Masiya Yeézu Naayanaánkulwa Yeruzaléemu
(Mariko 11:1-11; Luka 19:28-40; Yohana 12:12-19)
21
1 Obuchilo Yeézu na abaheémba bwoómwe belilize omuli Yeruzaléemu, baáhika omuchaalo cha Betifáage omwi ibaanga lye Emizeyituni. Niho Yeézu yaabasiindika abaheémba bwoómwe bábili, 2 yaábagaambila nka nikwo, “muzeénde omugoongo oguli omuméeso gáanyu. Obuchilo nimutaha óomwo, ahonyini nimubona ensíkili ebohilwe áaho, hamo no enyána yáayo. Niho muzisibule, mundeétele áaha. 3 Kabilaaba omuuntu weéna wéena alababuuza chóona chóona, mumugalulile muti, ‘Omukáma wéetu naagweénda,’ náwe naabakuundila mwiize nágwo.”4 Éebyo bikabaho bityo, chibone kuhikiilila echigaambo éecho Múungu akagaamba kulabila ha mubáasi woómwe nka nikwo,
5 “Bagaambile abaantu bo muzihwa gwa Sayunia nka nikwo,
‘Leeba, omukáma wáanyu naayiza hali íimwe,
no mufula, naayiza naába ahanamile aha nsíkili,
no omwaana gwe ensíkili.’ ”b
6 Mbweenu, abaheémba boómwe baázeenda, baakola nkóokwo Yeézu yabalagiile. 7 Obuchilo basubile hali Yeézu ne ensíkili éezo hamo no omwaana gwaáyo, baayala emyéenda ahalugulu yaágwo, na Yeézu yeekalila emyéenda éezo. 8 Eecho chipípi chiháango cha abaantu, bayala emyéenda yáabo omumuháanda. Abáandi baanogola amatábazi ge emiti no kugata omumuháanda habwo kumukúza Yeézu. 9 Abaantu áabo abaabele abebeembile na abaabele nibamukulaatila Yeézu, bakaba nibahamuka aha maláka maháango nka nikwo,
“Akuzibwe Mutábani wo omukáma Daudi!
Ayina ikuzo ogwo alikwiiza ahi izíina lyo Omukáma Múungu!c
Akuzibwe Múungu ogwo ali omu igulu!”
10 Obuchilo Yeézu yataahile omu chikaali cha Yeruzaléemu, echikaali chóona chaásamaala bwooli. Abaantu baabaanza kweébuuza báti, “Óogwo noóha?” 11 Echipípi cha abaantu chikaba nichibagalulila chíti, “Óogu niwe Yeézu! Niwe omubáasi óogwo owa Nazaléeti eya Galiláaya!”
Yeézu Naabiínga Abasúluza Kuluga Éenzu Ya Múungu
(Mariko 11:15-19; Luka 19:45-48; Yohana 2:13-22)
12 Niho Yeézu yaataaha omu lubúga lwe éenzu ya Múungu. Obuchilo kayataahile óomwo, yaabasaanga béenzi abaabele nibaguza no kugula ebiintu óomwo, yaábabiinga bóona. Yaanaga naga emeéza za abaabele nibahiínga empilya, no kubinaga naga ebitébe bya abaabele nibaguza ebiiba. 13 Yeézu yaábagaambila aáti, “Eyaandikilwe omu Maandiko Matakatíifu aáti, ‘Éenzu yaanze elyáaba éenzu yo kusabilamo.’d Náho íimwe mwaázikozile kuba ‘enyaanga ya abeebi.’e”
14 Mbweenu, obuchilo Yeézu akaba achili omu lubúga lwe éenzu ya Múungu, abahume ne enziíngami beeza hali weényini, náwe yaábachiza. 15 Náho abakúlu ba abagabe ba Múungu na abeégesa be ebilagilo bya Musa kábaabweene amahano áago Yeézu akaba naákola, no kubahulila abaana nibéeta omu lubúga lwe éenzu ya Múungu báti, “Akuzibwe Omutábani wo omukáma Daudi!” Habwe ensoonga éezo, baásaaya bwooli, 16 baámubuuza Yeézu báti, “Ngási, nohulila óokwo abaana áaba ku balikugaamba?” Yeézu yaábagalulila aáti, “Niinhulila. Nikwo, timukasomaga amagaambo áago agaandikilwe omu Maandiko Matakatíifu nka nikwo,
‘Oyeloongize echikumuuko chaawe,
kulabila eminwa ya abaana abato na abacheche’?”f
17 Yeézu yaabaleka áaho, yaaluga omuli Yeruzaléemu, yaazeenda kulyaama omu mugoongo gwa Betania.
Yeézu Naayegesa Omugani aha kuchéena Omutiini Ogutéena Misumo
(Mariko 11:12-14,20-24)
18 Enchaákala yaáho, obuchilo Yeézu akaba naasuba omu chikaali cha Yeruzaléemu, yaalumwa enzala. 19 Niho yaabona omuti gúmo guli ahampiíngulo yo omuháanda óogwo ogwéetwa omutíini. Yaaguhikaho, yaasaanga gutéena kaantu koóna kóona, sána gwiina ebibabi byoónka. Bityo yaagugaambila omuti óogwo aáti, “Iiwe nakáti, tolizaala kaandi amagoomba!” Ahonyini, muti gwaayoma.
20 Obuchilo abaheémba ba Yeézu baabweene áago, baásobelwa bwooli. Baámubuuza báti, “Bita óogu muti gwo omutíini kagwaayoma bwaangu guti?” 21 Yeézu yaábagalulila aáti, “Mazima nniimbagaambila, kamulaaba mwiina okwiikiliza oókwo kutéena kutahwa tahwa, neemwe nimuhicha kugakola agáandi nka agakolwa aha muti óogu gwo omutíini. Kaandi timukukola áago goónka, náho nóobu mulagaambila ibaanga éeli muti, ‘Kúuka oze kweénaga omu nziba,’ nacho nichibaho. 22 Kamulaaba mwiina okwiikiliza, choóna chóona éecho mulaasaba hali Múungu, nimwiinaánkula.”
Ibúuzo Habwo Obuhicha Bwa Yeézu
(Mariko 11:27-33; Luka 20:1-8)
23 Yeézu yaataaha kaandi omu lubúga lwe éenzu ya Múungu. Obuchilo akaba naayegesa, niho abakúlu ba abagabe ba Múungu, na abanyaampala ba Abayahudi beeza kumubúuza báti, “Áaga áago olikukola, noogakola habwo obuhicha chi? No oóha ogwo akuheele obuhicha óobwo?” 24 Yeézu yaabagalulila aáti, “Na íinye kaandi nniimbabuuza echigaambo chimo. Kamulaangalulila éecho, ne íinye nniimbagaambila na habwo obuhicha chi nniinkola áaga. 25 Ngási, obuhicha bwa Yohana bwo kubatiza abaantu, bukaluga nkáhi? Bukaluga hali Múungu alyo omu igulu nali aha abaantu?” Niho baabaanza kuteékatéeka báti, “Ki tulagalula nka nikwo bukaluga omu igulu, naatubuúza nka nikwo, ‘Mbweenu, habwa chiíha timulamwiikilize?’ 26 Kaandi, ka tulagalula kuba bukaluga aha abaantu, nitubeéha embága ya abaantu áaba, habwo kuba bóona beena obweétegeleza nka nikwo Yohana akaba ali omubáasi.” 27 Ha bwéecho bamugalulila báti, “Titukumusoombookelwa.” Mbweenu, Yeézu náwe yaábagaambila aáti, “Ne íinye kaandi tiinkubagaambila na habwo obuhicha chi nniinkola áaga.”
Omugani Gwo Omwaana Ayetegeeliize No Omwaana Omugome
28 Yeézu yaazeendelela kubagaambila abakulu áabo aáti, “Óobu, mulikubona bita habwo omugani oogu? Akaba aliho omuuntu oómo ogwo akaba ayina abaana bábili. Yaazeenda aha mutábani wo obuzigeezo, yaámugaambila nka nikwo, ‘Íiwe mwaana wáanze, leélo zeénda kukola emilimo omu musili gwaanze gwe emizabibu.’ 29 Ogwo mutábani yaámugalulila aáti, ‘Táata tiínkuzeenda!’ Náho ahakulaatiile, yaáhiindula ebiteékuzo byoómwe, yaázeenda yaábikola. 30 Niho iíse yaazeenda ha mutábani owa kábili no kumugaambila nka nikwo yaamulagila oóndi óogwo. Náwe yaámugalulila aáti, ‘Táata nniinzeenda!’ Náho talazeenzile.
31 “Óobu ngási, omu bábili áabo, no oóha ogwo akakola nkóokwo iíse akeenda?” Baámusubiza báti, “No óogwo wo kubaanza.”
Niho Yeézu yaabazila aáti, “Mazima nniimbagaambila, abahaámbya na abasiihani balaábebeembelela kuza omubukáma bwa Múungu. 32 Yohana akeeza hali íimwe abone kuboóleka omuháanda gwa amazima, neemwe timulamwiíkiliize. Náho abahaámbya na abasiihani nibo bamwiikilize. Nóobu bityo íimwe obuchilo mukabona góona áago, mwaayanga kuhiindula ebiteékuzo bwéenyu no kumwiíkiliza.
Omugani Gwa Abalimi Abaheni
(Mariko 12:1-12; Luka 20:9-19)
33 “Muhuliilíze omugani ogúundi. Akaba aliho omuuntu oómo ogwo akaba ayina omusili. Omuli óogwo musili gwómwe, akahaamba emizabibu, yaalizoongolocheza ulugo, yaasuma omugati izuungilo lyo kukamuulilamo evíini, kaandi yaayoómbeka oluswi lula lwa abaleebelezi. Niho, yaabakoóteseza omumusili abalimi bunaanka, yaalugáho yaaza omu luzeendo.
34 “Obuchilo omwáanya gwo kugesa kigwaahikile, óogwo kaanyina omusili yaasiindika abazáana boómwe aha abalimi áabo, abone kuhabwa egabo yoómwe ya amagoomba. 35 Náho obuchilo abazáana boómwe kábaahikile, abalimi áabo babakwaáta, oómo baámutéela, oóndi bamwíita no oóndi baámutéela na amakúlugusi. 36 Niho, kaanyina omusili yaasiindika kaandi abazáana abáandi, béenzi kuchila áabo akabasiíndika aha bubaandizo. Abalimi áabo baabakolela kubi abahalila áabo nkóokwo babakolile abokubáanza. 37 Niho, yaamusiindika omwaana woómwe. Yeeteéka téeka nka nikwo, ‘Óogu no omwaana wáanze, weényini nibamukúza.’ 38 Náho obuchilo abalimi áabo kabamubweene omwaana woómwe, baátéeka téeka nka nikwo, ‘Óogu niwe alaahuungula ebiintu bye eése. Kachu, tumwíite tubone íichwe okwiimucha obuhuúnguzi boómwe.’ 39 Mbweenu, baámukwáata, baamutwáala ahéelu yo omumusili, baamwíita.”
40 Yeézu yaábabúuza aáti, “Ngási, obuchilo kaanyina omusili naasuba kuluga omu luzeendo lwoómwe, alaákola chiíha aha abalimi áabo?” 41 Baámusubiza báti, “Naabasikiiza kubi abobwiiko áabo, no omumusili gwoómwe nabakoóteseza abalimi abáandi áabo balamuha egabo yoómwe ye emizabibu ehiisize aha kachilo nyini.”
42 Niho Yeézu yaábagaambila aáti, “Ngási, timukasomile áago agaandikilwe omu Maandiko Matakatíifu? Agaandikilwe nka nikwo,
‘Ikulugusi éelyo mukáanga íimwe aboómbeki,
éelyo nilyo lyaahiindukile kuba ikulugusi igazi lyo oluhazo.
Omukáma Múungu niwe akozile éecho,
nacho ne echigaambo cho kusobeza hali íichwe.’g”
43 Yeézu yaayoongéla aáti, “Ha bwéecho, nniimbagaambila amazima nka nikwo, Obukáma bwa Múungu mulyaábwaakwa kuluga hali íimwe no kuhaabwa abaantu ba mahaánga góona agáandi áabo bokulaba amagoomba goómwe. 44 Mbweenu, omuuntu weéna wéena ogwo aliiza yaagwa ahi ikulugusi éelyo, asekenyuke. Kaandi, omuuntu weéna wéena ogwo ikulugusi éelyo lilamugwéela, nilumuusa butúnu.”