Yeézu Ayina Obuzizi Bwo Kuganyila Ebiheno
(Mariko 2:1-12; Luka 5:17-26)
9
1 Niho Yeézu yaahanama omu bwaato, yaayaambuka enziba ya Galiláaya kaandi, yaasuba omuli Kaperinaumu, omu iboma éelyo yaatwiile óomwo. 2 Obuchilo yaahikile óokwo, abaantu abáandi bamuleetela omuuntu ogwo akaba ali ensege, alyaamile aha chitwaálilizi. Obuchilo Yeézu akabona okwiikiliza kwáabo, yaámugaambila omulwéele óogwo aáti, “Íiwe mwaana waanze, tiímbya omuganya! Waáganywiilwe ebiheno byaawe.”3 Niho abeégesa abáandi be ebilagilo bya Musa áabo bakaba baliho áaho batekateka omu emiganya yáabo báti, “Omuuntu óogu naamulogota Múungu!” 4 Náho Yeézu akasoombookelwa góona áago bakaba nibateekuza, yaábabúuza aáti, “Habwaáchi, nimuteekuza ebíbi omu miganya yaanyu? 5 Ni chíiha éecho chihuhukile bwooli? Kumugaambila nka nikwo, ‘Waaganyilwa ebiheno byaawe,’ nali kumugaambila nka nikwo, ‘Yemeelela, olibate?’ 6 Náho mubóne kusoomboókelwa kuluunzi nka nikwo, íinye Mutábani wo Omuuntu owo obuzizi bwo kuganyila ebiheno omuunsi éezi.” Niho Yeézu yaámugaambila omuuntu óogwo akaba ali ensege aáti, “Yemeelela! Twaála chitwaálilizi chaawe, ozeénde omúka.” 7 Ahonyini, yaáyemeelela, yaazeenda omúka. 8 Obuchilo abaantu baabweene áago, baakwaatwa obutíini. Bamulamiliza Múungu ogwo akabaha abaantu obuzizi nko óobwo.
Omukáma Yeézu Akeeza Kuchuúngula Abe Ebiheno
(Mariko 2:13-17; Luka 5:27-32)
9 Obuchilo Yeézu yaamazile kuluga áaho, omumuháanda yaabona omuhaámbya oómo ogwo akaba naayetwa Matayo, ayikéele omukazu koómwe kokutobesezamo oluhaambwe. Yeézu yaámugaambila, “Nkulaatila.” Matayo yaáyemeelela, yamukulaatila Yeézu.
10 Mbweenu, Yeézu yaazeenda kulya ebyookulya hawa Matayo hamo na abaheémba boómwe. Obuchilo bakaba beékele óomwo, bataahamo abahaámbya na abáandi béenzi áabo baamanyikile kuba abaheni, bakaba nibalya ebyookulya hamo nabo. 11 Obuchilo Abafalisayo baabweene éecho, baábagaambila abaheémba ba Yeézu báti, “Habwaáchi, omweégesa wáanyu naálya hamo na abahaámbya na abaheni abáandi!”
12 Obuchilo Yeézu yaahuliile amagaambo gáabo, yaábagaambila aáti, “Abaantu abeene enziingo nzima, tibakugaswa omufumu, náho abalwéele nibo abalikugaswa! 13 Mbweenu, muzekweeyega ensoonga ya amagaambo ga Múungu omu Maandiko Matakatíifu naagaamba nka nikwo, ‘Niinyeénda abaantu beezilile echiganyizi kuchila kusohoza echitáambo.’a Mbweenu, íinye tiindeézile kwéeta abaantu abeena ntúungwa nzima, náho abaheni.”
Yeézu Nayiinganisa Ameégeso Ga Kala Na Ameégeso Goómwe Amasha
(Mariko 2:18-22; Luka 5:33-39)
14 Niho abaheémba ba Yohana beeza hali Yeézu, baámubuuza báti, “Íichwe na Abafalisayo óoku nitusiiba kulya ebyookulya. Ngási, na habwaáchi abaheémba baawe tibaza muchisiibo?” 15 Yeézu yaábasubiza aáti, “Abaantu áabo balikulalikwa omu bweenga, nibahicha bata kuzululukwa obuchilo bali hamo na chisweela? Náho ebilo biliyo nibiíza niho balaáyakwa chisweela. Mbweenu ha obuchilo óobwo, niho baliba ne echisiibo.
16 “Taliho omuuntu ogwo alikwiimucha echibatulo chisha achibaziílile aha myéenda mikulukulu. Kaalikukola aátyo, echibatulo echisha chiguteémula omwéenda óogwo guba mubi bwooli. 17 Kaandi, taliho omuuntu ogwo afuka evíini eénsha omu nfulebe ze eémpu enkokolo. Kuba kaálikukola aátyo, enfulebe niziteemuka, evíini eseéseke ne enfulebe nazo nizifwa zóona. Náho, abaantu baba nibata evíini eénsha omu nfulebe eénsha. Bityo, enfulebe eénsha ne evíini eénsha biikala bili bizima!”
Yeézu Naamuchíza Omukázi No Kusubya Obulami Ha Muhalákazi
(Mariko 5:21-43; Luka 8:40-56)
18 Obuchilo Yeézu achaáhoóyela áago, omweébembezi oómo we eenzu yo omukobo, yéeza, yaateela ebizwi omuméeso goomwe, yaámugaambila aáti, “Omuhalákazi wáanze yaáfwa óobu nyini! Náho, tuzeénde oteho engalo yaawe hali weényini, náwe naába omulame kaandi.” 19 Niho, Yeézu yaázeenda hamo na abaheémba boómwe, bamukulaatíla omweébeembezi óogwo.
20 Mbweenu, obuchilo óobwo nyini omukázi oómo ogwo akaba naayagalazwa ne endwáala yo omuzwo gwe enságama emiaka ikumi ne ibili, yaámwiililila enyuma Yeézu, yakwaataho aha lukugilo lwe ebizwaalobye kwoónka. 21 Akakola aátyo, habwo kuba naayeteekateéka aáti, “Kanáabikwaataho ebizwáalo byoómwe kwoónka, nniinchila.” 22 Obuchilo yaabikwaasileho, ahonyini Yeézu yaachebuka. Yaámubona omukázi óogwo, yaámugaambila aáti, “Íiwe muhala waanze, tiímbya omuganya! Okwiikiliza kwáawe nikwo kwaákuchiza!” Omuli áako kaziingo nyini, omukázi óogwo aba yaachila.
23 Mbweenu, obuchilo Yeézu yaahikile omuunzu yo óogwo omweébembezi we eenzu yo omukobo, yaabona abaantu abalikuteela emiléela ne embága bakobile nibateéla empámo. 24 Weényini yaábagaambila aáti, “Mulugeho áaha! Omuhalákazi óogu tákafwíile, náho alyaamile kwoónka.” Obuchilo abaantu áabo bahuliile bátyo, bamuseka Yeézu. 25 Niho Yeézu yabasohoza bóona ahéelu, yaataaha omu chiseenge, yaamukwáata engalo omuhalákazi óogwo, náwe yaáyemeelela! 26 Empola éezo zaaba nizisuúgaana omuunsi éezo yóona.
Yeézu Naachíza Abahume Bábili
27 Obuchilo Yeézu yaamazile kuluga áaho, abahume bábili baámukulaatíla, kunu nibamuhama no kugaamba báti, “Íiwe Mutábani wa Daudi,b otuganyile!” 28 Obuchilo Yeézu kayataahile omuunzu, abahume áabo baámukulaatila óomwo. Mbweenu, Yeézu yaábabúuza aáti, “Ngási, nimwiíkiliza nka nikwo nniinhicha kubachíza?” Baámusubiza báti, “Nokasíinge, Omukáma!” 29 Niho Yeézu yaabakoláho ha méeso gáabo, yaábagaambila aáti, “Chibe hali íimwe nka nikwo kuli okwiikiliza kwaanyu.” 30 Ahonyini, méeso gáabo gahweeza, bahicha kubona. Yeézu yaabaneembelela aha amagala aáti, “Mtakugaambila omuuntu weéna wéena empola éezi!” 31 Nóobu oótyo baázeenda, balagana empola zóomwe omuunsi éezo yóona.
Yeézu Naachíza Omutita
32 Obuchilo abahume áabo bakaba nibaluga áaho, léeba, abáandi baamuleetela Yeézu omuuntu oómo ogwo akaba akwaasilwe ni izimu elyo elyaaleeteliile aábe omutita. 33 Yeézu yalibiinga izimu éelyo, na ahonyini omuuntu óogwo yaabaanza kuhooya kaandi. Abaantu beenzi áabo bakaba baliho áaho baásobelwa bwooli, baágaamba báti, “Omuunsi yóona ya Iziraeli tibikabagaho buluga nakáti ebigaambo nke éebi!” 34 Náho Abafalisayo baágaamba báti, “Naabiínga izimu habwo amagala gi Izimu, likúlu lya amazimu!”
Yeézu Yabazilila Echiganyizi Abaantu
35 Yeézu akaba azoongoloka omu maboma ne emigoongo yóona ya Galiláaya. Akaba natáaha omu masomeloc no kweégesamo abaantu. Akaba naayolekeelela abaantu Empola Nzima zo obukáma bwo omu igulu no kuchíza amalwáala góona. 36 Obuchilo Yeézu akabona embága za abaantu, yaabazilila echiganyizi, habwo kuba bakaba nibaagalala na tibalabeele no omuuntu wo kubazuna. Bakaba bali nke entaama zitéena omuliisa. 37 Mbweenu yaábagaambila abaheémba boómwe aáti, “Emyéezo ni miinzi, náho abakozi ni bache. 38 Ha bwéecho, mumusabe kaanyina omusili, abone kusiindika abakozi omu musili gwoómwe.”