Omugani Gwo Kuliha Abakózi
20
1 “Nikwo ebigaambo biliho, habwo kuba Obukáma bwo omu igulu nibususana na kaanyina omusili ogwo ayatimbiile enchaákala kuloonda abahalila kumukolela emilimo omu musili gwoómwe gwe emizabibu. 2 Obuchilo yaabasaangile, yaalagana nabo nka nikwo abalihe buli mupagasi empeéla yo omusana gúmo.a Niho, yaabasiindika omu musili gwoómwe.3 “Obuchilo zahikile esáaha isatu enchaákala, yaasohola ahéelu kaandi kuzeenda omu igulizo, yaabona abaantu abáandi batéena emilimo. 4 Yaábagaambila aáti, ‘Neemwe muzeénda kukola emilimo omumusili gwaanze gwe emizabibu. Ne echili amazima geenyu kubaha, neenye nniinchibaha.’ 5 Nabo bazeenda.
“Mbweenu obuchilo bwa nyemisana kibwaahikile, yaasohola ahéelu kaandi kutaho abaantu abáandi bazeénde omumusili gwoómwe. Kigaaáhiingwiile amasaha ásatu, yaakola aátyo kaandi. 6 Obuchilo zikaba esáaha ikumi ne eémo olweébazo, yaasohola ahéelu kaandi kuzeenda omu igulizo, yaasaanga abaantu abáandi batéena milimo. Yaábabúuza aáti, ‘Habwa chí mweemeeliile áaha echilo chóona mutéena milimo yoóna yóona?’ 7 Nabo baámusubiza báti, ‘Na habwo kuba táliho omuuntu ogwo ayatuhele emilimo.’ Weényini yaábagaambila aáti, ‘Neemwe muzeénda kukola emilimo omu musili gwaanze gwe emizabibu.’
8 “Obuchilo bwa ahakaswiílima, kaanyina omusili yaagaambila endiinza yoómwe aáti, ‘Obeete abahálila bóona, obáhe empeéla. Obuchilo noobaha, obaánze na abapagasi áabo bakéeza ha muheleeluko no okumaliliza na áabo abeeza olwaámbele.’
9 “Niho abahálila áabo bakabaanza emilimo olweébazo, beeza bahabwa empeéla ye echilo chimo. 10 Na áabo abahalila áabo babaandize emilimo enchaákala kabeezile, bakateékuza kwiinaankula bwooli kusaagáho bazeenzi báabo áabo ababaandize ha kuheleeluka. Náho buli omuuntu yaaheebwa empilya éezo nyini ye empeéla ye echilo chimo. 11 Ha bwéecho, obuchilo beenaankwiile empeéla yáabo, baabaanza kuteéka téeka hali kaanyína wo musili nibagaámba nka nikwo, 12 ‘Abaantu áabo baakola emilimo ha sáaha eémo kwoónka! Óobu byaaba bita waatuliha bwiinganisa nabo, obuchilo íichwe twáakola emilimo elikuguma bwooli no omusana gwe echilo choona gwaatuhweelaho?’
13 “Kaanyina omusili yaámugalulila oómo omu bahálila áabo aáti, ‘Íiwe munywáani, tinakubeeha choóna chóona. Ngási, titwaakuundilana nka nikwo nokola emilimo aha empeéla ye echilo chimo? 14 Kwaáta empilya yaawe, ozeénde owaawe. Íinye naalamula kumuliha omuuntu wa ha muheleeluko empeéla éezo elikwíingana ne yaawe. 15 Ngási, ninyaangilwa kukoza empilya zaanze nka óokwo nniinyeénda? Nali oyina ichubi habwo kuba íinye ndyo omweésigwa aha abáandi?’ ”
16 Yeézu yamaliliza kwo kugaamba aáti, “Bityo, abaantu áabo na bo omuheleeluko, balaaba na ba hakubaanza, na abaantu áabo na ba ahakubaanza, balaaba bo omuheleeluko.”
Yeézu Naahoóyela Kaandi Okufwa No Kuzooka Kwoómwe
(Mariko 10:32-34; Luka 18:31-34)
17 Obuchilo Yeézu akaba ali omu muháanda naahanama kuza omuli Yeruzaléemu, ayihaho abaheémba boómwe ikumi na bábili, abata halubazu, bali omuluzeendo abagaambila aáti, 18 “Léeba, óobu twáayeleka Yeruzaléemu. Niho óokwo, íinye Omutábani wo Omuuntu, nibaanta omu ngalo za abakúlu ba abagabe ba Múungu no omu ngalo za abeégesa be ebilagilo bya Musa. Nabo nibaannchwaazika nka nikwo iinyitwe. 19 Niho, balaanta omu ngalo za Abanyamahaánga kubona baangaye, baankone ne enkoba no kuumbáamba aha musalaba. Náho echilo cha kásatu, Múungu naannzoola.”
Omukúlu abakolele áabo alikweébeembelela
(Mariko 10:35-45)
20 Niho, nyina wa abatábani ba Zebedayo yéeza hali Yeézu ali hamo na abatábani bábili, yaáhika yaateela ebizwi, yaámusaba amukolele echiintu chimo. 21 Yeézu yaámubuuza aáti, “Nooyeénda nkukolele chiíha?” Náwe yaámugalulila aáti, “Niinsaba obekililize abaana baanze áaba bábili nka nikwo, beekale hamo neewe omubitebe byo obuzizi omubukáma bwaawe, oómo olubazu lyo bulyo no oóndi olubazu lyo bumoso.”
22 Yeézu yaámugalulila aáti, “Timukusombookelwa éebyo nimusaba. Ngási, nimuhicha kwaágalala nka óokwo ndikuza kwaágalala?”b Baámugalulila báti, “Nitúhicha.” 23 Yeézu yaábagaambila báti, “Amazima nimuhicha kwaágalala nka óokwo ndikuza kwaágalala, náho kwíikala olubazu lwáanze lwo bulyo nali lwo bumoso ti mulimo gwaanze kubakuundila. Omwáanya óogwo na habwa bali áabo Táata yaámazile kubaloongeza.”
24 Obuchilo abaheémba abáandi ikumi bahuliile ha bwéecho, baabatamwa omuuntu na mweene wáabo. 25 Niho Yeézu yaábeeta bóona hamo, yaábagaambila aáti, “Nimumanya nka nikwo abatégeki ba amahaánga nibategeka abaantu báabo lwa amagala, kaandi nibabakoza. 26 Náho etaákwiiza bikaba bityo hali íimwe. Omuuntu weéna wéena ogwo naayeénda kuba mukúlu ahagáti yaanyu, naayeendelwa kuba omuhálila wáanyu. 27 Kaandi, omuuntu weéna wéena ogwo naayeénda kuba owa mbele omuli íimwe, aábe omuzáana wáanyu.c 28 Ni nke íinye, Omutábani wo Omuuntu, tindeézile kukolelwa, náho nyizile kubakolela abaantu no kusohoza obulami bwaanze, mbone kubakomoolola abaantu béenzi.”
Yeézu Naachíza Abahume Bábili
(Mariko 10:46-52; Luka 18:35-43)
29 Obuchilo Yeézu na abaheémba boómwe bakaba nibaluga omuchaalo cha Yeliko, echipípi chiháango cha abaantu chikamukulaatila. 30 Omulubazu lwo muháanda óogwo Yeézu akaba naahiingula, bakaba baliho abahume bábili. Mbweenu, obuchilo bahuliile nka nikwo Yeézu naahiingula áaho, bayeeta ahi iláka liháango báti, “Íiwe Mukáma, Mutábani wo omukáma Daudi, otuganyile!” 31 Embága ya abaantu yaabachaáhukila nka nikwo beesize, náho báabo baaguma kwéeta aha kuhamuka iláka báti, “Íiwe Mukáma, Mutábani wo omukáma Daudi, otuganyile!”