Obukúlu Bwa Amazima
(Mariko 9:33-37; Luka 9:46-48)
18
1 Obuchilo óobwo, abaheémba ba Yeézu baamwiizáho, baámubuuza báti, “No oóha mukúlu kuchila abáandi bóona omu obukáma bwo omu igulu?” 2 Yeézu yaamweeta omwaana muto, yamwéemeleza ahagáti yáabo, 3 yaábagaambila aáti, “Mazima nniimbagaambila, keelaaba mutakuhiinduka no kuba nka abaana bato, nakáti timukutáaha omubukáma bwo omu igulu. 4 Bityo, omuuntu weéna wéena ali kwéecheesha nko omwaana omuto óogu, óogwo niwe naába mukúlu omubukáma bwo omu igulu. 5 Kaandi, omuuntu weéna wéena ogwo alikumwaángisa omwaana muto nko óogu ahabwi izíina lyáanze, naanyaangisa íinye.”Ebikaamo Habwe Ebileengeso
(Mariko 9:42-48; Luka 17:1-2)
6 “Náho kaálaaba aliho omuuntu ogwo ahabisize oómo omu bato áaba abalikunyikiliza, akamuleételela ahene, ni hachili hali weényini akomwe olubeengo luháango omu bicha no kunagwa omu chitubi che enziba, kuchila Múungu óokwo alaamuchwaaziika. 7 Nimweélóoko yaanyu íimwe abaantu be éensi éezi, habwo kukola amagaambo áago galikuleételela abaantu kukola ebiheno! Ebileengeso nibyo nibyeendelwa kubaho, náho nelóoko ha muuntu ogwo alikubileételela ebileengeso éebyo! 8 Keelaaba elye engalo yaawe nali no okugulu kwáawe nikwo kulikuleételela kukola ebiheno, okunogole no okukunaga hala. Ni hachili kuza omu bulami bwo obucha no obuchiile obuchilo oyina obulema, kuchila kuba ne engalo zóona ibili nali amagulu góona ábili, náho okanagwa omu mulilo gwo obucha no obuchiile. 9 Kaandi, kililaaba ne eliíso lyáawe nilyo lilikukuleételela kukola ebiheno, olikule no kulinaga hala! Ni hachili kuza omu obulami bwo bucha no buchiile obuchilo oyina eliíso límo lyoónka, kuchila kuba na méeso góona ábili, náho okanagwa omulyoongoola lyo omulilo gwa kuzimu.”
Omugani Gwe Entaama Ebuzile
10 Yeézu yaazeendelela kubasoomboolela aáti, “Mube méeso, mutakugaya oómo omu abato áaba! Niimbagaambila ityo, habwo kuba maléeka báabo bo omu igulu óokwo, obuchilo bóona bali omuméeso ga Táata wo omu igulu. [ 11 Íinye, Omutábani wo Omuuntu, nkeeza omuunsi mbone kubachuungula abaantu áabo baáhabile.]
12 “Nimubona muta? Kaálaaba omuuntu ayina entaama igána límo, ne eémo omuli éezo ebuzile, naakola aáta? Iínti naazileka entaama makúmi mwéenda na mwéenda omu ibaanga, no kuzeenda kuloondela éezo eémo ebuzile? 13 Mazima nniimbagaambila, kaálaazibona, naanulilwa bwooli habwe entaama éezo eémo, kuchila entaama éezo makúmi mwéenda na mwéenda éezo ezitalabuzile.
14 “Bityo nyini, Isíimwe ogwo ali omu igulu, takwéenda nka nikwo nóobu oómo omu abato áaba abule.”
Kazeendele Kwo Kuhaana Ogwo Abuzile
15 “Kaálaaba omwiikiliza muzeenzi waawe akuheniile, zeénda omuhane obuchilo muli bábili mweénka. Kalakuhulila, mbweenu nooba wabona kaandi omwiikiliza muzeenzi waawe. 16 Náho kaálaaba takakuhuliile, zeénda omutwáale omuuntu oóndi oómo nali abaantu bábili babone ‘kubaho baalubona bábili nali básatu bo kwaátula buli chiintu.’a 17 Na kaálaaba takubahuliliza áabo, zeénda kuziingaambila ekelezia. Kaálaabula kuzihulila ne ekelezia, mbweenu mumuleebe nkóokwo mumuleebaho ogwo atakwiikiliza Múungu nali óogwo ali omuhaámbya.
18 “Mazima nniimbagaambila, góona áago mulikoma omuunsi éezi, náwe Múungu naába yaágakoma kuluga omu igulu. Kaandi, góona áago mulaagakomoolola omuunsi éezi, náwe Múungu naába yaágakomoolola kuluga omu igulu.b 19 Mazima nniimbagaambila kaandi nka nikwo, keelaaba bábili omuli íimwe bakakuundilana omuunsi éezi kusaba echigaambo bunaanka, Táata ogwo ali omu igulu naabakolela echigaambo éecho. 20 Habwe ensoonga, keelaaba baliho nóobu abaantu bábili nali básatu áabo bakobile habwi izíina lyáanze, ne íinye nibaho áaho hamo nabo.”
Omugani Gwo Omuuntu Ogwo Atakuganyila
21 Niho Peétero yéeza hali Yeézu, yaámubuuza aáti, “Íiwe Mukáma, kaálaaba omwiikililiza muzeenzi waanze anheniile, ninyeendelwa kumuganyila entulo ziingahi? Nóobu kuguma kumuganyila entulo musaanzu?” 22 Yeézu yaámugalulila aáti, “Ninkugaambila, te entulo musaanzu kwoónka, náho omuganyile muzeenzi waawe obuchilo bóona hatéena kupeeta.c
23 “Niimbagaambila ntyo, habwo kuba obukáma bwo omu igulu nibususana no omugani óogu. Akaba aliho omukáma oómo ogwo akazeenda kupéeta aha bazáana bo obukáma bwoómwe. 24 Obuchilo omukáma yabaandize kupeeta, yaaletelwa omuzáana oómo ogwo akaba natoongwa empilya nyiinzi bwooli, nke etalaanta ebihuumbi ikumi.d 25 Omuzáana óogwo taladulize kuliha ibáanza éelyo akaba natoongwa. Niho omukáma yaábalagila nka nikwo omuuntu óogu aguzwe hamo na omukázi woómwe, abaana boómwe ne ebiintu byóona éebyo akaba ayiinabyo, abone kuliha.
26 “Óogwo omuzáana yaateela ebizwi omuméeso go omukáma, yamuneémbelela nka nikwo, ‘Niinsaba onzilile obweeyomeleza, nniinkuliha ibáanza lyáanze lyóona!’ 27 Niho, omukáma wo óogwo muzáana yaamuzilila echiganyizi, yaamulekula, ni ibáanza, yaálimuganyila.
28 “Obuchilo omuzáana óogwo yaasohola ahéelu, yaamusaanga omuzáana muzeenzíwe ogwo akaba amutiilize okubalilila kwe edináali igána límo.e Ahonyini, yamukwáata omu malaaka, yaámugaambila nka nikwo, ‘Liha ibáanza lyóona éelyo naakutiílize!’ 29 Omuzáana muzeenzíwe yaateela ebizwi omuméeso goomwe, yaámuneémbelela nka nikwo, ‘Niinsaba onzilile obweeyomeleza, nniinkuliha ibáanza lyáanze lyóona!’ 30 Náho yaáyaanga, yaazeenda kumuboha muzeenzíwe omu ibóhelo, kuhicha obuchilo óobwo aliliha ibáanza lyoómwe.
31 “Obuchilo abazáana bazeenzíbe kábaabweene ebyáagwa, baázololokwa bwooli omu miganya yáabo. Niho baazeenda ha mukáma wáabo no kuteékelela byóona óokwo byaabeelého. 32 Niho omukáma kumwéeta omuzáana ogwo yaamuganyíile ibáanza lyoómwe, yaámugaambila nka nikwo, ‘Iiwe olyo omuzáana omuzilwa! Leeba, obuchilo waantooziile nka nikwo nkuganyile ibáanza lyáawe, nkakuganyila lyóona! 33 Ngási, iiwe tokuhatikwa kumuzilila echiganyizi omuzáana muzeenzi waawe, nko óokwo iinye nakuziliile iiwe echiganyizi?’
34 “Mbweenu, omukáma achaáhala bwooli, amuta omungalo za ababohi bamuteéyeeche, kuhicha obuchilo óobwo aliliha éelyo ibáanza lyóona.”
35 Niho, Yeézu yaamala habwo kugaamba aáti, “Musoomboókelwe nka nikwo nóobu Táata ogwo ali omu igulu, naabakolela neemwe bityo nyini, keelaaba mutakuganyila buli mudugu muzeenzi wáanyu aha miganya yaanyu yóona.”