Obugóbya Bwa Anania Na Safira
5
1 Hakaba heeno omuuntu, izíina lyoómwe Anania. Mukazíwe akaba naayetwa Safira. Boónyini bakaguza ensaambu yáabo. 2 No kuluga empilya éezo baabonesize, Anania akeehaho empilya eziindi yaáziseleka habwa weényini. Mukazíwe akaba ayikililizéene nawe kukola aátyo. Empilya éezo ezasigéele, Anania yaazileta yaabaha entumwa ba Yeézu.3 Náho Peétero yaámugaambila, “Íiwe Anania! Habwaáchi Izimu Elikúlua lyaategeka omuganya gwaawe, mpaka kugaamba ebisuba ha Mwooyo Mutakatíifu? Habweeseleke waayebiikila ensaága ye empilya éezo obweéne ha kuguza ensaambu yaawe. 4 Otakaligulize libele litali echiintu chaawe, tíkwo? Noobwo obele waágulize, empilya zibeele zili omubuhicha bwáawe kuzikoza okwoólikweenda. Habwaáchi waalamula kukola echigaambo nke éechi? Tiwaábeeha muuntu, waagaambila Múungu ebisuba!”
5 Obuchilo Anania yaahuliile éebyo bigaambo bya Peétero, yaagwa ahaansi, yaáfwa. Bóona áabo abaahuliile ebigaambo éebyo bya Peétero bekeeganya bwooli. 6 Abasigazi beeza baasweekelela omubili gwoómwe ne esuúka, baamusohoza ahéelu, baámuziika.
7 Kahaabaliile ha mwaanya gwe esaaha isatu zíti, muka Anania nawe yaataaha omuchiséenge éecho, atéena kumanya amagaambo áago agaagwa. 8 Peétero yaámubuuza, “Hoonasi! Ngaambila, mugulize ensaambu yéenyu ha mpilya éezi?” Yaámusubiza, “Éego! Tugulize ha ndeengo éezo!” 9 Peétero yaámugaambila, “Habwaáchi íiwe na balo mweekiliza kumuleengesa Omwooyo Mutakatíifu gwo Omukáma? Leeba! Abasigazi áabo abaázeenda kumuziika balo, baasuba, óobu balyáaho ahachisasi, nibataahámo kukutwaala íiwe ahéelu óobu nyini!”
10 Ahonyini Safira nawe yaagwa ahaansi omumagulu ga Peétero, yaáfwa. Niho abasigazi baataahámo, baasaanga Safira nawe yaáfwiile. Baagusohoza ahéelu omutuumbi gwoómwe, baáguziika héehi neéba. 11 Amagaambo áago gaásaambaala omukelezia, beétimwa bwooli, hamo na abáandi bóona áabo abaahuliile empola éezi.
Entumwa Ba Yeézu Nibakola Amaleeba Meenzi
12 Éezo entumwa za Yeézu bakaba nibakola emanyiso na amahano meenzi omubaantu. Na abeekiliza ba Yeézu bóona bakaba bakoba hamo omuunzu ya Múungu, omu Itegekelo Ya Selemani ha ensoonga eémo. 13 Omuuntu weéna wéena oóndi óogwo akaba atali omwiikiliza akatiina kuteélana nabo. Náho, abaantu béenzi bakabakoondookela. 14 Nabo abáandi, abakwaáta na abakazi, bakamwiíkiliza Omukáma, bityo obukumi bwa abeekiliza bukaba nibweeyoongela bwooli.
15 Habwa amahano ge entumwa, abaantu bakaba nibabasohoza abalwéele ahéelu nibabatwaála kubalyaámika omumihaanda. Óokwo bakaba nibababyaamika aha bitabo ne mikéeka, kubona obuchilo Peétero naahiingula, echimunyamunya choómwe chibone kubakuumya abaandi omuli áabo, bachile. 16 Abaantu beenzi bakahika kuluga omumizihwa éezo engeégeelo ya Yeruzaléemu, nibabaleéta abalwéele báabo, na áabo abaabele batuungamilwe na amazimu. Bóona bakachízwa.
Entumwa Za Yeézu Nibaagalazwa
17 Omugabe omukúlu wa Múungu, na bazeenzíbe bóona áabo bakaba bali Abasadukayo,b bakazila ichubi bwooli habwe entumwa za Yeézu. 18 Habwéecho, baábakwáata entumwa éezo, baábachiíngila omwiibóhelo mpaango. 19 Náho omuchilo óomwo maléeka oómo wo Omukáma yaáchiingula emilyaango ye éenzu éezo, yaabasohoza ahéelu. Mala yaábagaambila, 20 “Muzeénde kweémeelela Omulubúga lwe éenzu ya Múungu, mubagaambile abaantu amagaambo góona ha bwo obulami óobu obusha!” 21 Entumwa éezo kábaahuliile éebyo, baábikoondookela, baazeenda omulubúga lwe éenzu ya Múungu enchaákala yo mulutulutulu, baabaanza kweégesa abaantu óomwo.
Obuchilo óobwo nyini omugabe mukúlu wa Múungu, hamo na bazeenzíbe áabo, bakabalaálika Itegekelo Ya Balusiingo Ba Abayahudi, nikwo kugaamba embága yoona ya abakulu ba Abayahudi, babugane. Baasiindika abaantu omwiibóhelo, babone kubaléeta entumwa éezo. 22 Náho obuchilo baatahilemo óomwo, baasaanga éezo entumwa tibalimo. Baasuba basohoza empola nkokwo, 23 “Obuchilo twaahika omwiibóhelo, twaasaanga emilyaango echiingile kuzima, na abachúungi beémeeliile ahéelu ye emilyaango nibachuúnga. Náho obuchilo twaáchiingula emilyaango, titwaámusaangamo omuuntu weéna wéena óomwo omugati!” 24 Omukúlu wa abachuungi na abagabe bakulu ba Múungu kábaahuliile éebyo baaba no kutahwaatahwa omukweébuuza, “Amagaambo áaga gaabaho gata?”
25 Mala omuuntu oómo yeeza, yaábagaambila, “Munhuliilize! Áabo baantu abo mubeele mubohile, óobu nyini balimo omugati omulubúga lwe éenzu ya Múungu! Nibeegesa abaantu!” 26 Niho óogwo mukúlu wa abachuungi, hamo na abachuungi boómwe, baazeenda ha lyéezo ntumwa, babaleéta. Náho tibalabakwaásile lwa mpaka, habwo kuba bakatiina nkokwo abaantu bakaábatiile na amabaale.
27 Baábebeembelela omu Itegekelo éezo ya Balusiingo, baábemeeleza omuméeso ga bóona. Omugabe mukúlu wa abaantu na Múungu yaábagaambila, 28 “Tubaangiíze bwooli nkokwo mutabeégesa abaantu ha bwi izíina lyo omuuntu óogwo! Náho nimuzeendelela kweégesa abaantu empola zoómwe omuumbazu zóona za Yeruzaléemu, nimugaámba nkokwo kufwa kwoómwe kwaaletelelwa neechwe.”c
29 Peétero hamo ne entumwa bazeenzíbe baábagaambila, “Chikwiílwe tumukoondookela Múungu, kuchila kukoondookela abaantu! 30 Íimwe mukamwiita Yeézu ha muhaanda gwo kumubáamba aha musalaba, náho Múungu wa baguúku béetu akamuzoola. 31 Yaámweemeeleza óogwo no kumuhanamika echitebe ha kumuta olubazu lwoómwe lwo obulyo, aábe Omutegeki no Omuchuúnguzi, ahiche Abaizilaeli Baléke ebiheno byáabo, baganyilwe. 32 Íichwe ni baalubona be éebyo byóona, na kaandi Omwooyo Mutakatíifu ni lubona. Weényini niwe óogwo Múungu yaátuheele íichwe abeétegeeleza boómwe.”
Obuhanuuzi Bwa Gamalieli
33 Obuchilo balusiingo áabo kábaahuliile éebyo, baásaaya bwooli, bakaba nibeénda kubéeta áabo entumwa. 34 Náho omu Itegekelo éezo, hakaba heena Omufalisayo oómo, izíina lyoómwe Gamalieli. Gamalieli óogwo akaba ali omweégesa we ebilagilo, akaba naakuzwa na abaantu bóona. Akemeelela, yaalagila nkokwo entumwa basohozwe ahéelu ha mwaanya mugufu. 35 Mala yaábagaambila balusiingo bazeenzíbe, “Abakwaáta ba Izilaeli, mweétegeeleze echigaambo éecho mulikweenda kukola ha baantu áaba! 36 Nimwiizuka ebilo éebyo ebihiingwiile, akaba aliho omuuntu, izíina lyoómwe Theuda. Theuda óogwo akaba naayebuga nkokwo no omuuntu mukúlu, na abaantu magana aána báti baahulilana náze. Náho omuheleeluko, akeetwa, na áabo bóona áabo abamukulaatiile bakasaámbáala. Emilimo záabo zóona, záaba busa. 37 Kaandi, ahakulatiileho, obuchilo óobwo abaantu bakaba nibapéetwa, akabaho omubisa oóndi. Óogwo akaba ali Omugaliláaya, izíina lyoómwe Yuda. Akababeeha abaantu bamukulaatile, náho nawe akafwa, na bóona áabo abamukulaatíile bakasaámbaala. 38 Mbweenu óobu niimbahanuuza, mubaleke abaantu áaba! Mutaákubakolela choóna chóona, kabilaaba omuhaanda gwáabo na byóona éebyo balikukola ne bye chimuuntu kwoónka, nibihwáaho byoónyini. 39 Náho kabilaaba éebyo ne emilimo za Múungu, timukuhicha kubaángila áaba, nimwisaánga nimumwaánga Múungu weényini.”
Bityo, okulamulwa óokwo kwa Gamalieli, áabo bazeenzíbe baákwiikiliza. 40 Baábeeta entumwa kusuba omu itegekelo. Baalagila bateélwe ensáanzud bwooli. Male baábaangila nka nikwo balekelele kubagaambila abaantu empola omwiizíina lya Yeézu, baábalekulila bazeénde.