Yeézu Naamuchuungula Zakayo
19
1 Mala Yeézu yaataahámo omu chaalo cha Yeliko, ali omukuhiíngula naazeénda. 2 Omu chaalo óomwo, hakaba heena omuhíte oómo, izíina lyoómwe Zakayo. Omuhíte óogwo akaba ali mukúlu wa abahaámbya.a 3 Zakayo akaba naayeénda kuleeba Yeézu no omuuntu aliho aáta, náho talahikize kumubona, habwo kuba hakaba heena embága mpaango ya abaantu, na akaba ali mugufu. 4 Habwéecho yeeluka bwaangu, yaázeenda omuméeso ge embága, yaahanama omuti gwo omuku, kuba ahiche kumubona Yeézu kaálaaba naahiingula omumuhaanda óogwo.5 Obuchilo Yeézu yaahikile áaho, yaaleeba olugulu yo omuti, yaágaamba, “Zakayo, tuúka bwaangu! Ni lwaampaka iinye kuba omuzenyi omúka yaawe leélo.” 6 Ahonyini Zakayo yaátuuka, yaámwaangisa Yeézu omúka yoómwe ahamanulilwa maháango.
7 Abaantu bóona, obuchilo baabweene áago, baabaanza kudugulima omukugaamba, “Leeba yaazeenda kulya no owe ebiheno!” 8 Náho, Zakayo yaáyemeelela, yaámugaambila Omukáma, “Huliiliza, Mukáma! Óobu nyini, niimbáha abahabi obwaata iheembe bwe ebiintu byaanze. Na kiindaaba naayakile omuuntu weéna wéena, nimusubiza entulo iína ye endeengo.”
9 Yeézu yaágaamba, “Leélo obuchuúnguzi bwaáhika omuunzu éezi. Habwo kuba óogu nawe, yaayoleka kuba omwaana wa mazima wa Ibrahímu, 10 habwo kuba Omwaana wo Omuuntu akeeza kuloonda no kuchuúngula abaantu áabo ababuzile.”
Omugani Gwa Abahalila Áabo Abakalekelwa Empilya
11 Kábaabeele nibahuliiliza áaga, Yeézu yaazeendelela kubagaambila omugani, habwo kuba akaba yeéliliza kuhika Yeruzaléemu, abaantu bakaba nibateekuza nka nikwo obukáma bwa Múungu nibweesulukiza ahonyini. 12 Habwéecho, yaábagaambila, “Hakaba heenaho omuuntu oómo wo olugaanda lwo obukáma. Omuuntu óogwo, akazeenda oluzeendo kuzeenda éensi ya hala, abone kwiinaankula obutegeki bwo kuba omukáma, male asube kutégeka éensi yoómwe.
13 “Acháali kulugáho, yaayeta abahalila boómwe ikumi, yaabaha buli oómo endeengo mpaango ye empilyab zilibwiinganisa, yaábagaambila, ‘Mukole isuluza ne empilya éezi kuhika obuchilo óobwo ndagaluka.’ 14 Náho óogwo muuntu, abaantu be éensi yoómwe bakamutamwa bwooli. Baasiindika entumwa bamukulatile no kubagaambila óokwo baáti, ‘Omuuntu óogu, titukweenda aábe omukáma wéetu!’ 15 Nóobu bityo, akaheebwa amagala go obukáma. Obuchilo káyaasubile, omukáma yaábeeta abahalila áabo yaaheele empilya, abone buli muhalila kumugaambila yaamubonesiize ensaága chi.
16 “Omuhalila wa mbele yaáhika, yaámugaambila, ‘Mukáma, kwiingana ne éezo empilya éezo waandekiile, mbweene omugaso entulo ikumi kusáaga áaho.’ 17 Óogwo mukáma yaámugaambila, ‘Iiwe Muhalila waanze owe entuungwa nzima, okozile kuzima! Aha kuba obeele omweésigwa omukweétegéeleza aha bíche bwooli, naakuha obutégeki aha mizihwa ikumi.’
18 “Omuhalila wa kabili nawe yaáhika, yaámugaambila, ‘Mukáma, kwiingana ne éezo empilya éezo waandekiile, mbweene omugaso entulo itáanu kusáaga áaho.’ 19 Omukáma yaámugaambila, ‘Neewe, naakuha amagala ha emizihwa etáanu.’
20 “Omuhalila oóndi yaáhika, yaágaamba, ‘Mukáma, empilya záawe nzizi áaha. Nkazikoma omukasila, kuba zitaákubula. 21 Nkakutiina, aha ensoonga íiwe oli omuuntu wa amakaála. Notwaála éebyo otatiilého na noogesa ahaantu hoótalahaambile chiintu.’
22 “Omukáma yaámugaambila, ‘Íiwe muhalila omuhéni! Óobu niinkuchwaaziika kwiingana na amagaambo gáawe íiwe nyini. Mbweenu okagaamba noomanya nkokwo iinye ndyo omuuntu wa amakaála bwooli, niintwaála áago gi ntalatiileho, na niingesa áago ntalahaambile. 23 Kábilaaba nikwo bilibityo, mbweenu habwaáchi tolaázisulwiize empilya zaanze okazituunda na abatuunzi, mbone kuzitwáala hamo ne ensaága yaázo obuchilo bwo kusuba kwaanze?’
24 “Ahonyini, yaábagaambila abaantu áabo abakaba beémeeliile áaho, ‘Mumwake óogwo empilya éezo, mzeénde kumuha óogwo ayaábonesizeho omugaso entulo ikumi.’ 25 Náho baámugaambila, ‘Mukáma, óogu yaábonesize omugaso gwe entulo ikumi!’
26 “Yaábasubiza, ‘Niimbagaambila nkokwo, buli muuntu óogwo alikweékomya kuzima éebyo ayinabyo, nayoongelwa ebiindi. Náho, omuuntu óogwo atakweekomya éebyo ayinabyo, nóobu echiche echa alaaba ayinacho nichitwaálwa. 27 Noobu bityo, áabo ababisa baanze áabo abataleenzile iinye kubategeka, mubaléete áaha, mubeétile omuméeso gaanze!’ ”
Yeézu Naayanaánkulwa Kuzima Yeruzaléemu Nko Omutégeki
(Matayo 21:1-11; Mariko 11:1-11; Yohana 12:12-19)
28 Yeézu káyaamazile kugaamba áago, akabeébeembelela abaantu be mbága éezo yaazeendelela no oluzeendo lwoómwe lwo kuzeenda Yeruzaléemu. 29 Obuchilo yeeliliza emitúulo ya Betifáage na Betania, ahi ibaanga éelyo likaba nilyeétwa Mizeyituni, yaábatuma abaheémba boómwe bábili, 30 yaábagaambila, “Muzeénde omumutúulo óogwo guli omuméeso géenyu. No obuchilo mulazamo óomwo, nimusaánga omwaana gwe ensikili gubohilwe, óogwo gutakahanamwaga no omuuntu weéna wéena. Mugusibule, muguléete áaha. 31 No omuuntu kalaábabúuza, ‘Habwaáchi nimugusibula?’ Mumugaambile, ‘Omukáma wéetu naagweénda.’ ”
32 Mbweenu, abaheémba áabo baázeenda, baasaanga byóona bili nka nikwo Yeézu yaabagaambiile. 33 Obuchilo bakaba nibagusibula óogwo mwaana gwe ensikili, bakáma baágwo baábabúuza, “Habwaáchi nimugusibula óogwo mwaana gwe ensikili?” 34 Baábasubiza, “Omukáma wéetu naagweénda.” 35 Baamuleétela Yeézu óogwo mwaana gwe ensikili, baayala ebizwáalo byáabo halugulu yaágwo, mala baámuhanamika Yeézu.
36 Obuchilo Yeézu akaba naazeenda, abaantu baayala ebizwáalo byáabo omumuhaanda.c 37 No obuchilo yeeliliza ahaantu áaho omuhaanda nigugolomoka kuluga ahi Ibaanga lya Mizeyituni, embága yóona ya abaheémba boómwe baabaanza kumukúza Múungu ahamanulilwa, habwa amahano góona áago baabweene. Bakahamuka ahamaláka gáabo, 38 omukugaamba,
“Yaáfuhilwe! Omutégeki óogwo alikwíiza ahi izíina lyo Omukáma,d
Heena obuhóolo na Múungu omwiigulu,
weényini óogwo ali ahalugulu ya byóona,
ayina obukúlu bwóona!e”
39 Omuli éezo mbága, bakaba balimo Abafalisayo. Áaho, baámugaambila Yeézu, “Mweégesa, obaángile abaheémba baawe bataákugaamba áago!” 40 Yeézu yaabasubiza, “Niimbagaambila, nka nikwo áaba kibaleésiza, mazima amabáale nigahamuka ahi iláka!”
Yeézu Naalila Habwa Yeruzaléemu
41 Obuchilo kayeeliliize omu chikaali cha Yeruzaléemu no kuguleeba, Yeézu yaabaanza kuguchulila. 42 Yaagugaambila, “Nakaáligiile bwooli leélo éezi nkokwo wakumanyile nóobu íiwe emiháanda yo kubona obuhóolo! Náho óobu eselekilwe omuméeso gáawe. 43 Habwo kuba, omubilo éebyo ebileéza, ababisa báawe balaakukuba, balaakuzoongolokeza olukuta embazu zóona nokukwaángila otalugamo omugati. 44 Nibakusiingaálichiza ahaansi íiwe na abaana baawe omugati ye enkuta zaawe na tibalileka nóobu ibáale límo olugulu ye eliindi. Ebi na habwo kuba toleenzile kumanya obuchilo obu Múungu yakuletiile obuchuúnguzi!”
Yeézu Naabiínga Abasúluza Omulubúga Lwe Éenzu Ya Múungu
(Matayo 21:12-17; Mariko 11:15-19; Yohana 2:13-22)
45 Mala Yeézu yaataahámo omulubúga lwe éenzu ya Múunguf óokwo Yeruzaléemu, yaabaanza kubabiinga abaantu áabo bakaba nibaguza ebiintu óomwo. 46 Yaábagaambila, “Gaandikilwe omumaandiko ga Múungu, ‘Éenzu yaanze, neeba éenzu ye esáala.’g Náho íimwe, mwaazikola kuba enyaanga ya abanyagiilizi!”h
47 Buli chilo, Yeézu akaba naayegesa abaantu omulubúga lwe éenzu ya Múungu. Náho abakulu ba abagabe ba Múungu, hamo na abeégesa be ebilagilo na abanyaampala ba Abayahudi, bakaba nibaloondela akazeendele ko kumwíita, 48 náho tibalabweene olugazi lwo kukola choóna chóona, habwo kuba abaantu bóona bakaba nibahuliiliza ebigaambo byoómwe aha bweetegeeleza buháango.