Ebileengeso
(Matayo 18:6-7, 21-22; Mariko 9:42)
17
1 Yeézu yaábagaambila abaheémba boómwe, “Ebileengeso éebyo bilikuleételela abaantu bakole ebiheno, nibibaho. Náho, nelóoko óogwo omuuntu alaabileételela! 2 Yaakuba haáchili hali weényini akomwe omubicha olubeengo lulikulemeela lwo kuseelaho, no kunaguzwa omunyaanza, kuchila weényini kumuleetelela oómo wa abato áaba akole ebiheno! 3 Habwéecho, mweékomye muteéza kukola mútyo!“Omuhulile mudugu waawe kaálakuhenela, omuháne, na kaálasaba echiganyizi ha chiheno choómwe, omuganyile. 4 Nóobwo kaálaaba yaákuhenela entulo musaanzu aha chilo chimo, na buli ntulo naasuba hali íiwe naakugwa omumagulu ahakugaamba, ‘Onganyile,’ neewe omuganyile!”
Amagala Go Okwiikiliza
5 Niho entumwa éezo zaámugaambila Omukáma, “Mbweenu, otwoóngele okwiikiliza kweetu!” 6 Omukáma yaábasubiza, “Kamwakubeele no okwiikiliza kuche nóobwo nke embíbo eénche bwooli,a mwakaágaambiile omuti óogu gwo omukunyu nkokwo, ‘Nyukuka ozeénde kumela omunyaanza!’ Nágwo gwaakaábakoondokiile.”
Omulimo Gwo Omuhalila
7 “Tugaámbe oómo omuli íimwe ayina omuhalila óogwo alikulima nali naliísa entaama. Ngási óogu muhalila kaálikusuba omúka kuluga omumasaambo, ahonyini mukáma woómwe naahicha kumugaambila, ‘Boneka ebyookulya?’ 8 Mmahi! Naamugaambila, ‘Oondoongeze ebyookulya, oyeloonze kuuntona obuchilo ndaaba niíndya no okunywa. Niho neewe olaabona kulya no okunywa.’ 9 Mbweenu! Omuhalila kaálagakola áago omukáma woómwe yaamulagiliíla, ngási óogwo mukáma naamusiima aha kugakóla? Mmahi!
10 “Bityo nikwo néemwe, kamulamala kukola góona ge mwalagilwa, mugaámbe, ‘Ichwe na abahalila kwoónka. Twaakola ge tubele nitweendelwa kukola.’ ”
Yeézu Naachiza Abeene Amabéembe Ikumi
11 Obuchilo Yeézu akaba naazeénda Yeruzaléemu, akalabila embibi za Samalia, ne za Galiláaya. 12 Echilo chimo, akataahamo omumutúulo gúmo, yaabugana na abaantu ikumi abeene amabéembe. Áabo abeene amabéembe, baáyemeelela hala na weényini,b 13 baahamuka ahi iláka omukugaamba, “Yeézu, Mukáma, otuganyile!”
14 Yeézu yaábabona, yaábagaambila, “Muzeénde mweéyoleke aha bagabe ba Múungu.c” Baázeenda, no obuchilo bakaba bali omuluzeendo, baáchila.
15 Oómo wáabo, obuchilo kayáabweene nkokwo yaámazile kuchila, ahonyini yaásuba hali Yeézu, naámusiingiza Múungu ahi iláka liháango. 16 Obuchilo yaahikile, omukumusiima, yaagwa buzuúma omumagulu, omuméeso ga Yeézu. No omuuntu óogwo, akaba ali Omusamalia.d
17 Yeézu yaágaamba, “Leeba abaantu ikumi bachilizwe! Mbweenu, áabo abaandi mweenda bali nkáhi? 18 Tihaliho abaandi áabo ababweenwe nibasuba kumusiingiza Múungu, choónka óogu omuzenyi?” 19 Kaandi Yeézu yaámugaambila, “Yemeelela, ozeende. Echaákuchiza no okwiikiliza kwáawe.”
Áago Agaliisuulukiza Obuchilo Omwaana Wo Omuuntu Kaáliíza
20 Echilo chimo, Abafalisayo bakamubúuza Yeézu, “Obukáma bwa Múungu, nibwiíza íili?” Yeézu yaábasubiza, “Kwíiza kwo obukáma bwa Múungu, tí kwe emanyiso éezo zilikubonwa aha méeso. 21 Abaantu tibalihicha kugaamba, ‘Muléebe! Buli áaha!’ Nali, ‘Muléebe! Buli áaho!’ Muhuliilíze, obukáma bwa Múungu buli omuli íimwe.”
22 Kaandi, Yeézu yaábagaambila abaheémba boómwe, “Omubilo éebyo ebilikwiiza, mulaáligila kuleeba nóobu chilo chimo che ebilo byo Omwaana wo Omuuntu, na timulichibona. 23 Abaantu balaábagaambila, ‘Muléebe! Ngugwo áaho!’ Nali ‘Muléebe! Ngugu áaha!’ Náho abaantu áabo, mutaákubeelukiilila. 24 Áago naábagaambila habwo kuba, echilo cho okusuba Omwaana wo Omuuntu, alyéeza nko olulábyo okwo lulabyaaho bwaangu no óogwo mwaanga kumulikila embazu zóona zi igulu. 25 Náho echaámbele, ni lwaampaka Omwaana wo Omuuntu abone ebyaágalalo biinzi no kwáangwa na abaantu bo oluzáalo óolu.
26 “Nkokwo byaabeeleho omubilo bya Núhu, nikwo bilibaho ebilo byo kusuba kwo Omwaana wo Omuuntu. 27 Ebilo bya Núhu, abaantu bakaba nibalya no okunywa, nibasweéla no kuswéelwa, mpaka echilo éecho Núhu yaatahile omusafína. Áaho, enzula ne enzwéelo zo kwiikisa éensi zéeza, zaábasiingaalicha áabo bóona.
28 “Nóobu ebilo bya Lúutu, amagaambo gakaba gali gátyo nyini. Abaantu bakaba nibalya, no okunywa, nibagula no kuguza, nibalima, no kuhaamba embíbo, na bakaba niboombeka. 29 Náho, echilo éecho Lúutu yaalugile Sodoma, omulilo muháango gwe echikwáazoe gwaáseeseka nke enzula kuluga omwiigulu, gwaábasiingaalicha áabo bóona.
30 “Bityo nikwo bilaabaho echilo éecho Omwaana wo Omuuntu kaalisuúlulwa. 31 Echilo éecho, omuuntu aliba halugulu yo olutala lwo omuunzu yoómwe, ne ebiintu byoómwe bili omugati ye éenzu, ataákutuuka kubitwáala. No omuuntu aliba ali omumusili, bityo nyini, talisuba omúka kutwáala choóna chóona. 32 Mwiizuke áago agaagwíile hali mukazi wa Lúutu!f 33 Buli muuntu óogwo alaaleengesa kuchiza obulami bwoómwe, niwe alaabubuza. Na buli muuntu óogwo alaabubuza, niwe alaabuchuúngula.
34 “Niimbagaambila nkokwo, omuchilo óomwo, abaantu bábili balyáaba balyaamile ahachitabo chimo. Oómo, alaámutwaala, oóndi alaámusiga. 35 Echilo éecho, abakazi bábili balyáaba nibasa hamo. Oómo, alaámutwaala, oóndi alaámuleka.” [ 36 Abaantu bábili nibaba bali omumusili, oómo alaámutwaala, oóndi alaámuleka.]
37 Abaheémba baámubuuza, “Mukáma, áago galyáaba nkáhi?” Yaábasubiza omumumubéelo, “Buli hoona aheena emituumbi, niho empuungu zikoba.”