Peétero Naachiza Omulema Ahi Izíina Lya Yeézu
3
1 Echilo chimo, Peétero na Yohana bakaba nibazeénda aha Nzu ya Múungu kusaba. Akáanya áako zikaba zili esaha mweenda za nyemisana. 2 Omuunzu ya Múungu óomwo, akaba alimo omuuntu, omulema óogwo akaba naayimuchwa na abaantu héehi no omulyaango ogulikwéetwa Muzima. Akaba ali omulema kuluga hakuzáalwa kwoómwe na buli chilo akaba atwáalwa óokwo, abone kusaba empilya ha baantu áabo bakaba nibatáaha omuunzu ya Múungu. 3 Omuuntu óogwo káyaababweene Peétero na Yohana beélilila kutaaha omuunzu ya Múungu, yaabasaba bamuhe empilya.4 Áaho Peétero na Yohana baamutukuliza améeso, niho Peétero yaámugaambila, “Otuléebe íichwe!” 5 Yaábaleeba, kunu naayetegeza nkokwo bakaba beene echiintu cho kumuha.
6 Náho Peétero yaámugaambila, “Tinyina efeezaa nali ezaháabu, náho echinyinacho, nicho ndikukuha. Niinkugaambila ahi izíina lya Yeézu Kristu Omunyanazaléeti, yemeelela, olibate!” 7 Peétero yaámukwaata óogwo omuuntu omukóno gwo obulyo, yaamweémeeleza. Áaho nyini amagulu ne enfuundo zoómwe byaaba na amagala. 8 Yaáyemeelela bwaangu no kuguluka, yaabaanza kulibata weénka. Yaataha omuunzu ya Múungu hamo na Peétero na Yohana, kunu naalibata no kugulukaguluka naamukuza Múungu. 9 Abaantu bóona baámubona naalibata no kumukúza Múungu. 10 Baámumanya nkokwo niwe óogwo nyini ayaabele naayikala no kusabiliza aha mulyaango ogulikwéetwa Muzima gwe éenzu ya Múungu. Bóona bakeekaangwa no kusobelwa bwooli kuleeba echigaambo éecho echamweésulukiize.
Peétero Náabeegesa Abaantu Habwa Yeézu
11 Obuchilo óobwo, omuuntu óogwo ayaachilizwe akaba naaboomelela Peétero na Yohana. Abaantu bóona baábelukiilila nibasobelwa bwooli. Ahaantu áaho Peétero na Yohana bakaba bali hakaba niheétwa Itegekelo ya Selemani.
12 Obuchilo Peétero yaababweene abaantu áabo, yaábagaambila, “Abaantu ba Izilaeli bazeenzi baanze, hali chiíha éebyo nibibasobela? Habwaáchi nimututukuliza améeso? Nimuzila múti óogu muuntu naalibata ha buhicha bwéetu, nali habwo kuba íichwe nitutuúla nkokwo Múungu alikutweéndeza? 13 Mmahi! Tí bityo. Óobu Múungu wa be isiichwe, Ibrahímu, Izáaka, na Yakobo, yaámukuza omuhalila woómwe Yeézu. No óogwo Yeézu niwe óogwo íimwe nyini mwamusohweeze achwaaziikilwe okufwa omukumunoba! Noobu obuchilo Pilato akaba ayeenzile amulekulile Yeézu azeende, mukamwóoga, 14 mwaamusaba Pilato nkokwo omwiisi achiingulilwe no kuleka weényini. Mukamwóoga Yeézu Omutakatíifu owe Entuungwa Nzima Omuméeso ga Múungu. 15 Mukamwiíta weényini ali obutaandikilo bwo obulame! Náho Múungu akamuzoola kuluga omubafwiile, ne éechwe ni baalubona bo okuzooka kwoómwe. 16 Omuuntu óogwo mulikubona áaha, nimumumanya kuzima. Weényini yaachizwa ha muhaanda gwo okwiikiliza omwiizíina lya Yeézu. Éelyo izíina, hamo no kumwiikiliza weényini, niyo ensoonga yaabele no kuchila, nkokwo mulikubona okwáali.
17 “Óobu beene béetu, éebyo byóona éebyo mwaamukoliile Yeézu, íimwe na abatwaáliliza béenyu, nimumanya nkokwo mukakola habwo butasoombookelwa. 18 Náho, aha muhaanda óogwo Múungu akahikiíliza amagaambo áago yaabáasize ha muhaanda gwa ababáasi boómwe bóona nkokwo, Masiyab woómwe naayagalazwa. 19 Habwéecho, muhuungame ebiheno byéenyu, mumuhiindukile Múungu, niho weényini ayiheho ebiheno byéenyu, bubone kwiiza obuchilo bwo kuhuúmuzwa habwo kubaho kwoómwe Omukáma. 20 Hamuhaanda óogu, Múungu alaaba naabachuleéza no kubagumya emyóoyo kuluga ha mukáma, naasiindika Yeézu hali íimwe. Weényini niwe Masiya, Omuchuunguzi óogwo Múungu yaámutoolize ha bwéenyu íimwe kuluga habubaandizo. 21 Ni lwaampaka Yeézu asigale omwiigulu mpaka obuchilo Múungu akole ebiintu byóona lugulu bibe bisha, nkokwo yaagaambile kuluga kala ha muhaanda gwa ababáasi boómwe abatakatíifu.
22 “Kuba, Musa akagaamba, ‘Omuli íimwe badugu, Omukáma Múungu weenyu alyaábaleétela omubáasi nke enye. Muhuliilize kuzima buli chigaambo éecho alibagámbila. 23 Omuuntu weéna wéena óogwo alileka kumuhuliliza óogwo omubáasi, alyaáchiindikwa mazima na abaantu ba Múungu.’c 24 Noobu ababáasi bóona, kubaandiza Samweeli na abáandi áabo abakulatiileho, bakabáasa amagaambo ge ebilo éebi. 25 Íimwe muli abaana ba ababáasi, kaandi mulimo omundagano éezo Múungu yaakozile na baguúku béenyu. Múungu akamwiisagiza Ibrahímu, ‘Kuluga omuluzáalo lwáawe ndyaáfuuha engaanda zóona omúunsi’ 26 Múungu kayaamukulize omuhalila woómwe Yeézu, obwaámbele akamsiindika hali íimwe, niho abafúuhe ha kubahiindula buli oómo kuluga omubiheno byoómwe.”