Baátozibwa Abahweezi Musaanzu
6
1 Ebilo éebyo, obwiinzi bwa abaheémba ba Yeézu bukaba nibuzeendelela kukanya. Omuli áabo hakaba heena Abayahudi áabo abagaambile olulimi lwe Echiyunani, na Abayahudi bazeenzi báabo áabo abagaambile olulimi lwe Echiebrania.a Áabo abaabele nibahooya Echiyunani bakabadugulumila Abayahudi abo olulimi lwe Echiebrania nka nikwo, tibalabasaasilwe abakazi báabo abakaambwiile omukubabaganisiza ebyookulya bya buli bucha. 2 Habwéecho entumwa ikumi na bábili baábakobyaakobya abaheémba bóona, baábagaambila, “Tí kuzima íichwe tuleke kweégesa echigaambo cha Múungu habwo kugabila abaantu ebyookulya. 3 Habwéecho, beene béetu, mutoóze abakwaáta musaanzu omuli íimwe áabo abalikumanyíika nkokwo beezwíile obuhicha kuluga Omwooyo Mutakatíifu no kweétegeeleza. Áabo nitubaha omulimo óogu, 4 tubone íichwe kuguma kumusaba Múungu no kuchiheéleza omubaantu echigaambo choómwe.”5 Okulamula óokwo kwaábanulila abaheémba áabo bóona. Baátooza Stefano, omuuntu óogwo ayizwiile Omwooyo Mutakatíifu no owo okwiikiliza kuháango. Kaandi baábatooza Filipo, Porokoro, Nikanori, Timoni, Parimena, na Nikolao wa Antiokia,b óogu ayaahiindukile no kukulaatila okwiikiliza kwa Abayahudi. 6 Baábaléeta abakwaáta áabo omuméeso ge entumwa, nabo baábasabila nibabateélaho emikono halugulu yáabo.
7 Ne echigaambo cha Múungu chaásaambáala. Okupeetwa kwa abaheémba kweeyoongela bwooli omuli Yeruzaléemu, ne embága mpaango ya abagabe be Echiyahudi baakoondóokela óokwo kwiikiliza.
Okukwaatwa Kwa Stefano
8 Múungu akaba namuha Stefano embabazi bwooli no obuhicha bwiinzi, yaaba naakola amahano maháango ne emanyiso abaantu. 9 Náho abaandi omuBayahudi bakaleengesa kuhakana nawe. Áabo bakaluga omuunzu yo mukobo eya Abayahudi éezo eyaayesilwe Éenzu ya Abaantu Bokwiiyagaalula.c Abaandi omuli áabo bakaluga omumuzihwa gwa Kurene no omuli (omumuzihwa gwa) Alekisaandilia, na abáandi bakaluga omuchaalo cha Kilikia, ne ya Asia. Abayahudi áabo baaba nibehanuuza na Stefano, 10 náho yaaba naabasiínga ha kugaamba amagaambo go kweétegeeleza ha buhicha bwo Omwooyo Mutakatíifu.
11 Niho baasunika abaantu bunaanka bweeseleke, babone kugaamba ebisuba nkokwo baámuhulíile Stefano naamuzuma no kulyoogooza kubi habwa Musa na Múungu. 12 Ha kugaamba éebyo, baábasunika bwooli abaantu, hamo na abanyaampala ba Abayahudi na abeégesa be ebilagilo. Áabo baamuzáho Stefano, baámukwaata, baámutwáala omu Itegekelo Ya Balusiingo Ba Abayahudi. 13 Baaleeta baalubona be ebisuba, áabo baágaamba ebisuba habwa Stefano, nibagaámba, “Ebilo byóona óogu muuntu naagaamba amagaambo mábi habwe éenzu éezi Entakatíifu ya Múungu, na habwe ebilagilo bya Musa! 14 Ha kuba tumuhuliile naagaámba nkokwo, Yeézu Omunyanazaléeti naakaambula éenzu éezi ya Múungu, no kuhiindula entuungwa éezo twiinaánkwiile kuluga hali Musa.”
15 Abaantu bóona omu Itegekelo éezo ya Balusiingo bakeekala bamutukuliize améeso Stefano, bakabona obuso bwoómwe bwaásusana nko obuso bwa maléeka.