Yeézu Yaázooka
(Mariko 16:1-10; Luka 24:1-12; Yohana 20:1-10)
28
1 Ne echilo cha Sabato kichahiíngwiile, omulucheelelelwa echilo cha mbele cho obwooyo, Mariamu Omunya Magidala hamo na Mariamu oóndi óogwo, baazeenda kuleeba eémbi.2 Ahonyini, chaaba echiteengeto chiháango che éensi, habwo kuba maléeka wo Omukáma Múungu akahanaantuka kuluga omu igulu, yeelilila aha eémbi, yaálihiliingisiza ibáale éelyo halubazu, yaálikalila ahalugulu yaályo. 3 Akaba naayeengelela nko olulabyo lwe enkuba, ne emyéenda yoómwe ekaba neeyéla pee! 4 Obuchilo abalwaanila ngoma áabo baabweene áago, baámutiina bwooli óogwo maléeka baaba abalikuzuguma, baagwa baaba nka abaafwiile.
5 Áaho, maléeka óogwo yaabagaambila abakázi áabo aáti, “Mutatiina! Niinsoombookelwa nka nikwo mweeza kumuloondela Yeézu óogwo ayabáambilwe aha musalaba. 6 Taliho áaha! Yaázoolwa kuluga omu bafwiile, nkóokwo yagaambile. Mwiíze mulole áaho bakaba bamulyaamikile. 7 Óobu, muzeénde bwaangu, mubagaambile abaheémba boómwe nka nikwo, ‘Yaázoolwa kuluga omu bafwiile, naabebeembelela kuhika omuli Galiláaya. Óokwo nikwo áaho mulamusaánga!’ Óobu, naágaamba éecho neeza kubasoomboolela!”
8 Niho abakázi áabo baalugáho bwaangu kuluga aha eémbi áaho nibeeganya no okuba na manulilwa maháango. Beéluka kuzeenda kubasoomboolela abaheémba ba Yeézu áago maléeka akabagaambila. 9 Leeba, Yeézu yaabugana nabo yaabaangalucha, “Nimbasuula!” Abakázi áabo, bamwiililaho, baahika nibamugwa omumagulu, baaba nibagakwaáta, nibamulámya. 10 Niho Yeézu yaábagaambila aáti, “Mutatiina. Muzeénde mubagaambile badugu baanzea bazeénde óokwo Galiláaya, óokwo niho baansaánge.”
Abalebelezi Be Eémbi Ya Yeézu Nibagaámba Ebisuba
11 Mbweenu, obuchilo abakázi áabo kabaabele nibazeénda omumuháanda, omuli áabo abalwaanila ngoma abaabele nibaliínda eémbi ya Yeézu baalugáho áaho no kuzeenda omu chikaali cha Yeruzaléemu. Obuchilo kábaahikile, baáfumoolela abakúlu ba abagabe góona áago agaagwa.
12 Niho abakúlu ba abagabe áabo baáyekobya hamo na abanyaampala ba Abayahudi, baábiteélana no kulamula nkookwo balaakola. Niho baábahéela abalwaanila ngoma áabo empilya nyiinzi. 13 Baábagaambila báti, “Kabilaaba omuuntu weéna wéena nababuúza habwa áago agaagwa, mugaámbe nka nikwo, ‘Itúumbi obuchilo íichwe tukaba tuli omutúlo, abaheémba ba Yeézu bakéeza baayíiba omutúumbi gwoómwe.’ 14 Buzima, noobwo Pilato alaahulila áago magaambo, íichwe nituhooya náze mutaákwiiza mukaza omu lwaágalalo.” 15 Niho abalwaanila ngoma baayanaankula empilya na baazendelela omumutégeko nko óokwo baayegesizwe na abanyaampala ba Abayahudi. Amagaambo gáabo ge ebisuba gaásaambaala bwooli omu Bayahudi, na gaagumaho kuhicha leélo.
Ebilagilo Byo Aha muheleeluko Bya Yeézu Aha Abaheémba Boómwe
(Mariko 16:14-18; Luka 24:36-49; Yohana 20:19-23; Amakúlu ge Entumwa 1:6-9)
16 Abaheémba ba Yeézu ikumi no oómo baázeenda Galiláaya omu ibaanga éelyo Yeézu yaabalagiile. 17 Óokwo baamusaangayo. Obuchilo kabamubweene, baámulamya, náho omuli boónyini abáandi baaba no okugomwa gomwa nka nikwo ni Yeézu. 18 Mbweenu Yeézu akabeélilila, yaábagaambila aáti, “Múungu ampeele obuzizi bwóona bwo omu igulu no bwo omuunsi. 19 Ha bwéecho mbweenu, nimuzeénde omu banyamahaánga bóona no kuboólekeelela babe abaheémba baanze. Muzile mútyo aha kubabatiza omu izíina lya Táata, ne lyo Omwaana ne lyo Omwooyo Mutakatíifu. 20 Nimubeegese kweékomya byóona éebyo nabalagiile íimwe nyini. Mwiizuke, íinye niímba mbaliho neemwe ebilo byóona, kuhicha omuhelo gwe éensi.”