Olufu Lwa Yohana Omubatiza
(Mariko 6:14-29; Luka 9:7-9)
14
1 Obuchilo óobwo, omukáma Herode Antipasi akaba ali omutégeki wa Galiláaya. Obuchilo yaahuliile ebikolwa éebyo Yeézu akaba naakola, 2 yaábagaambila abahalila boómwe aáti, “Omuuntu óogwo ni Yohana Omubatiza! Lúundi yaázoolwa kuluga omu bafwiile! Niyo ensoonga ayina obuzizi bwo kukola amahano.”3 Herode akahooya aátyo, habwo kuba akaba amukwaasile Yohana, yaámukoma no kumuta omwi ibóhelo. Akaba amubohile, habwa amagaambo ga Yohana habwo okusweelana kwo mwa Herode na Herodia. Herodia óogwo, aha bubaandizo akaba ali muka Filipo, ali mweene wáabo na Herode. 4 Ha bwéecho, Yohana akaba naamusoomboólela Herode aáti, “No omuzilo omuméeso ga Múungu kumusweela omukázi wa mudugu wáawe.”a 5 Mbweenu, Herode akaba naloondela omuháanda gwo kumwíita Yohana, náho akaba natiína abaantu, habwo kuba bakaba nibamuleeba Yohana nko omubáasi wa Múungu.
6 Obuchilo bwa amazenyi go kuzaalwa kwa Herode, enkuuba ali muhala wa Herodia yéeza kunegula omuméeso ga abazenyi. Herode akanulilwa bwooli. 7 Niho yaalahila kumúha choóna chóona éecho alaamusaba. 8 Omuhalákazi óogwo yahaniililwa na nyina, yaámugaambila Herode aáti, “Oómpe omutwe gwa Yohana Omubatiza aha lutemele lwe embaáhu.”b 9 Omukáma Herode yaázuzubalilwa bwooli, náho habwo okulahila omuméeso ga abazenyi boómwe, yaalagila nka nikwo omuhala aheébwe. 10 Mbweenu, Herode yaasiindika omuuntu azeénde omwiibóhelo, náwe yaamutema omutwe Yohana. 11 Niho yaasuba no omutwe gwa Yohana omu lutemele lwe embaáhu, yaágumuheéleleza omuhala óogwo, náwe yaagumutwaálila nyina. 12 Obuchilo abaheémba ba Yohana baahulíile empola éezo, beeza kusutula omutúumbi, baazeenda kuguziika. Kabamazile, baazeenda kuteékelela Yeézu góona áago agabeele.
Yeézu Naaliísa Abaantu Ebihuumbi Bitaano No Obusaago
(Mariko 6:30-44; Luka 9:10-17; Yohana 6:1-14)
13 Ahonyini, Yeézu kayaahuliize áago, yaalugáyo kuliinya, yaalaba omu bwaato, yaaza bweeseleke omumwaanya ogutalimo abaantu. Náho obuchilo ebipípi bya abaantu byaahuliize ahaantu áaho akaba naazeénda, baaluga omu maboma gáabo, baábalama lwa amagulu kumukulaatila Yeézu. 14 Náwe káyaahikile, yaabona embága mpaango ya abaantu, yaábaganyila, yaachiza abalweele. 15 Izooba kalyaaheenzile omukóno, abaheémba boómwe beeza baámugaambila Yeézu báti, “Áaha tuli no omu chituuntu no obuchilo bwaázeenzile. Laga abaantu áaba, beezeendele omu migoongo beegulile ebyookulya.” 16 Yeézu yaábagalulila aáti, “Batwaálweyo chi? Íimwe, nimubahe ebyookulya.” 17 Nabo baámusubiza báti, “Titwíina chi twiinacho! Sána twiinayo emikaate itáanu ne eénfwi ibili zoónka.” 18 Yeézu yaábagaambila aáti, “Nimubiindeétele áaha.” 19 Mbweenu, yaálagila ebipípi éebyo bya abaantu beekale ahaansi, aha mwaalilo gwo obunyaansi aha byookulya. Yaayanaankula emikaate itáanu éezo ne eénfwi éezo ibili, yaalalamila omu igulu, yaámusiima Múungu. Niho yaázimenyula, yaáziha abaheémba boómwe emikaate hamo na eénfwi, nabo baábaheéleeza ebipípi éebyo bya abaantu. 20 Abaantu bóona baálya, baáhaaga. Niho, abaheémba boómwe baatwaala emisige, beezuza ebitukulu ikumi na bibili. 21 Abaantu áabo bakalya ebyookulya ebyo, bakaba bali abaseeza ebihuumbi bitaano, hatéena kupeeta abakázi na abaana.
Yeézu Naalibata Ahalugulu Ya Ameenzi
(Mariko 6:45-52; Yohana 6:15-21)
22 Ahonyini, Yeézu yaazemeleza abaheémba boómwe nka nikwo, bahaname omu bwaato, beebeembele kuzeenda buseeli bwe enziba, obuchilo óobwo weényini akaba achaálagana ne ebipípi bya abaantu. 23 Obuchilo Yeézu káyaamazile kulaga ebipípi éebyo bya abaantu, yaahanama omu ibaanga weénka kusaba Múungu. Obuchilo kiyahikile ensiimbaazi, akaba achiliyo óokwo omwi ibaanga weénka. 24 Obuchilo óobwo, obwaato bwaáhikile obuziba bwaateelwa omuyaga gwe eéntwe, habwo kuba enziba ekaba ebiíhile.
25 Omu ituumbi isisimuka lya kána Yeézu yaabezaho, naalibata aha nziba. 26 Obuchilo abaheémba boómwe kabaamubweene Yeézu naalibata ahalugulu ya meenzi, beétimwa bwooli, no kutéela empámo nibagaámba, “Éechi ne echiinyuma nyuma!”
27 Ahonyini, Yeézu yaábagaambila aáti, “Mutiímbye omuganya, mutatiina! Ni íinye.”
28 Peétero yaámugalulila aáti, “Íiwe Omukáma, kabilaaba ni iiwe mazima, ndagila nka nikwo nkwiizeho áaho oóli, kunu nniindibata ahalugulu ya meenzi.” 29 Yeézu yaámugalulila aáti, “Iíza!” Niho, Peétero yaalugamo omu bwaato, yaabaanza kulibata ahalugulu ya meenzi kuzeenda ahali Yeézu. 30 Náho akabona echiihule chiháango nichiíza, Peétero yaátiina bwooli, yaabaanza kutoontobela omu meenzi. Yaáyaambaza ahi iláka aáti, “Íiwe Mukáma, nchiza!” 31 Ahonyini, Yeézu yaagolola omukóno, yaamukwáata, yaámugaambila aáti, “Iiwe owo okwiikiliza kuche, habwaáchi obele oyina okutahwa tahwa?”
32 Obuchilo Yeézu na Peétero baaziile omu bwaato, haaba echineembe. 33 Mbweenu, abaheémba abaabele bali omu bwaato baámulamya Yeézu. Baágaamba báti, “Mazima, iiwe oli Omutábani wa Múungu!”
Yeézu Naachíza Abalwéele Ba Genezareti
(Mariko 6:53-56)
34 Obuchilo Yeézu na abaheémba boómwe bayaambukile enziba, baáhika omuunsi áaho hakaba niheétwa Genezareti. 35 Obuchilo abaantu ba ahaantu áaho baamumanyile nka nikwo ni Yeézu, baayatula empola zoómwe omuunsi éezo. Niho, abaantu beeza no kumuleétela Yeézu abalwéele báabo. 36 Nabo baámuleémbeleza Yeézu abakuúndile abalwéele bakoleho nóobu aha lukugilo lwe ebizwaalobye kwoónka. Niho abalwéele bóona áabo abaabele bákolaho, bakachila.