Yeézu Naahiinduka Kúundi Omuméeso Ge Entumwa
(Mariko 9:2-13; Luka 9:28-36)
17
1 Obuchilo byaáhiingwiile ebilo mukáaga, Yeézu yeemucha Peétero, Yakobo na Yohana omulúmuna wa Yakobo. Yaahanama nabo omwiibaanga lila, ahaantu hakaba hatéena baantu. 2 Obuchilo bali áaho, Yeézu yaabahiinduka kúundi ensuso yoómwe. Obuso bwoómwe bwáayaka nki izooba ne ebizwáalo byoómwe byaáyela bwooli nko omwaanga gwi izóoba. 3 Ahonyini, baábona ababáasi Musa na Eliya nibahooya náze.4 Niho Peétero yaámugaambila Yeézu aáti, “Íiwe Mukáma, ni kuluunzi nka nikwo tuli áaha. Kolaayeenda, twoombeka áaha otutiindi tuche túsatu. Kámo kabe akaawe, akaandi kabe aka Musa, na akaandi kabe aka Eliya.”
5 Obuchilo Peétero atakamazile kuhoóya, ahonyini leeba, lyeeza elíile éelyo lilikwéengelela lyaabasweekelela. Niho bahulila iláka kuluga omu líile éelyo niligaamba liti, “Óogu niwe Mutábani wáanze engaanzi, óogwo nnyesiimaho muno. Mumuhuliilíze weényini!”
6 Obuchilo abaheémba boómwe bahuliile áago, baátíina bwooli, baagwa ahaansi buzuúma. 7 Yeézu yeelila héehi nabo, yaabakwaataho, yaábagaambila aáti, “Mwiimeelele, mutatiina!” 8 Obuchilo baayinamwiile améeso gáabo, baabona tihachiina muuntu náho yaásigeeleho Yeézu weénka.
9 Obuchilo bakaba nibatuuka omu ibaanga áaho, Yeézu yaábalagila aáti, “Mutaákwiiza kumugaambila omuuntu weéna wéena áago mwaagabona kuhika obuchilo óobwo íinye, Omutábani wo Omuuntu, ndaázoolwa kuluga omu bafwiile.”
10 Abaheémba áabo baámubuuza báti, “Habwaáchi abeégesa be ebilagilo nibagaámba nka nikwo, neeyeendelwa Eliya kwiiza ahakubaanza Kristu atakezile?” 11 Yeézu yaábasubiza aáti, “Nikwo bili, Eliya naayeendelwa kwiiza ahakubaanza abone kugata kuzima amagaambo góona. 12 Kaandi, nniimbagaambila nka nikwo Eliya yaámazile kwiiza, náho abaantu tibalamusoombookilwe, baamukolela chibayeenzile. Bityo nyini neenye Omutábani wo Omuuntu, nniinyagalazwa omu ngalo záabo.” 13 Niho abaheémba boómwe basoombookelwa nka nikwo Yeézu akaba naahoóyela habwa Yohana Omubatiza.
Okwiikiliza Kwa Amazima Nikuhicha Byóona
(Mariko 9:14-29; Luka 9:37-43)
14 Obuchilo Yeézu na abaheémba boómwe áabo kabaahikile aha embága éezo ya abaantu, omuuntu oómo yéeza hali Yeézu, yatéela ebizwi. Yaagaambila Yeézu aáti, 15 “Íiwe Mukáma, nniinsaba omuzilile echiganyizi omwaana wáanze! Agwa ebisiimbo, ne endwáala éezo emukola ayagalale kubi bwooli, kuba entulo nyinzi tayosa kweéchekula omu mulilo nali kweénaga omu meenzi. 16 Ndamuleétiile abaheémba baawe babone kumuchiiza, náho alabalemile.”
17 Yeézu yaásubya aáti, “Íimwe abaantu bo oluzáalo lwo kwáanga kwiikiliza, lwaamazile lukatumaanga kubi, ndyaáheleza nkahi kubeékalamo? Ndyaabegumisiliza kuhelezali? Mumulete áaha omusigazi óogwo!” 18 Obuchilo bakéeza náze, Yeézu yaalagila izimu elyo likaba lili omuli weényini, nalyo lyaalugámo. Ahonyini, omwaana yaachila.
19 Niho abaheémba ba Yeézu baamwiizáho aha kabazu, baámubuuza báti, “Habwaáchi íichwe tukalemwa kuliihamo izimu éelyo?” 20 Náwe yaábasubiza aáti, “Na habwo kuba nimucheehelelwa okwiikiliza kwéenyu. Mazima nniimbagaambila, kamwaakubele mwiina okwiikiliza okubalilila nko oluzuma luche lwe ehaladaali, mukaáligaambila ibaanga éeli nka nikwo, ‘Lugaho áaha, ozeénde áaho,’ nalyo lizeenda. Bityo tichiliho echiintu éecho chilaabalema. [ 21 Hamo na áago, izimu nke éelyo tilikuhicha kubiingwa, náho kwoónka aha muháanda gwo kusaba Múungu ne echisiibo che ebyookulya.]”
Yeézu Naahoóyela Kaandi Habwo Okufwa No Kuzooka Kwoómwe
(Mariko 9:30-32; Luka 9:43-45)
22 Obuchilo Yeézu akaba ali hamo na abaheémba boómwe omuli Galiláaya, yaábagaambila aáti, “Íinye Omutábani wo Omuuntu, nibaanta omu ngalo za abaantu na nibanyita. Náho echilo cha kásatu, Múungu naanzoola.” 23 Abaheémba boómwe kábaahuliile áago, baázuzubalilwa bwooli.
Yeézu Naaliha Oluhaambwe Lwe Éenzu Ya Múungu
24 Obuchilo Yeézu na abaheémba boómwe kábaahikile omuli Kaperinaumu, abaantu bunaanka abaabele nibatobesa oluhaambwe habwe éenzu ya Múungu,a beeza hali Peétero. Baámubuuza báti, “Ngási, omweégesa wáanyu náwe aliha oluhaambwe lwe éenzu ya Múungu?” 25 Peétero yaabagalulila aáti, “Nikwo bili, aliha.”
Niho yaataaha omuunzu. Náho acháali Peétero atakagaambile echigaambo choóna chóona, Yeézu yaabaanza kumubuuza aáti, “Íiwe Simoni, iiwe noobona oóta? Abakáma abo omuunsi éezi batobesa oluhaambwe kuluga aha abaana báabo nali kuluga aha abaantu abáandi?” 26 Peétero yaámugalulila aáti, “Nibatobesa kuluga aha abáandi.” Yeézu yaámugaambila aáti, “Keelaaba nikwo bili, mbweenu abaana báabo baganyiilwe kuliha oluhaambwe. 27 Náho tutaákwiiza kubaleételela kutamwa abaantu áaba, iiwe zeénda omu nyaanza, onage ilobo omu meenzi. Niho eénfwi yo kubaanza éezo olakwáasa, ozaásamule omunwa, nosaángamo óomwo eshekéeli.b Male ozitwáale eshekéeli éezo, ozeénde olihe oluhaambwe lwaanze no olwaáwe.”