Yeézu Naaleengeswa Akole Olumanyiso
(Mariko 8:11-13; Luka 12:54-56)
16
1 Niho Abafalisayo na Abasadukayo beeza hali Yeézu, baámuleengesa ha kumusaba akole olumanyiso kuboleka bonyini nka nikwo alugile omu igulu. 2 Yeézu yaábasubiza nka nikwo, [“Obuchilo bwo olweébazo, íimwe nimuhicha kugaamba muti, ‘Nyeéncha obwíile nibuchaze, habwo kuba igulu lyaátukula.’ 3 Kandi obuchilo bwe enchaákala nimuhicha kugaamba muti, ‘Leélo omuyaga nigwiíha, habwo kuba igulu litukwiile no bwíile buhiikile.’ Bityo kási, íimwe nimumanya kusombookelwa akaleebele ko obwiile, náho nimulemwa kweétegeeleza emanyiso za akachilo!] 4 Íimwe no oluzáalo lubi lwa abaantu abaheni na timuli abeésigwa omuméeso ga Múungu, niyo nsoonga nimweénda olumanyiso. Tiínkubakolela olumanyiso lwoóna lwóona. Náho olumanyiso lumo óolwo mulaabona ni nkóokwo Múungu akakola aha mubáasi Yona.” Niho Yeézu yaabalugaho, yaázeenda.Ameégeso Ge Ebisuba Ga Abafalisayo Na Abasadukayo
(Mariko 8:14-21)
5 Mbweenu, abaheémba ba Yeézu bayaambuka buseeli bwe enziba, náho bakeebwa kuzeenda ne emikaate. 6 Yeézu yaábagaambila aáti, “Mube méeso, mweécheenge ni itúumbyo lya Abafalisayo na Abasadukayo.” 7 Abaheémba boómwe babaanza kuteekateeka báti, “Naagaámba aátyo habwo kuba titwaáleta emikaate.”
8 Yeézu akamanya éebyo bakaba nibateékateéka, yaágaamba aáti, “Íimwe abaantu bo okwiikiliza kuche! Habwaáchi íimwe nimuteékateéka mweénka nka nikwo mutéena emikaate? 9 Kuhika óobu, mucháali kusombookelwa? Timukwiizuka nka nikwo abaantu ebihuumbi bitaanu bakahaaga emikaate éezo itáanu? Amasaaga mukeezuza ebitukulu biingahi? 10 Nali timukwiizukila aha emikaate éezo musaanzu ha baantu ebihuumbi bína? Amasaaga mukeezuza ebitukulu biingahi? 11 Habwaáchi mwaasingwa kusombookelwa nka nikwo áago naagaamba ti habwe emikaate? Mbweenu, éecho ndikugaamba ni nka nikwo, mweécheenge ni itúumbyo lya Abafalisayo na Abasadukayo.” 12 Niho, abaheémba boómwe kusombookelwa nka nikwo akaba atakuhooyela ha kweécheenga ni itúumbyo lyo kutuumbisa emikaate, náho ha kweécheenga na ameégeso ge ebisuba ga Abafalisayo na Abasadukayo.
Peétero Naayikiliza Nka Nikwo Yeézu Niwe Kristu
(Mariko 8:27-30; Luka 9:18-21)
13 Obuchilo Yeézu yaahikile ahalubazu lwe echaalo ahakaba niheétwa Kaizaalia-Filipi, yaábabúuza abaheémba boómwe aáti, “Abaantu nibagaámba nka nikwo, Omutábani wo Omuuntu, no oóha?” 14 Baámusubiza báti, “Abáandi nibagaámba nka nikwo iiwe niwe Yohana Omubatiza, abáandi nibagaámba nka nikwo iiwe niwe Eliya na abáandi nibagaámba nka nikwo iiwe niwe Yeremia nali, oli oómo wo omuli áabo ababáasi ba Múungu.”
15 Yeézu yaábabúuza aáti, “Ngási, néemwe nimugaámba íinye ndi oóha?” 16 Simoni Peétero yaámugalulila aáti, “Iiwe níiwe Masiya,a Omutábani wa Múungu ogwo ali omulame.”
17 Yeézu yaámugaambila Peétero aáti, “Íiwe Simoni mutáani wa Yona, oyine omugisa, habwo kuba táliho omuuntu weéna wéena ayaákufuundulila amazima áago, náho ni Táata owo omu igulu. 18 Neenye nniinkugaambila nka nikwo iiwe niwe Peétero,b na aha luchili óolu, niho ndaayoombeka ekelezia yaanze, na amagala go olufu tigakuzisiinga nakáti. 19 Ndaákuha iiwe hanu enchiínguzo zo obukáma bwo omu igulu, na góona áago olikoma omuunsi éezi, náwe Múungu naába yaágakoma kuluga omu igulu. Kaandi, góona áago olikomoolola omuunsi éezi, náwe Múungu naába yaágakomoolola kuluga omu igulu.”c 20 Niho Yeézu yaábahana abaheémba boómwe nka nikwo, bateéza kumugaambila omuuntu weéna wéena nka nikwo weényini niwe Masiya.
Yeézu Naahoóyela Habwo Okufwa No Kuzooka Kwoómwe
(Mariko 8:31-9:1; Luka 9:22-27)
21 Kulugiilila akachilo áako nyini, Yeézu yaabaanza kubateékelela abaheémba boómwe butúnu nka nikwo, “Ni lwaampaka nzeénde omuli Yeruzaléemu, no kubona ebyaágalalo byo obusaasi bwiinzi. Kaandi ni lwaampaka nnyagalazwe na abanyaampala ba Abayahudi, na abakúlu ba abagabe ba Múungu na abeégesa be ebilagilo bya Musa, kuhicha nnyítwe. Náho echilo cha kásatu, mazima Múungu alyaánnzóola.” 22 Niho, Peétero yaatwaala Yeézu halubazu, yaabaanza yaámuchaáhukila aáti, “Íiwe Mukáma, Múungu agahigize áago hala! Gataákwíiza gakakusaanga iiwe áago!” 23 Náho Yeézu yaamuhiindukila Peétero, yaámugaambila aáti, “Íiwe Izimu Elikúlu, galuka enyuma yaanze! Noleengesa kunyaángila kukola engoonzi za Múungu, habwo kuba, ebiteekuzo byaawe ne bya abaantu kwoonka náho tibya Múungu.”
24 Mbweenu, Yeézu yaábagaambila abaheémba boómwe aáti, “Kaálaaba omuuntu weéna wéena naaloonda kuba omuheémba waanze, naayeendelwa aleke kukuláatila ebiteékuzo byoómwe, asutule omusalaba gwoómwe, ankuláatile. 25 Omuuntu ogwo alikweenda kuchiza obulami bwoómwe, niwe alyaábubuza. Náho omuuntu ogwo alibuza obulami bwoómwe habwaánze, óogwo niwe alaabubonesa. 26 Nyini omuuntu abona mugaso chi kaálaaba yabweene ebiintu byóona bye éensi éezi, náho abulize obulami bwoómwe? Táliho chiintu éecho nichihicha kumusubiza obulami bwoómwe. 27 Omutábani wo Omuuntu, aleeza hamo na maléeka boómwe omu ikuzo lye Eése. Niho aliheela kati muuntu kwiingana ne ebikolwa byoómwe. 28 Mazima nniimbagaambila nka nikwo, baliho omuli íimwe áaha áabo tibakufwa bachaali no kubona íinye Omutábani wo Omuuntu ninyiza omubukáma bwáanze.”