Peétero Na Yohana omu Itegekelo Ya Balusiingo Ba Abayahudi
4
1 Obuchilo Peétero na Yohana bakaba niboolekeelela abaantu áabo, abagabe ba Múungu, na Abasadukayo,a na mukúlu wa abalwaanila ngoma be éenzu ya Múungu baabeezaho. 2 Beeza basaayile bwooli, habwo kuba Peétero na Yohana bakaba nibabeegesa abaantu nibabaatulila nkokwo, hali Yeézu heena okuzooka kwa abáfwiile kwiingana no kuzooka kwoómwe. 3 Habwéecho, baábakwáata Peétero na Yohana. Baábachiíngila omwiibóhelo mpaka nyeéncha eémo, habwo kuba hakaba hali olweébazo. 4 Noobu bityo, béenzi abaahuliile echigaambo cha Peétero na Yohana bakeekiliza, mpaka okubalwa kwa abakwaáta boónka áabo abakeekiliza Yeézu kwaahika ebihuumbi bitáanu biti.5 Nyeénchemo, echilo cha kabili, abategeki, abanyaampala, na abeégesa be ebilagilo baákoba áaho Yeruzaléemu. 6 Áahagáti ya abaantu áabo, bakaba balimo mukúlu wa bagabe ba Múungu, Anasi hamo na Kayafa, Yohana, Alekisanda, na abáandi áabo bakaba bali bo lugaanda lwa Anasi. 7 Baalagila Peétero na Yohana baleetwe, baábemeleza omuméeso gi Itegekelo ya Balusiingo, baábabúuza omukugaamba, “Áago gi mukozile, mugakozile ha buhicha chi, nali ahi izíina lyo oóha?”
8 Áaho Peétero aiyizwiile obuhicha kuluga Omwooyo Mutakatíifu yaábasubiza, “Abategeki na abanyaampala! 9 Keélaaba leélo nimutubuúza amabuuzo habwo kuba tumuhweéliile omuuntu óogu akaba ali omulema, na nimutubuuliliza nka nikwo yaachizwaaho, 10 mbweenu, íimwe mwéena, hamo na Abaizilaeli abáandi bóona, mumanye éebi. Niinyeénda mumanye ha mazima nka nikwo óogu ayemeeliile omuméeso géenyu yaábeele no bulami ha buhicha bwi izíina lya Yeézu Kristu Omunyanazaléeti. Óogwo niwe íimwe mukamubaamba, náho Múungu akamuzoola kuluga omubafwiile. 11 Niwe óogwo Amaandiko Amatakatíifu nigagaámba nka nikwo, weényini ni ‘Ibáale éelyo mukáanga íimwe aboómbeki, nilyo lyáaba ibáale likulu lyo oluhazo.’b
12 “Obuchuúnguzi nibubonwa kuluga hali weényini weénka, Yeézu Kristu! Kuba mazima tihaliho izíina eliindi iífo yi igulu éelyo baheélwe abaantu kubachuúngula, obuchuúnguzi bwéetu ni lwaampaka buluge ahi izíina éelyo lyoónka.”
13 Balusiingo áabo kabaábweene nkokwo Peétero na Yohana baágaamba no obugimi, na nkokwo áabo na abaantu batyo kwoónka bateena echisomo, niho baábasobelwa bwooli. Baábaanza kumanya nka nikwo Peétero na Yohana baábeele hamo na Yeézu ha mwaanya. 14 Náho, habwo kuba balusiingo áabo bakaba nibamuleeba omukwaáta óogwo akachízwa ayímeeliile áaho ali hamo na Peétero na Yohana, tibalabeele ne echigaambo cho kugaamba. 15 Bityo, baábazema Peétero na Yohana basohole omu itegekelo éezo. Boónyini baasigalámo nibehanuuza 16 no kweébuza baáti, “Tubazileho tuta abaantu áaba? Abatúuzi bóona ba áaha Yeruzaléemu nibamanya nkokwo baákola emanyiso zi ihano, na titukuhicha kulyóoga. 17 Náho tubone kwaángila echigaambo chitaákuzeendelela kusaágiliza kusaámbaala omubaantu, ni kuzima tubaángile abaantu áaba balekelele kugaamba kaandi no omuuntu weéna wéena ahi izíina lya Yeézu.”
18 Niho áabo balusiingo baábeeta Peétero na Yohana. Baábagaambila bataleengesa kweégesa nali kugaamba kaandi aha bwi izíina lya Yeézu. 19 Náho Peétero na Yohana baábagaambila, “Mulamule íimwe nyini, kabilaaba na mazima omuméeso ga Múungu kubakoondokela íimwe kuchila Múungu. 20 Íichwe titukuhicha kuleka kugaamba habwe ebigaambo éebyo twaabweene no kuhulila!”
21-22 Peétero na Yohana kabaagaambile baáti, balusiingo áabo tibalabweene omuhaanda gwo kubachwaáziika, habwo kuba abaantu bóona bakaba nibamukuza bwooli Múungu ha bwe emanyiso yi ihano éelyo. Bakaba nibamanya nkokwo omuuntu óogwo ayaáchizwa akaba ali omulema ha mwaanya gwe emyáaka makumi aána no obusáago. Habwéecho balusiingo baábahana kaandi Peétero na Yohana aha busaaye buháango, baábalekulila bazeénde.
Abeekiliza Ba Yeézu Nibamusaba Múungu Abatemo Obuhicha
23 Peétero na Yohana, obuchilo bakakomoololwa, baásuba ha beekiliza bazeenzi báabo. Baábasoomboolela amagaambo góona áago baagaambiilwe na abakulu ba bagabe ba Múungu hamo na abanyaampala ba Abayahudi. 24 Na abaantu áabo kábaahuliile amagaambo áago, bóona hamo baáteelana omukumusaba Múungu nibagaámba, “Íiwe Omukáma, íiwe níiwe omutégeki mukúlu wa byóona. Íiwe okahaanga igulu, ne éensi, ne enziba, na byóona ebilimo. 25 Íiwe okagaamba ha muhaanda gwo Omwooyo Mutakatíifu, kulabila ha kanwa ke isiichwe Daudi, omuhalila wáawe,
‘Habwaáchi Abanyamahaánga nibasáaya bwooli,
kaandi, na abaantu nibateekuza ebiteena mugaso?
26 Abakáma be éensi na abategeki baákobile hamo,
babone kumwaanga Omukáma, no kumwaanga Masiyac woómwe.’d
27 “Na amagaambo áago gaábeleho gati. Omumuzihwa óogwo Herode na Pontio Pilato bakabugana hamo na Abanyamahaánga na Abaizilaeli, babone kumwaanga Yeézu, omuhalila wáawe omutakatíifu óogwo waamutoólize. 28 Boónyini baákola áago kuluga obuhicha bwáawe no okweenda kwáawe óokwo okaba olamwiileho gakolwe kuluga ahabubaandizo. 29 Omukáma, okuleebe okulamula kwáabo kubi. Otuhe obuhicha, íichwe abahalila baawe, kugaamba echigaambo chaawe ha bugimi buháango. 30 Golola omukóno gwaawe obóne kuchiza abaantu, no kukola amahano ne emanyiso ha muhaanda gwi izíina lya Yeézu, omuhalila wáawe mutakatíifu!”
31 Obuchilo baamazile kumusaba Múungu, ahaantu áaho baabele bakobile haáchuundagulika. Nabo bóona beezuzwa obuhicha kuluga Omwooyo Mutakatíifu, baabaanza kweégesa abaantu echigaambo cha Múungu ha bugimi.
Abeekiliza Nibakobela Ebiintu Byáabo Hamo
32 Abeekiliza bóona bakaba béene obúmo ha mateékuzo na ha chihika. Taliho omuuntu óogwo akatoonga noolu echiintu chimo nka nikwo ne cha weényini weénka, náho bakakobela hamo byóona éebyo baabele beenábyo. 33 Entumwa ba Yeézu bakaba nibabagaambila obuboni abaantu ha buhicha bwiinzi aha mpola za nka nikwo, Omukáma Yeézu azoókile. Múungu akaba naabaha bóona embabazi yoómwe mpaango. 34 Kuba talabeeleho omuuntu weéna wéena omuli áabo óogu ayalebesize echiintu. Ha kuba abaantu bóona áabo abaabele beene amasaambo nali éenzu bakabiguza, empilya baazita omumagulu ge 35 entumwa. Éezo mpilya entumwa baazigabila abaantu, kwiingana no okweendaho kwa buli muuntu.