo nka nikwo, “Omweénde mutúuzi waawe nko óokwo olikweéyeenda iiwe nyini.”b 15 Náho kamulaazeendelela omu kweéhutaaza no kulumaangana, mulamanya mutaákwiiza mukeésiingaalicha.
16 Mbweenu, éecho ndikubagaambila ni nka nikwo, akazeendele kaanyu kabe nikeebeembeelelwa no Omwooyo Mutakatíifu. Kámulaakola mútyo, timukuhikiiliza kaandi etuúnku zo omubili. 17 Niimbagaambila ntyo, habwo kuba etuúnku zo omubili zisiingaangana no óokwo ayeendáho Omwooyo Mutakatíifu, no Omwooyo Mutakatíifu nigusiingaangana ne etuúnku zo omubili. Omwooyo Mutakatíifu ne etuúnku zo omubili nibyeetola, habwe ensoonga éezo, timukuhicha kukola choóna chóona éecho mulikweenda muchikole. 18 Keelaaba nimweebeembelelwa no Omwooyo Mutakatíifu, timuchitégekwa ne ebilagilo bya Musa.
19 Mbweenu, amagaambo áago agalikukolwa habwa ameelu go omubili gali butúnu, nago no obusaambani,c obulofo, amagaambo góona ge ensóni, 20 kulamya ebisusano, obulozi, obubisa, endwaana, ichubi, echihulumuko, olwaango, abutahulilana, obukúmuuchi, 21 ichubi, entamiilo, omululu na amagaambo agáandi góona áago agali nka áago. Niimbagaambila kaandi nko óokwo nkaba naábagaambiile nka nikwo, abaantu áabo bakola amagaambo áago, tibakuhuungula obukáma bwa Múungu. 22 Náho keelaaba nitweebeembeelelwa no Omwooyo Mutakatíifu, nituba ni igoomba lyo Omwooyo Mutakatíifu. Igoomba éelyo nibyo engoonzi, amanulilwa, obuhóolo, okweéyomeleza, obufula, obusaanduki, obweésigwa, 23 obuteékaani no okweébalilila. Tihaliho ebilagilo éebyo ebilikwaángila omuuntu atakola amagaambo áago. 24 Abaantu áabo abakwaateene na Kristu Yeézu, baba batakutégekwa ne etuúnku záabo zo omubili hamo ne ebiteékuzo byáabo bíbi, habwo kuba bagabáambile áago góona aha musalaba gwa Yeézu. 25 Omwooyo Mutakatíifu atuheele obulami obusha, mbweenu tutuungwe omu kumwiikiliza. 26 Tuteésiingiza busa, tuleke obwaaye nali tutachubilana.