Omugani Gwe Entaama Eyaabuzile
15
1 Echilo chimo, abahaámbya na abeene ebiheno abaandi, bóona bakakóba hali Yeézu, bamuhuliilize. 2 Chaaletelela Abafalisayo na abeégesa be ebilagilo bya Múungu, baádugulima baáti, “Omuuntu óogu, leeba naabaangisa abeene ebiheno! Kaandi naálya hamo nábo!”3 Habwéecho, Yeézu yaabachweela omugani, yaágaamba, 4 “Tugaámbe oómo omuli íimwe ayina entaama igana. Kaálamanya nkokwo eémo yaázo yaábula, naakola chiíha? Ngási, takuzileka éezo makumi mweenda na mweenda omumaliísizo, no kuzeenda kuziloondela éezo eyaábula, kuhicha azibone? 5 Obuchilo naazibona, naazisutula hamabega ahamanulilwa, 6 no kuziléeta omúka. Áaho naabeéta banywáani boómwe na abatúuzi, no kubagaambila, ‘Tunulilwe hamo neenye, habwo kuba entaama yaanze, éezo eyaabuzile, naázibona!’ 7 Niimbagaambila, bityo nikwo halibaho amanulilwa maháango omwiigulu, obuchilo owe ebiheno oómo kaalikuhuúngama ebiheno byoómwe, kuchila áabo makumi mweenda na mweenda abeene entúungwa nzima, áabo tibakusáaswa kuhuúngama ebiheno byáabo.”
Omugani Gwe Empilya Eyaabuzile
8 “Nali tugaámbe omukazi oómo ayina empilya ikumi zo obukáani,a mala yaabúuza eémo. Ngási takukoongeza olumuli, no kukukuumba éenzu yóona, omukuziloondela aha habweeyomeleza kuhicha azibone? 9 Obuchilo alaazibona, naabeéta abanywáani boómwe na abatúuzi, no kubagaambila, ‘Tunulilwe hamo, habwo kuba empilya éezo eyaabuzile, naázibona!’
10 “Niimbagaambila, bityo nyini heena amanulilwa omuméeso ga maléeka ba Múungu, obuchilo owe ebiheno oómo kaáli kuhuúngama ebiheno byoómwe.”
Omugani Gwa Táata Owe Echiganyizi Chiinzi
11 Yeézu akazeendelela kugaamba, “Hakaba heenaho omuuntu oómo, óogwo akaba ayina abatábani bábili. 12 Omuto, yaaza ahali iíse yaámugaambila, ‘Táata, iímpa obuhuúnguzi bwaanze.’ Habwéecho, Isebo yaábagabila amabonwa goómwe.
13 “Kabyaahiíngwiile ebilo bíche, óogwo omuto yaakobya kobya ebiintu byoómwe byóona, yaazila oluzeendo yaázeenda éensi ya hala. Obuchilo káyaahikile óokwo, yaabaanza kubisiisagula ebiintu byoómwe aha kubilya kúbi. 14 Kayaámazile empilya zóona, heeza enzala mpaango omuunsi éezo, nawe yaaba atéena choóna chóona. 15 Habwéecho, yaázeenda yaakwaátaangana no omuuntu oómo wo óokwo, yaámusaba nkokwo aábe omuhalila woómwe. Óogwo muuntu, yaamutuma omumusili kuliisa empunu zoómwe. 16 No obuchilo empunu zikaba nizilya ebisusu, na weényini akalumwa enzala yaaligila kubilya! Náho taliho omuuntu óogwo ayamuheele choóna chóona echookulya.
17 “Hamuheleeluko, akabaanza kwiizilwa amasala, omukuteékuza aáti, ‘Abahalila ba táata, leeba bóona nibalya, mpaka nibaháaga no kubisigaza! Náho áaha, niínfwa habwe enzala. 18 Óobu niinsúba hali táata, no kumugaambila, “Táata, naámuheníile Múungu, na naákuheníile íiwe kaandi. 19 Tiinkwiílwe kaandi kwéetwa omwaana wáawe. Habwéecho, onkole nko oómo wa abahalila baawe.” ’ 20 Mbweenu, yaalugáho áaho, yaásuba hali iíse. Obuchilo akaba acháali achili hala no omúka, iíse yaámubona, omuganya gwoómwe gweezulwa ne echiganyizi. Ahonyini yaámwiílukiilila omutabani, yaámubuúmbatila no kumunyweégela. 21 Óogwo mwaana, yaámugaambila Iíse, ‘Táata, naámuheniile Múungu, na naákuheníile íiwe kaandi. Tiinkwiílwe kaandi kwéetwa omwaana waawe.’
22 “Náho, Iíse yaábagaambila abahalila boómwe, ‘Bwaangu! Mulete enkaanzu enduunzi mumuzwéeke. Mumuzwéeke empeto omulukumu lwoómwe,b ne ebilaátu omumagulu. 23 Muleéte éezo enyána enduunzi, muzibáage. Tukole amazenyi, tulye ha manulilwa, 24 habwo kuba óogu mwaana waanze, abele abuzile, náho óobu yaábonekana, abele ali nka afwíile, óobu kaandi ali mwooyo!’ Niho áabo bóona baabaanza kukola amazenyi ga amanulilwa.
25 “Omubuchilo óobwo, óogwo omutabani omukúlu, akaba ali omumusili. Obuchilo yaabele naasuba yeélilila omúka, akahulila nkokwo abaantu nibazina no kunegula. 26 Yaámweeta omuhalila oómo, yaámubúuza, ‘Heena chiíha?’ 27 Yaámugaambila, ‘Mulumuna wáawe yéeza, na Iíso yaamubaagila enyána enduunzi, habwo kuba yaámubona omutabani, kaandi, achili mwooyo.’ 28 Óogwo musígazi omukúlu yaásáaya, yaáyaanga kutaahamo omúka. Iíse yaasohola ahéelu, yaaba naamusaba ataáhemo.
29 “Náho, weényini yaámusubiza, ‘Táata huliiliza! Emyáaka miinzi mba niinkuheéleza, kaandi tiínkalekileho kukoondokela ebilagilo byaawe nóobwo entulo eémo! Halíinye, tokaampéele nóobwo omwaana gwe embuzi, mbone kukola amazenyi hamo na banywáani baanze. 30 Náho omwaana wáawe óogu, óogwo asiisagwiile amabonwa gaawe aha busihani, obuchilo kwoónka yéeza, waamubaagila weényini enyána enduunzi!’
31 “Iíse yaámugaambila, ‘Mwaana waanze, íiwe otúula hamo neenye buchiile, na amabonwa góona gi nyinago na agaáwe. 32 Náho mulumuna wáawe, nituhikiililwa tumukolele amazenyi no kunulilwa hamo. Habwo kuba óogu mwaana waanze, abele abuzile, náho óobu yaábonekana, abele ali nka afwíile, óobu kaandi ali mwooyo!’ ”