Kweéyemela No Kukola Ebizima
6
1 Beene béetu, kamulasombookelwa nka nikwo muzeenzi wáanyu yaakola ebiheno bunaanka, íimwe áabo mulikweébeembelelwa no Omwooyo Mutakatíifu, mumuhane kuzima omuuntu nko ogwo aha muganya gwo buchuleezi. Náho mweémanye emiganya yaanyu íimwe nyini, mutaákwiiza mukaleengeswa kuba ne entúungwa nke zoómwe. 2 Mweézune omu kweéyemela ebyaágalalo byo kuziikilizwa kwaanyu, niho mulahikiiliza echilagilo cha Kristu.a 3 Omuuntu weéna wéena óogwo alikuteékuza nka nikwo ayina akalyo kusaaga bazeenzíbe, óogwo tayina kályo koóna kóona, naayebeéha weénka. 4 Buli omuuntu akaguze entúungwa zoómwe weényini nyini. Keelaaba omuuntu naakola ebizima, áaho yaakaáhicha kweésiingiza amagaambo amazima áago akozile. Náho ateyiinganisa na amagaambo áago omuuntu oóndi akozile, 5 habwo kuba buli muuntu naayeendelwa weényini nyini asutule omugugu gwoómwe.6 Omuuntu óogwo alikweégeswa echigaambo cha Múungu, aábe naakobela hamo no omweégesa woómwe ebiintu ebiluunzi éebyo abonesize. 7 Mtaákwesuluhaza, Múungu tagaywa. Omuuntu éecho alikubiba, nicho alaagesa. 8 Kuba, omuuntu óogwo alikutumaanga omu tuúnku zo omubili, óogwo alaagesa okusiingaalichwa kuluga omuli éezo tuúnku. Náho óogwo alikukulaatila Omwooyo Mutakatíifu, óogwo alaagesa kuluga omuli gwoónyini obulami óobwo obutahwaaho. 9 Ha bwéecho, tutaákulemwa kukola ebikolwa ebizima! Katulaaba nitweegumisiliza kukola ebizima, nitugesa kuzima obuchilo bwo kugesa kabulaahika. 10 Mbweenu, omwáanya gwoóna gwóona katulaaba na obugazi, tubazilile abaantu bóona ebizima, náho muno abeekiliza bazeenzi béetu.
Obusoomboozi Bwo Kuheleeluka
11 Muleebe óokwo mba nniinyaandika ha nyúguta mpáango. Niinyaandika kwe engalo záanze iinye nyini óobu.
12 Abaantu áabo abalikubahatika íimwe musalwe amakoba, nibeénda bátyo kubona ikuzo lya abaantu. Nibeénda bateeza kwaágalazibwa habwo kwoólekeelela empola habwo olufu lwa Kristu ahamusalaba. 13 Nóobu áabo abasazilwe amakoba boónyini, nabo tibakubyeékomya ebilagilo byóona. Echiintu éecho balikuloonda ni nka nikwo íimwe musalwe amakoba, babone kweékuza habwo kusalwa kwe emibili yaanyu.
14 Náho íinye tiínkweenda kuba ne echiintu cho kweésiingiza, náho olufu lwo Omukáma wéetu Yeézu Kristu ahamusalaba. Habwo olufu lwoómwe, amagaambo góona ge éensi éezi gabulize ensoonga hali íinye, no obulami bwaanze bwa kala bufwiile náwe ahamusalaba. 15 Kusálwa ikóba nali obutasalwa, tiheena ensoonga yoóna yóona. Echiintu cha kályo no kuhaangwa obusha na Múungu.b 16 Obuhóolo ne echiganyizi éebyo ebiluga ahali Múungu bibe na abaantu bóona áabo abalikweékomya amazima áago, áabo nibo abaantu ba Múungu.c
17 Mbweenu, kubaandiza óobu omuuntu weéna wéena ataannyagalaza, habwo kuba íinye nyina enkózo aha mubili gwaanze habwo kumuheéleza Yeézu.
18 Beene béetu, embabazi yo Omukáma wéetu Yeézu Kristu eébe hamo neemwe. Amina.