Yeézu Naayaánga Ameégeso Ga Abafalisayo
(Mariko 7:1-13)
15
1 Niho, Abafalisayo na abeégesa be ebilagilo bya Musa bakaluga Yeruzaléemu beeza hali Yeézu, baámubuuza báti, 2 “Habwaáchi abaheémba baawe nibahenela engeso éezo besiichwe enkúlu bakatusigila? Habwaáchi nibalya ebyookulya obutanaaba engalo záabo nka nikwo elikweendelwa!”a3 Yeézu yaábagalulila aáti, “Habwaáchi neemwe nimuhenela ebilagilo bya Múungu habwo kukulaatila engeso zaanyu? 4 Múungu akagaamba, ‘Obakúze iíso na nyoko.’b Kaandi akagaamba, ‘Weéna wéena ogwo alikuzuma iíse nali nyina, kufwa na afwe.’c 5 Náho íimwe nimugaámba nka nikwo, omuuntu naayikililizibwa kumugaambila iíse nali nyina nka nikwo, ‘Ebiintu éebyo ebilikukugasa iinye kukuhweela, naámazile kubisohoza ahali Múungu nke echitáambo.’ 6 Bityo nimweegesa nka nikwo omuuntu takweendelwa kumukúza iíse nali nyina. Nikwo musuúcha echigaambo cha Múungu habwo kukulaatila engeso zaanyu. 7 Íimwe ngóbya mwe! Waza omubáasi Isaya éecho akalaanga ha bwéenyu, ne cha mazima, nka nikwo,
8 ‘Abaantu áaba nibaankúza aha lulimi kwoónka,
náho emiganya yáabo eli hala neenye.
9 Nibanyeseénga busa,
habwo kuba amagaambo áago balikweégesa ne ebilagilo bya abaantu.’d”
Amagaambo Agalofola Omuuntu
(Mariko 7:14-23)
10 Niho, Yeézu kwéeta embága ya abaantu, yaábagaambila aáti, 11 “Nimuhuliilíze mweétegeleze, na musoomboókelwe amagaambo áago ndikubagaambila! Echiza omukanwa ticho chimulofola omuuntu. Náho, amagaambo áago nigaluga omukanwa koómwe, nigo agali kumukola omuuntu kuba omulofo.”
12 Niho abaheémba ba Yeézu baazeenda hali weényini, baámubuuza báti, “Ngási noomanya Abafalisayo obuchilo bahuliile omulagi gwaawe, gukabatamisa bwooli?” 13 Yeézu yaábagalulila aáti, “Emimelo yoóna yóona éezo Táata wo omu igulu talazihaambile, nazinyukula. 14 Áabo nimubaleke, ne empume abalikweébeembelela empume! Manya, empume keeyebeembelela empume, bóona bábili nibagwa omu liina.”
15 Mbweenu, Peétero yaámugaambila Yeézu aáti, “Tugaambile entaahililo yo óogwo mugani.” 16 Yeézu yaágaamba aáti, “Neemwe timukasoombookiilwe? 17 Timumanya echiza omukanwa, ka chilabila omuunda chikazeenda chikanyeebwa? 18 Náho ebiluga omukanwa ko omuuntu, biba bilugile aha muganya gwoómwe. Éebyo nibyo ebilikumukola omuuntu kuba omulofo. 19 Omu muganya gwo omuuntu, óomwo niho biluga ebiteékuzo bíbi, byo obwíisi, obusegi, obuseégu, olukóno, obubona bwo kuteéleleza ebisuba ne ebizumi. 20 Góona áago, nigo gamukola omuuntu kuba omulofo. Náho omuuntu kulya ebyookulya atabaandize kunáaba engalo tikukumukola kuba omulofo.”
Okwiikiliza Kuháango Kwo Omukázi Ogwo Atali Omuyahudi
(Mariko 7:24-30)
21 Male, Yeézu yaalugáho áaho, yaazeenda obwaátana bwe ebyaalo bya Tíilo na Sidóoni. 22 Niho yaabugana na omukázi oómo, ogwo akaba ali Omukanaani wo omuchaalo éecho. Yeeza hali Yeézu, yaáyaambaza ahi iláka liháango aáti, “Íiwe Mukáma, Mutábani wa Daudi, onzilile echiganyizi! Muhala waanze atuungamiilwe bwooli ni izimu libi.”
23 Náho Yeézu talamugaluliile echigaambo choóna chóona. Niho, abaheémba boómwe baamwiizáho no kumusaba báti, “Omugaambile óogu mukazi azeénde, ha kuba naatukulaatila enyuma kunu naatuteelela eyoombo.” 24 Yaágalula aáti, “Múungu akaansiíndika habwa Abaiziraeli boónka, habwo kuba bali nke entaama éezo ezaáhabile.”
25 Omukázi óogwo yaamwiililaho Yeézu, yaateela ebizwi omuméeso goomwe, yaámusaba aáti, “Íiwe Mukáma, onzune!” 26 Yaámugalulila aáti, “Ti kuluunzi kwiimucha ebyookulya bya abaana no kubinagila éembwa.”e 27 Omukázi óogwo yaamuzila aáti, “Nikwo bili Omukáma, náho nóobu eémbwa nazo nizilya obulagalika óobwo obulagéele ahaansi kuluga aha meéza ya abakáma báabo.”
28 Yeézu yaámugalulila aáti, “Íiwe mukázi, oyina okwiikiliza kuháango! Chibe hali íiwe nka nikwo olikweenda.” Ahonyini, omuhala yaachila.
Yeézu Naachíza Abalwéele Béenzi
29 Yeézu yaaluga áaho, yaázeenda kulabila omuungeégeelo ye enziba ya Galiláaya. Yaahanama omu ibaanga no kwíikala óokwo. 30 Ebipípi biháango bwooli byaázeenda hali Yeézu, bamuletela enziíngami, abahume, abalema, abatita na abalwéele abáandi béenzi. Abaantu áabo baabata abalwéele áabo héehi na amagulu ga Yeézu, náwe yaábachiza. 31 Abaantu baásobelwa bwooli obuchilo kábaabweene abatita nibagaambagáamba, abalema bachizile, enziíngami nizilibata na abahume nibahweéza. Baabaanza kumukúza Múungu wa Abaiziraeli.
Yeézu Naaliísa Obusaago Bwa Abaantu Ebihuumbi Bina
(Mariko 8:1-10)
32 Niho Yeézu yaayeta abaheémbabe, yaábagaambila aáti, “Nniimbazilila echiganyizi abaantu áaba, habwo kuba tweékeele nabo ebilo bísatu tibachiina choóna chóona echookulya. Tiínkweenda mbalage bazeénde beena enzala, bateéza bakalába bakagwa omu muháanda.”
33 Abaheémba boómwe baámugaambila báti, “Tuli omu iluungu, na abaantu ni béenzi bwooli. Ngási, tukaáhicha kubonesa nkáhi emikaate éezo ehikile ha kubahaagisa bóona?” 34 Yeézu yaábabúuza aáti, “Mwiina emikaate engáhi?” Baámusubiza báti, “Twiina emikaate musaanzu no otufwi tufwi tuche kwoónka.”
35 Mbweenu, Yeézu yaalagila abaantu bóona nka nikwo beekale ahaansi. 36 Yeemucha emikaate musaanzu éezo ne eénfwi éezo, yaasiima Múungu. Niho, yaabiheendamo, yaabaanza kubaha abaheémba boómwe, nabo abaheémba baaheeleleza embága ya abaantu. 37 Abaantu bóona baálya, baáhaaga. Niho, abaheémba baatulaaniza amasaaga, beezuza ebitukulu musaanzu. 38 Abaantu áabo abalíile ebyookulya éebyo bakaba bali abaseeza ebihuumbi bina, batéena kupeeta abakázi na abaana. 39 Mbweenu, Yeézu yaábalaga abaantu áabo, yaataaha omu obwaato, yaazeenda omu chaalo cha Magadani.