Kwiízuzwa Obuhicha Kuluga Hamwooyo Mutakatíifu Echilo Cha Peentekoste
2
1 Obuchilo bwe echilo cha Peentekoste kabwaahikile, abaantu bóona áabo abamwiíkiliize Yeézu bakaba bakobíle omuunzu eémo. 2 Ahonyini, iláka elyaabele lili nke echiihule cho omuyaga, gwaáheemba kuluga omwiigulu, gwéeza gweezula omuunzu yóona éezo bakaba beekeelemo. 3 Ahonyini beésulukizwa ebiintu bili nke endími zo omulilo, byeebaganisa, byeekala halugulu ya buli oómo wáabo. 4 Abaantu áabo bóona beezuzwa obuhicha kuluga hamwooyo Mutakatíifu, baabaanza kugaamba ha ndimi eziindi, nkokwo Omwooyo Mutakatíifu yaabeendiize kugaamba.5 Na áaho Yeruzaléemu bakaba baliho Abayahudi abaabele nibamulámya Múungu. Áabo Bayahudi bakaluga buli mahaánga góona ge éensi. 6 Obuchilo kábaahuliile iláka éeli, abaantu embága beeza. Na buli oómo wáabo yaákamaala, habwo kuba akabahulila abeekiliza áabo nibagaamba gaamba nabo omuundimi ezili záabo. 7 Áago gaábasobeza no kubakaamaaza bwooli, kunu nibagaámba, “Ngási áaba bóona bi tulikuhulila nibasoomboola baáti, ta abatuuzi ba Galiláaya? 8 Ngási! Byáabaho bita nkokwo buli oómo wéetu naabahulila nibagaámba ha lulimi lwoómwe lwo obuzaálwa? 9 Áaha heena abaantu kuluga omuunsi za Abaparti, Medi, Eláamu, Mesopotamia, Yudea, Kapadokia, Poonto, Asia, 10 Furigia, Paamfilia, na Miísiri. Heena abáandi kuluga olubazu lwe éensi ya Liíbiya éezo zili héehi na Kurene. Heena abazenyi áabo bakaba balugile óokwo Ruumi, 11 áabo abáandi na Abayahudi bo obuteéka, na abáandi bakazaalilwa edíini eziindi náho beékililizana ne edíini ye Chiyahudi. Heena abáandi áabo bali Abakirete, na abáandi Abaarabu. Ne éechwe chwéena, nituhulila abaantu áaba nibamukuza Múungu ha bikolwa byoómwe bikulu, omundimi ezili zéetu nyini!”
12 Abaantu bóona baákamaala no kutahwa tahwa nibeegaámbila, “Chiina ensoonga chi, echigaambo éechi?” 13 Náho abaandi omuli áabo baábasekeelela áabo baantu ba Yeézu omukugaamba, “Batamiile eviini!”
Peétero Naasoomboólela Abaantu Empola Zo Omwooyo Mutakatíifu
14 Náho Peétero yaáyemeelela, hamo ne entumwa bazeenzíbe áabo ikumi no oómo, yaabagaambila abaantu áabo ahi iláka liháango, “Íimwe Bayahudi, ne éemwe abaandi áabo mulikutuula áaha Yeruzaléemu, muunhuliilíze kuzima, mbóne kubasoombóolela éebyo! 15 Nimuzila múti abaantu áaba batamiile, amazima, áaba baantu tibatamiile. Óobu hachaali ne esáaha isatu kwoónka ze enchaákala! 16 Náho amagaambo áaga nigo áago Múungu yaagaambile kulabila aha mubáasi woómwe Yoeli, nka nikwo,
17 ‘Omubilo byo omuheleeluko, niimbaseéselela abaantu bóona Omwooyo gwaánze.
Batabani béenyu na bahala béenyu balaabáasa,a
na abasigazi béenyu nibabona ameezaho,
na abanyaampala béenyu nibaloóta ebiloosi.
18 Omubilo éebyo niimbaseésela Omwooyo gwaanze
noobu halugulu ya abahalila baanze, abakwaáta na abakazi,
nabo balaágaamba obubáasi.
19 Niinkola amahano omwiigulu olugulu,
ne emanyiso omuunsi ahaansi,
obwaamba, no omulilo,
no olwóoya lwiinzi lwe elíika.
20 Izóoba lilaáhiinduka kuba ensiimbaazi,
no okwéezi kuláaba okulikutukula nko obwaamba.
Áago góona galáaba obuchilo chitakahikile echilo chikúlu chi ikuzo lyo Omukáma.
21 Na weéna wéena óogwo alikwéeta
ahi izíina lyo Omukáma naachuungulwa.’b”
22 Peétero yaazeendelela kugaamba, “Íimwe bakwaáta Abanyaizilaeli, muhuliilíze! Múungu akamumanyisa butúnu Yeézu Omunyanazaléeti hali íimwe, ha muhaanda gwa amahano, agokusobeza, ne emanyiso kulabila hali weényini, éezo Múungu akamuhikiiliza kuzikola omuli íimwe. Áago, íimwe nyini nimugamanya kuzima. 23 Káyaabaliile óogu Yeézu yaasohozwa hali íimwe, nka Múungu okwo yaalamwíile kwiingana ne ensoonga yoómwe kuluga habubaandizo. Néemwe mukamubaamba no kumumwiitila ahamusalaba, aha muhaanda gwo kulabila Abanyamahaánga abatakusaaswa ebilagilo. 24 Náho Múungu akamuzoola kuluga omubafwiile, yaamuchuúngula ne ebyaágalalo byo olufu, habwo kuba mazima tichikwiíle lufu kuzeendelela kumukoma Yeézu! 25 Kuba nawe Omukáma Daudi akagaamba aáti habwa Yeézu,
‘Nkaba mmubona Omukáma ali omuméeso gaanze buli bucha.
Na habwo kuba ali olubazu lwaánze lwo obulyo, tiínkuchuúndagulika.
26 Habwéecho, omuganya gwáanze nigunulilwa,
kaandi olulimi lwaanze niluteéla emihila.
Noobu omubili gwáanze nagwo, nigutuula ahabweetegeza bwa weényini,
27 habwo kuba íiwe toligunagilana omwooyo gwaanze omukuzimu,
na kaandi tokukuunda omubili gwaanze guzuúnde, iinye omutakatíifu wáawe wo olikusoombookelwa.
28 Waanyoleka emihaanda zo obulami,
nonyizuza amanulilwa, habwo kuba oli héehi neenye.’c”
29 Peétero yaazeendelela kugaamba, “Beene béetu, niinhicha kubagaambila ha kugima nkokwo isiichweénkulu Daudi akafwa, yaazikwa, ne eémbi yoómwe echaali eliho áaha kuhicha leélo. 30 Náho Daudi akaba ali omubáasi, na akamanya nkokwo Múungu akamweésagiza ha kulahila nka nikwo, alyaámukola omuuntu oómo wo kuluga omulugaanda lwoómwe kwiikala ahachitebe chi ikuzo lyoómwe. 31 Daudi akasoombookelwa amagaambo áago nigabáho gata niho akagaamba ha bwo kuzooka kwo óogwo Masiyad nka nikwo, talalekilwe omukuzimue nali omubili gwoómwe tigulazuunzile. 32 Óogwo Yeézu, Múungu akamuzoola kuluga omubafwiile, ne éechwe twéena ni baalubona bo okuzooka óokwo. 33 Múungu yaamuha Yeézu ikuzo liháango no kumuta héehi náze olubazu lwo omukóno gwe gwo obulyo. Nawe Yeézu yaayanaankula kuluga hali weényini Táata, óogwo Omwooyo Mutakatíifu óogwo yaatweésagiize, nawe yaátuseeseliile. Éecho nicho mulikuleeba obu no okuhulila. 34 Kuba Daudi weényini talasutukile no okuzeenda omwiigulu, náho akagaamba,
‘Omukáma Múungu akamugaambila Omukáma wáanze:f
Oyikale olubazu lwaánze lwo obulyo,
35 kuhicha nkukole obasíinge ababisa báawe
nko kubakola kuba echitebe cha amagulu gaawe.’g”h
36 Peétero akamala ha kugaamba, “Habwéecho, Abaizilaeli bóona nibeendelwa bamanye aha mazima nkokwo: Múungu yaamukola óogu nyini Yeézu kuba weényini Masiya no Omukáma, óogu, íimwe mukamubaamba aha musalaba.”
37 Abaantu áabo, kábaahuliile amagaambo áago, gaábachumita bwooli omumiganya yáabo. Baámubuuza Peétero ne entumwa bazeenzi boómwe, “Beene béetu, óobu tuzilého tuta?” 38 Peétero yaábagaambila, “Buli oómo weenyu ahuungame ebiheno byoómwe, no kubatizwa ahi izíina lya Yeézu Kristu, mubóne kuganyilwa ebiheno byéenyu. Neemwe nimwiinaánkula obuhicha bwa Omwooyo Mutakatíifu. 39 Múungu akatweésagiiza endagano éezi ha bwéenyu, na abaana béenyu, na ha baandi bóona áabo abali hala óokwo, kuba bóona áabo abalikwéetwa no Omukáma wéetu Múungu weényini.”
40 Peétero yaazeendelela kubagaambila áabo baantu amagaambo agáandi meenzi go kubaneémbelela omukubagumisa omuganya hakugaamba, “Mchuungulwe kuluga omuluzaalo óolu oluhugéene lwa abatakutegezwa!” 41 Habwéecho, bóona abayanaankwíile echigaambo choómwe Peétero, bakabatizwa. Echilo éecho abaantu bo kuhika ebihuumbi bisatu baaba baayoongelwa omubaheemba abaandi.
Obumo Bwa Abaheémba Ba Yeézu
42 Abaheémba bakazeendelela omukweéyega ebyeégeso bye entumwa za Yeézu. Beékala omubumo bwo Omwooyo, baaba nibamenyula omukaate,i no kumusaba Múungu hamo. 43 Entumwa áabo bakaba nibakola emanyiso na amahano meenzi, mpaka abaantu bóona baaba beétimwa. 44 Abeekiliza bóona bakakoba ahaantu hamo, omukukobela buli chiintu chóona éecho bakaba beenacho hamo. 45 Bakaba nibaguza ebiintu byáabo ne empilya éezo baabonesíze, bakazigabana, kwiinganisa no okweenda kwa buli oómo okwo kuli. 46 Buli chilo bakazeendelela kubugana omulubúga lwe éenzu ya Múungu. Bakaba nibamenyula omukaate omumaka gáabo, no kulya hamo ha manulilwa no omuganya gulikwéela. 47 Bakaba nibamukuza Múungu no kunulilwa omuumbabazi za abaantu bóona. Na buchiile, Omukáma yaaba naaboongela abaantu abaandi omuumbaga ya áabo abaabele nibachuungúlwa.