Omugani Gwo Kumusaba Múungu Obutóosa
18
1 Male Yeézu yaabachweela omugani óogu abaheémba boómwe, kubamanyisa nkokwo ni lwaampaka kumusaba Múungu buchiile no obutafwa omuganya. 2 Yaábagaambila, “Omumuzihwa gúmo, hakaba halimo omulamuzi oómo. Omulamuzi óogwo, akaba atakutíina Múungu, nali kumusáaswa omuuntu. 3 Omumuzihwa óogwo, akaba alimo omukazi oómo akaambwiile. Óogu mukazi akaba amuzeendaho óogwo mulamuzi buli ntulo ha kumuneémbelela, kwo kumugaambila, ‘Niinsaba oómpe obuteékaa hali iinye no omubisa waanze.’4 “Aha mwaanya mula, óogwo mulamuzi akáanga kumuhwéela omukazi akaambwiile. Náho hamuheleeluko, yeégaambila omumuganya gwoómwe, ‘Iinye tiínkumutíina Múungu, nali tiínkubeétaho abaantu. 5 Náho, habwo kuba óogu mukazi akaambwiile naanyagalaza yagalaza bwooli, óobu nniimuha obuteéka bwoómwe, kuba ataákuzeendelela kuúndemesa aha kunyizaho obutóosa!’ ”
6 Kaandi, Omukáma yaágaamba, “Muhuliilíze kuzima amagaambo go óogwo mulamuzi omuhéni! 7 Ngási, nikwo kugaamba Múungu, talibahweela áabo biyatoólize, áabo abalikumuhamukila nyemisana no omuchilo? Ngási, naayilililwa kubahuliiliza? 8 Niimbagaambila naabahweela bwaangu. Náho, Kaáliíza Omwaana wo Omuuntu, ngási, mazima nasaánga omuunsi bachiliho abaantu abeene okwiikiliza?”
Omugani Gwo Omufalisayo No Omutobesa Wi Igóodi
9 Kaandi, Yeézu yaabachweela omugani abaantu abaandi, áabo bakeebona nkokwo nibo abeene okutégeza omuméeso ga Múungu, no kubagaya abaandi. Yaágaamba, 10 “Hakaba heenaho abaantu bábili, áabo bakahanama kuzeenda omuunzu ya Múungu ha kumusaba. Oómo akaba ali Omufalisayo, no oóndi akaba ali omuhaámbya. 11 Óogwo Omufalisayob yaáyemeelela, kunu naamusaba omumuganya, ‘Íiwe Múungu, niinkusiima habwo kuba iinye tiíndi nka abaantu abaandi: abomutuubo, abatéezi be ebisuba, nali abasiíhani. Niinkusiima nkokwo iinye tiíndi nko óogu omuhaámbya! 12 Mba ne echisiibo entulo ibili omubwooyo, niinkusoholeza ezáaka, eémo omuli ikumi kuluga omumabónwa gaanze góona.’
13 “Náho óogwo omuhaámbya, yaasigala haláho, káche. Na taleénzile nóobu kwíinamula améeso goómwe omwiigulu, náho yaaba nayeteéla ahakalezi koómwe aha ntiimba, ahakugaamba, ‘Múungu, onganyile iinye owe ebiheno!’ 14 Niimbagaambila nkokwo, óogwo omuhaámbya akasuba omúka aganyiilwe na Múungu. Náho óogwo oóndi, mmahi! Habwe ensoonga, buli muuntu óogwo alikweékuza, alyaásubibwa aheéfo. Na buli muuntu óogwo alikweésubya aheéfo, naayinulwa.”
Yeézu Naafúuha Abaana Abato
(Matayo 19:13-15; Mariko 10:13-16)
15 Obuchilo obuundi, abaantu bakaba nibamuletela Yeézu kaandi abaana báabo abato, abone kubateelaho emikono yoómwe, abafúuhe. Obuchilo abaheémba boómwe baabweene batyo, baabaanza kubaángila abazeele, ha magaambo go kubachaáhukila. 16 Náho, Yeézu yaábeeta hali weényini abaana áabo, ahakugaamba, “Mubaleke abaana abato beéze hali iinye, mala mutabaángila, habwo kuba, obukáma bwa Múungu buliho habwa baantu nka áaba. 17 Niimbagaambila amazima, omuuntu weéna wéena óogwo atakwaánaankula obukáma bwa Múungu nkokwo yaakwaanaánkula omwaana muto, nakáti talibutaahamo.c”
Omutégeki Omuhíte Naamubuúza Yeézu
(Matayo 19:16-30; Mariko 10:17-31)
18 Omutégeki oómo, akamubúuza Yeézu, “Mweégesa muzima, nkole chiíha, kuba mbone obulami bwo obucha no obuchiile?”
19 Yeézu yaámugaambila, “Habwaáchi noonyeta muzima? Taliho omuuntu weéna wéena omuzima, náho Múungu weénka! 20 Íiwe, noobimanya kuzima ebilagilo bya Múungu: ‘Otaákusaambana, otaákwiita, otaákwiiba, otaákubehekeleza ebisuba, obahe ikúzo iíso na nyoko.’d ” 21 Omutégeki yaámusubiza, “Ebilagilo éebi byóona, mbikoondoókile kuluga ahabuto bwaanze.”
22 Obuchilo Yeézu yaabihuliile éebyo, yaámugaambila, “Ochaali nooyeendelwaho okoleho echigaambo echíindi chimo choónka. Ebiintu byóona éebyo oyinabyo, ozeénde obiguze. Ne empilya éezo olaabonesa, ozigabile abalikubulabulilwa, niho oláaba ne ensáho omwiigulu. Mala iíza, onkuláatile.” 23 Óogwo mutegéki, obuchilo yaabihuliile éebyo, akazululukilwa bwooli, aha kuba akaba ali omuhíte bwooli. 24 Obuchilo Yeézu yaámubona nazululukilwa aátyo, akagaamba, “Abahíte, kuzamo omubukáma bwa Múungu, ni chiguma bwooli! 25 Habwo kuba, chikwiile bwooli aha ntwaangabuleende kulabila omwiihulu lyo olusiinge, kusaaga omuhíte kuzamo omubukáma bwa Múungu!”
Entwaangabuleende (18:25)
26 Abaantu áabo kábaahuliile áago, baágaamba, “No oóha mbweenu, óogwo alaahícha kuchuúngulwa?” 27 Yeézu yaábagaambila, “Amagaambo áago agatakwiíle habaantu, hali Múungu gakwiíle.” 28 Áaho, Peétero yaámugaambila Yeézu, “Léeba íichwe, twaálekile ebiintu byéetu byóona, twaákukulaatila!”
29 Yeézu yaágaamba, “Na amazima. Na niimbagaambila nkokwo, buli muuntu óogwo alekile éenzu yoómwe, nali mukazi woómwe, nali badugu boómwe, nali abazeele boómwe, nali abaana boómwe, habwo obukáma bwa Múungu, 30 amazima nayanaankula biinzi bwooli kuchila éebyo yaalekile, kaálikuba acháali achili omuunsi éezi. Kaandi, óokwo omwiigulu, alaábona obulami bwo obucha no obuchiile.”
Yeézu Naasasaánula Olufu Lwoómwe No Okuzooka Kwoómwe
(Matayo 20:17-19; Mariko 10:32-34)
31 Mala Yeézu yaábatwáala abaheémba boómwe ikumi na bábili ahalubazu, yaábagaambila, “Muhuliilíze! Nituhanama kuzeenda Yeruzaléemu. Na áaho, góona áago ababáasi baayaandikile habwo Omwaana wo Omuuntu, nigahikiílizwa. 32 Naateébwa omuungalo za Abanyamahaángae áabo nibamukola kúbi no kumuzuma, no kumuchwéela amachwaánta. 33 Kaandi, nibamuteéla enkóba no kumwíita, náho echilo cha kásatu, naazóoka.”
34 Amagaambo áago Yeézu yaabagaambiile abaheémba boómwe, tibalagamanyile. Habwo kuba ensoonga ya amagaambo áago ekaba eselekilwe hali boónyini. Tibalamanyile naahoyela chiíha.
Yeézu Naamuchiza Omuhume Óokwo Yeliko
(Matayo 20:29-34; Mariko 10:46-52)
35 Yeézu akaba yeéliliza omu chaalo cha Yeliko, na ahaangeégéelof yo omuhaanda, hakaba heena omuhume oómo. Omuhume óogwo akaba ayikéele, naasabiliza. 36 Obuchilo yaahuliile abaantu béenzi nibahiingula áaho, yaábúuza, “Heena chiíha?” 37 Baámugaambila, “Yeézu Omunyanazaléeti naahiingula.”
38 Ahonyini, yaahamuka ahi iláka, ahakugaamba, “Yeézu, Mwaana wa Daudi, onganyile!” 39 Abaantu áabo abaabele beébeembiile, bakaba nibamuchaahukila ayesize. Náho weényini, yaaguma kuhamuka ahi iláka omukumwéeta, “Mweene Daudi, onganyile!”
40 Yeézu yaáyemeelela, yaalagila óogwo omuhume aleétwe hali weényini. Obuchilo yaámuhika héehi, Yeézu yaámubúuza, 41 “Nooyeénda nkukolele chiíha?” Nawe yaágaamba, “Mukáma, niinsaba mbone kuhwéeza kaandi.” 42 Yeézu yaámugaambila, “Hweéza! Echaákuchiza no okwiikiliza kwáawe.” 43 Ahonyini, yaahwéeza, yaámukulaatila Yeézu, naamukuza Múungu. Abaantu bóona, obuchilo baabweene éebyo, nábo baabaanza kumukúza Múungu.