Yeézu Naazóoka
(Matayo 28:1-10; Mariko 16:1-8; Yohana 20:1-10)
24
1 Obuchilo bwo omulucheelelélwa echilo cha Habwooyo, abakazi áabo baazeenda ahaámbi. Bakaba beemukize emizeeze éezo baaloongíze. 2 Ne éelyo ibáale liháango likaba lichiingile eémbi, baálisaanga lyaáhiliingisiibwe ahaampélo. 3 Niho, baataahámo omugati. Náho baasaanga omutúumbi gwo Omukáma Yeézu, gutalimo.4 Echigaambo éechi chabaha etega téga bwooli. Akáanya bachaáyagalala baáti, ahonyini héehi nábo, baáyemeelela abakwaáta bábili, bazweele ebizwáalo bilikweela pee! 5 Abakazi áabo, kabaabweene éebyo, baakwaatwa obutíini buháango. Beénama, mpaka kuhicha obuso bwáabo ahaansi.
Náho, abakwaáta áabo baábagaambila, “Kanimuloonda ali mwooyo aha bafwiile? 6 Taliho kaandi áaha! Yaázokile! Ngási, timukwiizuka áago magaambo yaabagaambíile obu akaba acháali Galiláaya, 7 ‘Omwaana wo Omuuntu, ni lwaampaka asohozwe omuungalo za abaheni, na nibamubaámba aha musalaba. Noobu bityo, echilo cha kásatu, naazóoka!’ ” 8 Abakazi áabo, bageezuka áago magaambo ga Yeézu.
9 Habwéecho, baalugáho ahaámbi. Baazeenda kugagaamba áago góona aha ntumwa za Yeézu ikumi no oómo, hamo na bóona abaandi. 10 Na abakazi áabo, nibo áaba: Mariamu ali Magidaléna, na Yoana, na Mariamu nyina wa Yakobo, hamo na abakazi abaandi áabo bakaba hamo nabo.
11 Náho, kaandi baágaamba éebyo byóona aha ntumwa za Yeézu, entumwa baabibona nke ebitéena ensoonga, tibalabesigile abakazi áabo aha mpola éezo.
12 Habwéecho, Peétero yaáyemeelela ahonyini, yeeluka kuza ahaámbi. Yaahika ahaámbi, yaataahámo omugati, yeénama kuleeba, yaábona ebizwáalo éebyo baamuziikilemo Yeézu, bilelemo byoonyini byoónka. Yaalugaho áaho, ali omukusobelwa bwooli.
Yeézu Omumuhaanda Naazeénda Emau
(Mariko 16:12-13)
13 Ha chilo éecho nyini cha Habwooyo, abaheémba bábili ba Yeézu bakaba bali omuluzeendo lwo kuzeenda omumutúulo gwa Emau. Omutúulo óogwo, guli nko kulibata esáaha ibili zíti kuluga Yeruzaléemu. 14 Bábili áabo, bakaba nibazeénda nibeteekeléla empola za amagaambo góona áago agagwíile.
15 Obuchilo bakaba bacháali nibateekeléla áaga, Yeézu weényini yéeza, yaalibata hamo nábo. 16 Baámubona, náho Múungu akabakola bataákumumanya nkokwo ni Yeézu.
17 Yaábabúuza, “Nimuteekelela magaambo chi kunu nimulibata?”
Baáyemeelela, obuso bwáabo nibwooleka entíimba. 18 Oómo wáabo, izíina lyoómwe ni Kileopa, yaámusubiza, “Ngási, omuchipípi cha abaantu bóona abaabele bali Yeruzaléemu, ni íiwe weénka omuzenyi otakahulíile góona áago agagwíile áaho ebilo éebi?” 19 Yeézu nawe yaábasubiza, “Ni magaambo chi áago?”
Baámusubiza, “Ichwe nituteekelela byóona éebyo bamukolíile Yeézu wa Nazaléeti. Abaantu bóona, noobu na Múungu, bakabona nkokwo weényini no omubáasi, habwo kuba ebikolwa byoómwe na amagaambo goómwe gakaba geena obuhicha bwooli. 20 Náho, abakulu na abagabe ba Múungu, na abategeki béetu, baámusohoza, achwaaziikilwe kufwa. Kábaabalíile, baámwiita ha kumúbáamba ha musalaba. 21 Na weényini niwe twaamutegiize nkokwo alaatuchuúngula Abaizilaeli. Náho óobu, buluga áago góona gagwíile, leélo ne echilo cha kásatu.
22 “Hamo ne éebyo, abaandi abakazi omuli íichwe baátukaamaaza, habwo kuba leélo obuchilo bwo omulucheelelélwa, baazeenda ahaámbi, 23 baasaanga omutúumbi gutalimo omugati. Béeza kutugáambila nkokwo beesulukizwa na maléeka, áabo baábagaambila nkokwo Yeézu ali mwooyo!
24 “Male, abaandi omuli íichwe baazeenda ahaámbi, baasaanga byóona ni nka nikwo abakazi áabo baatugaambíla. Nabo bityo, tibalagubweene omutúumbi.”
25 Yeézu yaábagaambila, “Íimwe basílu! Habwaáchi timukuhicha kwiikiliza buli áago gagaambiilwe na ababáasi? 26 Ngási, tí Masiyaa akaba ahikiiliilwe kulabila ebyaágalazo éebyo byóona, atakazíile omwiikuzo lyoómwe?”
27 Niho, Yeézu kubasoomboolela amagaambo áago góona agaayandikilwe ageene empoláze, kubaandiza omuMaandiko ga Musa na aga ababáasi abáandi bóona.
28 Niho beeliliza omumutúulo óogwo baabele nibazeénda. Nawe Yeézu yeekola nka acháali naazeendelela no oluzeendo. 29 Náho, baámuneémbelela bwooli, “Ikala hamo neechwe áaha! Léeba ensiimbaazi neeyiza, ni izóoba lyáagwa.”
Niho, Yeézu yaataahámo omuunzu, abone kwiikala hamo nábo. 30 Káyaabaliile beékala hamo haluhélo niho Yeézu yeemucha omukaate, yaásaba no kumusiima Múungu, yaágumenyula, yaaba naabaha.
31 Ahonyini, Múungu yaabakola kumanya nkokwo ni Yeézu. Nawe ahonyini yaabahwáaho ahaméeso.
32 Beébuuza, “Akáanya áako yaaba naagaambagáamba neechwe omumuhaanda, ha kutusoomboolela agali omuMaandiko Amatakatíifu, mbweenu titwaáhulila nko omulilo gwaáyaka omumiganya yéetu?”
33 Ha buchilo obwoonyini baáyemeelela, baasuba Yeruzaléemu. Baabugana ne entumwa za Yeézu ikumi ne eémo beékobya hamo na abáandi.
34 Bóona bakaba nibabagaambila bábili áabo omukugaamba, “Na amazima nkokwo Omukáma wéetu yaázooka! Yaámweesululukíize Simoni!”
35 Niho nábo kubasoomboolela bazeenzi báabo buli áago agagwíile omumuhaanda. Baábagaambila nka nikwo baabweene kumumanya Yeézu obuchilo naabamenyulila omukaate.
Yeézu Naabesulukiza Abaheémba Boómwe
(Matayo 28:16-20; Mariko 16:14-18; Yohana 20:19-23; Amakúlu ge Entumwa 1:6-8)
36 Obuchilo abaheémba áabo ba Yeézu bakaba bacháali bachaáhooyela empola ye éebyo, ahonyini Yeézu nawe, yaáyemeelela ahagáti yáabo. Yaábagaambila, “Mube no obuhóolo!”
37 Beékaangwa, baátíina bwooli, habwo kuba bakeéteekuza nkokwo baabona omuzimu.
38 Náho, Yeézu yaábagaambila, “Habwaáchi mwaázululukwa! Kamwaábéele ne etega téga omumiganya yéenyu? 39 Muundéebe emikono yaanze na amagulu gaanze, niho mumanye nkokwo ni iinye! Muunkúumye! Mweelebele íimwe nyini! Ha kuba omuzimu tigwíina minofu, nali amagúfa, nkokwo mulikuleeba inyinabyo.”
40 Obuchilo Yeézu káyaamazile kubagaambila áago, yaaboleka emikono na amagulu. 41 Abaheémba boómwe, bakanulilwa bwooli, mpaka tibalakuunzile nke éebyo byóona na amazima. Baásobelwa bwooli.
Niho, Yeézu yaábabúuza, “Ngási áaha heena echookulya choóna chóona?” 42 Baamuha echinogóka che eénfwi eyaabele éeyokize. 43 Yaáchanaánkula, yaáchilya omuméeso gáabo. 44 Yaábagaambila, “Obuchilo mbele nchili hamo neemwe, mbele niimbagaambila amagaambo góona áago agaandikilwe habwaánze ni lwaampaka gahikiilizwe: agaandikilwe Omubilagilo bya Musa, no omuMaandiko ga Ababáasi, no Omuchitabu che Enzina.”
45 Áaho, Yeézu yaabakola kumanya Amaandiko Amatakatíifu. 46 Kaandi yaábagaambila, “Gaandikilwe nkokwo, Masiya naayeendelwa kwaágalazibwa ne echilo cha kásatu, alyaázóoka kuluga omubafwíile. 47 Na nkokwo, abaantu ba amahaánga góona, kubaandiza Yeruzaléemu, baagaambiilwe nkokwo bahuungame ebiheno byáabo, babone kuganyilwa. Empola éezo zisaambaázwe ha kulagila kwaanze. 48 Íimwe mwaáyatulab amagaambo áago.
49 “Muléebe! Niimbasiindikila Omwooyo Mutakatíifu nka Táata wáanze okwo yaabeésagiize. Náho, muliindilile omumuzihwa óomu kuhicha obuchilo óobwo mulaháabwa obuhicha óobwo buleéza kuluga omwiigulu.”
Yeézu Naasutúka Kuzeenda Omwiigulu
(Mariko 16:19-20; Amakúlu ge Entumwa 1:9-11)
50 Káyaabaliile, Yeézu yaábebeembelela abaheémba boómwe mpaka kuhika omumuzihwa gwa Betania. Akáanya kibahikile áaho, yeemucha emikonóye ahalugulu, yaábafúuha. 51 Na kaandi akaba acháali nabafúuha, yaabaleka, yaaba naasutúka kuzeenda omwiigulu.