Okubasa Kwa Yakobo Habaanábe Atákafwíile
49
1 Yakobo yaayeeta abaanábe bóona, yaábagaambila, “Mwiikóbye hamo mbagaambíle ebigaambo ebyo mulibóna omubilo ebiliizayo. 2 Mwiíze muhuliilíze, íimwe abaana ba Yakobo, munhúliilize Izilaeli,a isíimwe.3 “Íiwe Reubeeni, oli omwaana waanze wo obuzigeezo, íiwe oli omwaana wa amaani gaanze na ga habusígazi bwaanze. Íiwe noobachíla abáandi omubukúlu no mumaani.
4 “Náho íiwe wahiínguliza habúbi nka améenzi agatiilwe omusote, tóchiba no obukúlu kaandi habwo kuba okahanama ahachitabo chaanze, waángokela iinye no kuúngaya iíso hakulyáama na mukaáso ali nyoko éento!
5 “Simeyoni na Láawi na badugu abeene obuzilwa, ebikwáato byáabo babikwaáta kukola obuzaaza buháango.
6 “Omwooyo gwaanze, gutaákukoba hamo ne emyooyo yáabo yo obuzilwa, kaandi ntaákuba nabo omubikólwa byáabo bíbi, habwo kuba bakeeta abaantu hachihulumuko cháabo. Bakanulilwa obuzaaza bwáabo mpaka kutema faáya amatéega ge biluumbu byéente.
7 “Chichéenwe echiníga cháabo, habwo kuba ni chibi bwooli, na buchéenwe obuzaaza bwáabo, habwo kuba tibwíina echiganyizi.b Habwéecho, Múungu alyaábataaganisa oluzáalo lwáabo no kulusaámbaaza omuungaanda za Baizilaeli.c
8 “Íiwe Yuda, badugu baawe balyaákusiingiza,d olyaábasíinga ababisa baawe, na badugu baawe balyeénama omukukúlamya.
9 “Iiwe Yuda oli nko omwaana gwe engaanza ogulíkwaaluka, ogwaásuba kuluga amabóneso omumuhíigo gwaáyo. Nké engaanza neeyigolóla no kulyaama ahaansi. Engaanza eyina amaani, táliho wo kuleengesa kuzipaámpula.
10 “Yuda alyaákwaata enkoni yo obukáma obuchilo bwóona, no oluzáalo lwáawe lulyaátegeka ebilo byóonae kuhika haáliizíla óogwo akwiile kutwáala engoma, óogwo alihulilwa na amahaánga góona.
11 “Alyáaba naakoma ensíkili yoómwe ahamuti gwo omuzabíbu, no omwaana gwaáyo ahi itábazi elizima éelyo muzabíbu. Alyáaba naafula ebizwaalóbye omumaálwa ge ezabibu elíkutúkulaf habwo kuba igesálye lye ezabibu ni liháango múno.g
12 “Améeso goómwe galyáaba agalíkutukula habwa amaálwa meenzi ge ezabibu, ameeno goómwe galyáaba agalikwéela habwa amáta meenzi.
13 “Zebulúuni alyaátuula héehi ne enyaanza, ne echaambo choómwe chilyáaba igobelo lya máato. Olubibi lwe echaalo choómwe lulyaábibikana ne echaalo cha Sidóoni.
14 “Isakáari ni nké ensíkili eyina amagala, eyílyaamisa ahaansi habwo obuleméezi bwe migugu omuumbazu, no kuhuúmula ahagáti yaázo.h
15 “Kaálibona nkokwo ahokuhuúmulila hali hazima, na nkokwo éensi ni nzima, alyaáliinamisa ibega lyoómwe kwiimucha emigugu, abe owo kukola emilimo yo obuhálila.
16 “Dáani alyáaba omulamuzii wo lugaandálwe, luli lúmo omuli engaanda ezíindi za Izilaeli.
17 “Dáani abe nké enzóka haampelo yo omuháanda, nké enzóka ye empili hamuháanda. Éezo eluma ebisiínsilo bye efaláasi,j omuhanami we efaláasi abóne kúgwa agálamile.
18 “Íiwe Omukáma Múungu, ntegamiliíle obuchuúnguzi bwaawe!
19 “Gáadi alyaátabaalilwa na abanyagi, náho weényini alyaábakulaatila enyuma no kubátabaalila.
20 “Ebyookulya bya Ashéeri nibiba ebilikunula, ebyookulya ebilíkugasa kulíibwa no mukáma.
21 “Naftáali ni nké engábi elikwiíluka buyaga, ezáala abaana básemiile.k
22 “Yozéfu ni nko omuzabíbul oguzaala bwooli, óogwo oguli héehi ne enzwéelo na matábazi gaágwo galaanzile halúgo.
23 “Abalási balyaámutabaalila. Balyaámulása no kumwaágalaza.
24 “Náho obúta bwoómwe buleégile kuzima, ne emikonóye eyina enkátulo yo kulása habwo omukóno gwo Obuzizi bwa Múungu wa Yakobo, ali Omulíisa no Luchili lwa Izilaeli.
25 “Ni Múungu wa iíso alikukuhwéela. Ni Múungu wo Obuzizi wa Byóona alikukufúuha, obóne emigisa ye enzula kuluga omwiigulu, emigisa ye ebitubi bya améenzi ahaansi, ne emigisa ya mabeele ne eenda zo obuzéele.
26 “Emigisa ya iíso echila emigisa ya mabaanga go obucha no obuchiile, na echila ebiintu bizima bye migoongo ye éensi yo obutáhwa no obutáhwa. Emigisa éezi ziikále hamútwe gwa Yozéfu, zíbe omubúso bwo óogwo ali mukúlu omuli beenebáabo.
27 “Benyaámini ni nko omusegem ogululuhile, enchaákala kulya hakutaasagula obwíite bwaágwo, na nyomweébaazo gubaganisa enkwaátwa.”
28 Éezo nizo engaanda ikúmi ne ibili za Izilaeli. Éebyo níbyo ebigaambo éebi yaabagaambíile isébo káyaabafuúhile, buli omwaana akahaabwa omugisa kwiingana ne entuungwáze.
Okufwa Kwa Yakobo
29 Mála Yakobo yaábalagila abaanábe, “Iinye ndi héehi kufwa, nkulaatíle beesinyeénkulu baanze abanyibeembéliile kufwa. Muuntwáale no kuúnziika hamo na baatáata na baguúku omunyaanga éezo eli omuunsaambo etalimwa ya Efroni, ali Omuhiti. 30 Enyaanga éezi eli óokwo Makpéela, obutúluka bwa Maámule, omúunsi ya Kanáani. Ibrahímu akagula enyaanga ne ensaambo éezo kuluga hali Efroni, yaaba yo kuziika embagáye. 31 Óokwo niho baaziíkilwe Ibrahímu na Sáara ali mukazíwe. Óokwo niho baaziíkilwe Izáaka na mukazíwe Rebéka. Kaandi óokwo nyini niho naamuziíkile Léeya. 32 Guúku Ibrahímu akagula éezo ensaambo ne enyaanga kuluga Habahiti.”
33 Yakobo káyaamazile kubálagila abaanábe, yaagolola amaguluge ahachitabo, yaáfwa, yaakulaatila beeseénkulu abamwiibeembéliile kufwa.