Omugani Gwo Omwiímeelelezi Omucheluke
16
1 Kaandi, Yeézu yaábagaambila abaheémba boómwe, “Hakaba heena omuhíte oómo no omwiímeelelezi woómwe. Omwiímeelelezi óogwo, akalegelelwa nkokwo akaba naasíisa ebiintu bya mukamáwe. 2 Habwéecho, omuhíte akamwéeta omwiímeelelezíwe, yaámubuuza, ‘Ni magaambo chi áaga áago ndikuhulila hali íiwe? Ntoondela okubala kwe ebiintu byaanze, habwo kuba tokukuúndilwa kuzeendelela kuba omwiímeelelezi!’ 3 Óogwo mweémeeleleezi yeébuuza, ‘Nzileho nta óobu? Omukáma waanze, naanyiha omumilimo. Tinyina amagala go kulima, na niinzila ensoni kusabiliza. 4 Mbweenu, niimmanya cho kukola, kuba ahaleéza abaantu babone kunyegeza omumaka gáabo kaándalekesibwa emilimo éezi.’ 5 Habwéecho, omwiímeelelezi óogwo yaábeeta buli oómo, bóona, abalikutóongwa na mukamáwe. Yaámubúuza owa mbele, ‘Ibáanza lyáawe ha mukáma waanze ne endeengo chi?’ 6 Yaámusubiza, ‘Ibáanza lyáanze, na amapipa igana ga amazuta ge emizeyituni.’a Omwiímeelelezi yaámugaambila, ‘Twaála olwaandiko óolu, olwaandikilwe ibáanza lyáawe. Ikala áaha, ozihiindule bwaangu, yaandika makumi atáanu.’ 7 Mala kaandi yaámubúuza omutoongwa oóndi, ‘Íiwe, ibáanza lyáawe ne endeengo chi?’ Nawe yaámusubiza, ‘Amagunila igana ge engano.’ Óogwo omwiímeelelezi yaámugaambila, ‘Twaála olwaandiko óolu lwi ibáanza lyáawe, yaandikaho makumi munáana.’8 “Káyaabaliile, omuhíte yaámusiingiza óogwo omwiímeelelezi atali omweésigwa aha bucheluke bwoómwe. Habwo kuba, abaantu ba kataka éezi béena obucheluke habigaambo byáabo na bazeenzi báabo, kuchila abaantu bo omu mwaangab. 9 Nawe Yeézu yaazeendelela kubagaambila, muheéle ebiintu byéenyu byo omuli kataka éezi ha báandi mubóne abanywáani, kuba kabilihwa, mwaangiswe omubutuulo bwo obucha no obuchiile.
10 “Buli muuntu óogwo ali omweésigwa aha magaambo máche, niwe ali omweésigwa nóobwo aha magaambo amaháango. Bityo nyini, buli muuntu óogwo atali omweésigwa aha magaambo máche, niwe atali omweésigwa nóobwo aha magaambo amaháango. 11 Mbweenu, kamulaaba íimwe mutabeéle abeésigwa aha kutégeka amabonwa go omuli kataka éezi, noóha alaabeésiga omukubaha obutegeki bwo obuhite bwa amazima bwo omwiigulu? 12 Kamulaaba íimwe mutabeele abeésigwa aha mabonwa go oóndi, mbweenu noóha akwiile kubaha íimwe amabonwa agali géenyu!
13 “Taliho omuhalila óogwo ayaakuhicha kuheéleza abakáma bábili. Kaálayeenda omukáma oómo no kumuheéleza kuzima, niho alaatamwa óogwo oóndi no kumugaya. Timwaákuhicha kumuheéleza Múungu hamo no obuloonzi bwa amabonwa!”
14 Abafalisayo, obuchilo baahulíile amagaambo áago ga Yeézu, bakabáanza kumuseka aha kumugaya, habwo kuba bakaba nibeénda bwooli empilya. 15 Yeézu yaábagaambila, “Íimwe, nimweekola abeene obuteéka omuméeso ga abaantu. Náho, Múungu naamanya amagaambo áago agali omumiganya yéenyu. Habwo kuba, amagaambo áago ge balikukuza bwooli abaantu, nigamutamisa bwooli Múungu!”
Ebyeégeso Bunaanka Bya Yeézu
(Matayo 11:12-13, 5:31-32; Mariko 10:11-12)
16 “Ebilagilo bya Musa, na amaandiko ga ababáasi, gakaba nigakulaatilwa na abaantu mpaka omubuchilo bwa Yohana Omubatiza. Kuluga obuchilo bwoómwe, abaantu bakaba nibamanyiswa Empola Nzima zo obukáma bwa Múungu, na buli muuntu ayetáashamo lwa amagala.c 17 Nóobwo bityo, chikwiile bwooli ahi igulu ne éensi kuhwaaho, kuchila enyuguta eémo ye Ebilagilo kufutwa.
18 “Omukwaáta, kaáli kulekaana na mukazíwe no kukuúmpula oóndi, naasaambana.d Na alaakuumpula omukazi óogwo ayalekéene ne eéba, naasaambana.”
Omuhíte Na Lazáaro
19 “Hakaba héeno omuhíte oómo, óogwo akaba ateeka amazenyi buli chilo, no kuzwaala ebizwáalo bizima, male byo obukaani, bye ezaambarau. 20 Na ahi iléembo lyo óogwo omuhíte, akaba ayikalaho omuhabi oómo, izíina lyoómwe Lazáaro. Lazáaro, omubili gwoómwe gwóona gukaba gwiizwíile ebigogo, 21 eémbwa zikaba niziíza kumulaámba láamba ebigogo byoómwe. Lazáaro akaba aligila ahaábwe kugalya amasaága ge ebyookulya áago gakaba nigalagala kuluga ahameéza yo óogwo omuhíte.
22 “Nikwo yaálemwa, omuhabi Lazáaro yaáfwa. Bamaléeka baamutwáala omwiigulu, héehi na Ibrahímu. Óogwo omuhíte nawe yaáfwa, yaázikwa. 23 No obuchilo omuhíte akaba naayagalala bwooli omukuzimu, yeenamula améeso, yaabona Ibrahímu kuluga hala, nawe Lazáaro ali héehi nawe. 24 Akamwéeta ahi iláka, ‘Táata Ibrahímu, onganyile! Niinyagalala bwooli omumulilo óogu! Omusiíndike Lazáaro ayize hali iinye, akole omunwa gwo olukumulwe omumeenzi, agatoónyeze ahalulimi lwáanze lubone kuhola.’
25 “Náho, Ibrahímu yaámusubiza, ‘Mwaana waanze, oyizuke nkokwo okabonesa amagaambo mazima omuobulami bwáawe, na Lazáaro, akabonesa amábi. Náho óobu, weényini naahumuzwa áaha, neewe nooyagalala bwooli. 26 Hamo na áago, hali íichwe néemwe, hatiilwéeho elíina liháango bwooli. Obubaho bwe elíina ni biti, áabo abalikweenda kuluga kunu kuzeenda hali íimwe, na áabo abalikweenda kuluga óokwo kwíiza hali íichwe, bataákuhicha kwaambukaho.’
27 “Óogwo ayaabele ali omuhíte yaágaamba, ‘Guuku, niinkusába omutume azeénde omúka hali táata, 28 habwo kuba nyinabo badugu baanze batáanu, abone kubahana bataákwiiza bakéeza kunu ha lyéebi byaágalazo ebisaagiliize.’ 29 Náho, Ibrahímu yaámusubiza, ‘Badugu báawe, beenágo amaandiko ga Musa na ababáasi. Baléke bagahuliilize áago!’
30 “Nawe yaámusubiza, ‘Mmahi, táata Ibrahímu! Náho, kibilaaba omuuntu kuluga omubafwíile akabazeendela, niho balaahuúngama ebiheno byáabo.’ 31 Ibrahímu yaámusubiza, ‘Áabo badugu báawe, kabaláaba batagahuliliíze amaandiko ga Musa na ababáasi, tibaákubyéetaho nóobwo kayaakuba naazóoka omuuntu kuluga omubafwíile kuzeenda kubakoonza koonza.’ ”