Okuzíikwa Kwa Yakobo
50
1 Áaho Yozéfu yaámufuúmbata iíse naamulilíla no kumunyweégela. 2 Mála yaábalagila abafúmu boómwe baguloonze omutúumbi gwa iíse hakugusiiga no kuguhuumbika omubázia kúba gutaákubiiha. Nabo baakola batyo 3 ha ebilo makúmi aána habwo kuba omubuteéka bwa Bamiísiri, ebilo éebyo byóona níbyo bikaba nibyeéndwa habwo kuhuumbika omubázi omutúumbi. Abamiísiri bakamwaálamila Yakobo ebilo makúmi musaanzu hakumúha isima.4 Echaalamo kachaahwéele, Yozéfu yaahooya na abahanuuzi bo mwa Faráo, yaábasaba ahi isima lyóona bahooye na Faráo ha mwáanya gwoómwe. Yaábasaba batwaále empola éezi hali Faráo, 5 “Táata Yakobo akaándahiliza, naagaamba aáti, ‘Ndi héehi kufwa. Yozéfu, mazima muuntwáale no kuúnziika omuúmbi éezo naakozile omúunsi ya Kanáani, na áaho niho aholaanzíika.’ Habwéecho, iinye niinkusába onkuúndile nzeénde kumuziika táata, mála niinsúba bwaangu.”
6 Faráo yaákuunda okusaba kwa Yozéfu kuzeenda kumuziika iíse nkokwo weényini yaamulahiliize.
7 Níkwo Yozéfu kuzeenda kumuziika iíse, yaáseendekelezwa na bakozi bakulu bo mwa Faráo na abanyaampala be ekáye, hamo na abakulu bóona bo omúunsi ya Miísiri. 8 Nawe Yozéfu yaakulaatílana na badugúbe bóona hamo ne embagáye yóona yo mwa iíse Yakobo. Abasígeele omuchaalo cha Goshéeni bakaba bali áabo abateena magala kuzeenda boónka, nka abaana báabo, amásho ge entaama, ne ente. 9 Kaandi yaáseendekelezwa na abahánami be efaláasi na magáali agalíkukwéeswa ne efaláasi, bóona hamo baaba echipípi chiháango cha abaantu.
10 Kábaahikile halubúga lwo kweesuliláhob halikwéetwa Atáadi, buseeli yo omunóna gwa Yolodáani, baáyalama no kuchula habuzune buháango. Nawe Yozéfu yaázeendelela kukola echaalamo éecho cho mwa iíse ha ebilo musáanzu habuteéka bwe Echiebrania. 11 Abakanáani bali abatúuzi kábaabweene echaalamo éecho halubúga lwa Atáadi, baágaamba, “Mazima echaalamo éechi cha Abamiísiri ne cho obuzune buháango!” Ha ensoonga éezo abaantu baheeta ahaantu áaho hali buseeli yo omunóna gwa Yolodáani, Abel-Miísiri.c
12 Habwéecho, abaana ba Yakobo bakamukolela nkokwo isébo yaabalagíile. 13 Beémucha omutúumbi gwa Yakobo, baágutwáala kuhika omúunsi ya Kanáani. Baámuziika omuúmbi eyaabeele eli omunyaanga ye ensaambo óokwo Makpéela, héehi na Maámule. Ensaambo éezo niyo Ibrahímu yaabeele aguzile kuluga hali Efroni, Omuhiti, habe áaho kuziikila. 14 Yozéfu káyaamazile kumuziika iíse, weényini hamo na beenebáabo na abaantu abáandi bóona áabo abaabele bazeenzíle náze, bakasuba Miísiri.
15 Kábaabweene isébo yaáfwa no kuzíikwa, beenebáabo Yozéfu baátiina, beégaambila, “Lúundi Yozéfu naába achiine echiníga neechwe naahicha kutúlihisa mazima obubi bwóona óobwo twaamukóliile.” 16 Habwéecho, bakatweeka empola hali Yozéfu nibagaámba baáti, “Obuchilo iíso atákafwíile akatulagila tukugaambíle ha mwaanyágwe túti, 17 ‘Yozéfu, niinkusába obaganyíle beenebáanyu ebiheno no obubi bwóona óobwo bakukóliile.’ Habwéecho, íichwe, beenebáanyu, nitukusába otuganyile obubi óobwo twaakukóliile íichwe abazáana ba Múungu wa iíso.”
Yozéfu káyaahuliile empola éezo, yaálila.
18 Mála beenebáabo beeza kumúgwa omumagulu no kugaamba, “Ichwe tuli abazáana baawe.”
19 Náho Yozéfu yaábasubiza, “Mutaákutiina, iinye tí ndi Múungu wo kubachwaáziikila. 20 Íimwe mukaba nimweénda kuunkólela iinye ebíbi. Náho kulabila omuchikolwa éecho, Múungu akaba naayeénda kubakólela ebizima byo kubachuúngula abaantu béenzi abeene enzala babone kuchila nkokwo alikukola óobu. 21 Mwiilóoko mutaákutiina, iinye niimbáha ebyookulya íimwe hamo na abaana báanyu.” Yaágaamba nabo habufúla abóne kubagumya omuganya.
Okufwa Kwa Yozéfu
22 Yozéfu na beenebáabo ne embága yóona yo mwa iíse baaguma kwiikala omúunsi ya Miísiri. Yozéfu akalama emyáaka igána límo ne ikúmi (110). 23 Akahíilwa kubona abaana na abeézukulu ba Efraimu. Kaandi akabona abaana ba Makíli, ali omwaana wa Manáase, yaabeénaankula nka abaanábe.d
24 Mála Yozéfu yaábagaambila beenebáabo, “Iinye óobu ndi héehi kufwa. Mazima Múungu alyéeza kubáhweela, alyaábafúlula kuluga omúunsi éezi no kubatwáala omúunsi éezo yaabalahíliile Ibrahímu, Izáaka na Yakobo.”
25 Mála Yozéfu yaábalahiliza enzáalwa za Izilaelie kunu naagaámba, “Mazima Múungu alyaábahwéela kuluga omúunsi éezi, mulahile nkokwo obuchilo óobwo mulyaátwáala amagúfa gaanze óokwo.” 26 Áaho Yozéfu akáfwa óokwo Miísiri, ayine emyáaka igána límo ne ikúmi (110). Nabo baáhuumbika omutúumbi gutábiiha, baaguta omwiibiíkilo lyo omutúumbi óokwo Miísiri.