Yeézu Naayegesa Habwo Kuswéela No Kulekaana
(Mariko 10:1-12)
19
1 Obuchilo Yeézu káyaamazile kuhooya amagaambo áago, yaalugá Galiláaya, kuzeenda omuchaalo cha Yudea buseeli yo munóna gwa Yolodáani. 2 Ebipípi biháango byaaba nibimukulaatila óokwo, náwe yaachiza abalwéele abaabele bali omuli boónyini.3 Niho Abafalisayo bunaanka beeza hali Yeézu kubona kumuleenga. Baágaamba báti, “Ngási, omubilagilo bya Musa omukwaáta naakuundilwa kumuhicha mukázi woómwe aha nsoonga yoóna yóona?” 4 Yeézu yaabagalulila aáti, “Íimwe timukasomile omu Maandiko Matakatíifu nka nikwo kulugiilila aha bubaandizo, ‘Múungu akahaanga omukwaáta no omukázi?’a 5 Múungu yaamuzila aáti, ‘Habwe ensoonga éezo, omukwaáta nicho alisigila iíse na nyina, akwaátaangane na mukazíwe, na boónyini áabo bábili babe omubili gúmo.’b 6 Ha bwéecho mbweenu, tibatachili bábili kaandi, náho omubili gúmo. Nikwo, echaateelanisizwe na Múungu, omuuntu atachitaáganisa.”
7 Kaandi, Abafalisayo áabo baámubuuza báti, “Mbesi kaandi, na ha nsoonga chi Musa akalagila omukwaáta kumuha mukazíwe olwaandiko lwo kwaángana náze no kumuleka?” 8 Yeézu yaabagalulila aáti, “Musa akabakuundila nka nikwo mulekaane na abakázi banyu habwo okweésubaho kwe emiganya yéenyu, náho kulugiilila ha bubaandizo no kuzeendelela tikwo byaabele bili. 9 Niimbagaambila nka nikwo omuuntu weéna wéena ogwo alikulekaana na mukazíwe, butali bwo kusaambana, na kuswéela omukázi oóndi, óogwo naasaambana.”
10 Niho abaheémba boómwe baámugaambila báti, “Keelaaba oótyo hali iíba no omukázi, mbweenu ni kuzima omuuntu atakuswéela!” 11 Yeézu yaabagalulila aáti, “Ti baantu bóona abalikuhicha kuchiinaankula echigaambo éecho, náho áabo boónka áabo abahéelwe na Múungu. 12 Manya, nniingaámba iíntyo, habwo kuba haliho abaseeza abakonilwe abazeelwe bali bátyo kuluga omuunda ya baanyinabo. Haliho na abakonilwe na abaantu. Haliho abáandi kaandi abakonilwe abokweékonela obutaswéela habwo obukáma bwo omu igulu. Alaaba naahicha kwiinaankula echigaambo éechi achiinaankule!”
Yeézu Nabafúuha Abaana Bato
(Mariko 10:13-16; Luka 18:15-17)
13 Mbweenu, abaantu bunaanka baaleta abaana báabo abato hali Yeézu abone kubafúuha aha kubataho engalo, no kubasabila. Náho abaheémba boómwe baábachaáhukila abaantu áabo.
14 Náho Yeézu yaábagaambila aáti, “Mubaleke abaana abato beéze hali íinye! Mutabazibila kuunyizaho, manya obukáma bwo omu igulu no bwa abaantu abokwiingana na abaana áaba.” 15 Yeézu kaamala kubataho engalo, áaho alugaho.
Kuguma Kwo Omuhíte Kuza Omu Bukáma Bwa Múungu
(Mariko 10:17-31; Luka 18:18-30)
16 Mala omuuntu oómo yéeza hali Yeézu, yaámubuuza aáti, “Íiwe Mweégesa, nkole echizima chiíha neenye mbone obulami obutahwaaho?” 17 Yeézu yaámugalulila aáti, “Habwaáchi nombuúza íinye echigaambo echili chizima? Leeba, Múungu weénka niwe omuzima! Náho koólaaba nooyeénda kuza omu obulami óobwo bucha no buchiile, okoondookele ebilagilo bya Múungu.” 18 Omusígazi óogwo yaámubuuza aáti, “Ebilagilo chi?” Yeézu yaámugalulila aáti, “Otakwiíta, otaákuba omusaambani, otaákwíiba, otaákusiinza ebisuba, 19 obakúze iíso na nyoko, no kumwéenda mutúuzi waawe nkokwo oyeyeénda iiwe nyini.”c
20 Omusígazi óogwo yaamuzila aáti, “Ebilagilo byóona éebyo nkabikola. Nkole chiíha echíindi éecho mbuzilwého?” 21 Yeézu yaámugaambila aáti, “Koólaaba nooyeénda kuba ahikile, zeénda oguze ebiintu byóona éebyo oyinabyo, empilya éezo olaabona, ooze kubagabila abahabi. Kolaba wakozile oótyo, nooba ne ensabo omu igulu. Kolamala, oyize onnkuláatile.” 22 Obuchilo omusígazi óogwo yaahuliile éebyo, yaalugáho habwo obuzune, habwo kuba akaba ayina ebiintu biinzi bwooli.
23 Niho Yeézu yaábagaambila abaheémba boómwe báti, “Mazima nniimbagaambila, chilyáaba chigumile bwooli ha omuhíte kuza omubukáma bwo omu igulu. 24 Niimbagaambila kaandi nka nikwo, chihuhukile bwooli ha ntwaangabuleende kuhiingula omu kahulu ko olubaziililo, kusaaga omuhíte kuza omubukáma bwa Múungu.”
25 Obuchilo abaheémba boómwe bahuliile bátyo, baásobelwa bwooli, baámubuuza báti, “Óobu no oóha mbweenu ogwo yaakahicha kuchuúngulwa?” 26 Yeézu yaabaleeba omu kubeétegeeleza, yaábagaambila aáti, “Habwa abaantu éecho tichikwiile, náho habwa Múungu góona gakwiile.”
27 Áaho nyini, Peétero yaámugalulila aáti, “Léeba, íichwe tukasiga byóona, twaákukulaatila! Mbweenu, ne echwe tulyaábona chi?” 28 Yeézu yaabagalulila aáti, “Obuchilo íinye, Omutábani wo Omuuntu, niímba nyíikeele nko omukáma aha chitebe chaanze echiina ikuzo omuunsi eénsha,d mazima nniimbagaambila neemwe áabo muunnkulaatiíle, nimwíikala aha bitebe byo obuzizi ikumi na bibili, kunu nimuchwaaziíka endími ikumi ne bili eza Iziraeli. 29 Kandi, kati muuntu ogwo asigile eékaye, nali mweene wáabo, nali banyáanya, nali iíse, nali nyina, nali abaana, nali ensaambo, habwe ensoonga yi izíina lyaanze, alyeénaankula entulo igana ye éebyo, no kwiinaankula obulami obutahwaaho. 30 Náho béenzi áabo abalikuleebwa na abomugaso óobu, tibaliba no mugaso gwoóna gwóona omu obuchilo óobwo obulikwiiza. Kaandi na béenzi áabo abalikuleebwe ti bomugaso óobu, balaaba abomugaso omu buchilo óobwo obulikwiiza.”e