Yakobo Kubáfuuha Efraimu Na Manáase
48
1 Ebigaambo éebyo kábyaabeele byaáhweele, Yozéfu yaáhaabwa empola nkokwo iíse no omulwéele bwooli. Habwéecho, yaazeenda hali iíse hamo na batábani bábili bali Manáase na Efraimu.2 Yakobo káyaagaambiilwe nkokwo omutábani Yozéfu yeeza kumuléeba, Izilaelia yeéyomeleza kwiimuka, yeeteenga ahachitabo abóne kweéyaangalucha náze.
3 Yakobo yaagaambila Yozéfu, “Múungu Omuzizi wa Byóona akanyizáho óokwo Lúzu omúunsi ya Kanáani, yaánfuuha. 4 Yaámufuuha omukuúngaambila aáti, ‘Ndyaákwoongela oluzáalo, kaandi ndyaákukóla obe iseénkulu we embága mpáango ye engaanda za abaantu. Éensi éezi ndyaábagabila oluzáalo lwáawe, bazitwáale eébe éensi yáabo obucha no obuchiile.’ ” 5 Yakobo yaaguma kumugaambila aáti, “Abaana baawe bábili, Efraimu na Manáase, áaba wazaaliile Miísiri obuchilo ntákahikile áaha, nibaba abaana baanze. Áaba bábili balyaáhuungula kuluga hali iinye nkokwo bali Reubeeni na Simeyoni.
6 “Náho abaana áabo olizaála obuchilo obuleezáyo tibaliba abaánze, nibaba abaáwe. Mála nóobu, obuhuunguzi bwáabo bulyaáluga omubuhuúnguzi bwa beenebáabo bali Efraimu na Manáase. 7 Naalamula ntyo habwa nyoko Raáhéeli. Obuchilo óobwo nkaba niinyíza kuluga omúunsi ya Mesopotamiab Raáhéeli yaafweela omúunsi ya Kanáani. Obuchilo tukaba tuchili omumuháanda akáanya káche kuhika omuchikáali chiche cha Efuráati, akaansigila obuzoolelwa bwíinzi. Habwéecho, nkamuziika héehi na hamuháanda gwo kuza Efuráati, (omwiizíina elíindi, Betlehemu).”
8 Izilaeli káyaababweene abaana ba Yozéfu, yaámubuuza, “Áaba na abaana boóhi?”
9 Yozéfu yaámusúbiza, “Áaba ni batábani baanze, áabo Múungu yaangabíile ndi kunu Miísiri.”
Mála Yakobo yaámugaambila, “Niinkusába, obaléete héehi neenye mbone kubáfuuha.”
10 Obuchilo óobwo améeso ga Izilaeli gakabagaázizile oluhwe gatáchihweeza kuzima habwo kuba akaba yaányaampaheele bwooli. Áaho Yozéfu yaabeeliza héehi abaanábe hali isébo enkúlu, mála Yakobo yaábanyweégela no kubafuúmbatila.
11 Mála Izilaeli yaagaambila Yozéfu, “Nkaba ntákuteékuza nkokwo kaandi naakaáhicha kubona obuso bwaawe. Náho kási, Múungu yaánhiila iinye kukubóna íiwe na abaana baawe!”
12 Áaho Yozéfu yaabeeháho abaanábe habizwi bya Yakobo,c yaamugwa omumagulu no kumulámya omuméeso ga iíse. 13 Mála Yozéfu yaábeemeeleza abaanábe bábili, yaamuta Efraimu omumukono gwo obumoso gwa Izilaeli, na Manáase omumukono gwo obúlyo, yaabeeliliza héehi hali isébo enkúlu. 14 Náho Izilaeli yaáhiinganisa emikonóye hakuhítanisa, óogwo obúlyo no obumoso. Yaaguta omukonógwe gwo obúlyo hamútwe gwa Efraimu, omulúmuna, no mukonógwe gwo obumoso hamútwe gwa Manáase, omwaana wo obuzigeezo.
15 Áaho Yakobo yaáfuuha Yozéfu, naagaámba,
“Múungu wa guúku Ibrahímu na wa táata Izáaka,
Óogwo webaakoondokíile omubulami bwáabo,
abafúuhe abasigazi áaba.
Múungu ali Omulíisa waanze omubulami bwaanze bwóona,
abafúuhe áabo.
16 Óogwo maléeka ayanchuúngwiile omubuzílwa bwóona,
abafúuhe abasigazi áabo.
Izíina lyaanze, na mazíina ga guúku Ibrahímu na ga táata Izáaka
geekále hakulama omubasígazi áabo,
nabo bazaále bazaliláne bakánye omúunsi.”
17 Yozéfu káyaabweene iíse naatáho omukonógwe gwo obúlyo hamútwe gwa Efraimu, talánuliilwe. Yaakwaata omukóno gwo obúlyo gwa iíse abóne kugwiiháho hamútwe gwa Efraimu no kugúta hamútwe gwa Manáase, owo obuzigeezo, 18 naagaambila iíse, “Táata, bitaákuba bityo! Óogu ali obúlyo bwaawe no omwaana wo obuzigeezo. Otého omukóno gwaawe gwo obúlyo hamutwégwe.”
19 Náho iíse yaáyaanga, naagaámba, “Niimmanya omwaana waanze, niimmanya. Abaana ba Manáase nabo balyáaba olugaanda luháango lwo kutéenga. Kwoónka omulúmuna Efraimu alyáaba mukúlu kuchila Manáase, no oluzáalo lwa Efraimu lulyáaba engaanda nyíinzi.” 20 Níkwo echilo éecho Yakobo kubáfuuha, naagaámba, “Omumazíina gáanyu, Abaizilaeli balyeéfuuha omukugaamba, ‘Múungu akufúuhe nka Efraimu na Manáase.’ ” Habwéecho, Yakobo yaakola izíina lya Efraimu kúba elya mbele, kwooleka nka nikwo naába mukúlu kuchila Manáase.
21 Áaho Izilaeli yaámugaambila Yozéfu, “Ndi héehi kufwa, náho Múungu naába hamo neemwe ebilo byóona, kaandi alyaábasúbya omúunsi ya besíimwe enkúlu. 22 Kaandi iinye naakuha íiwe olubazu luzima lwo obunula óokwo Kanáani omu ibaanga,d óolwo tiindáheele beenebáanyu, óolwo naayakíle Abaamóori halubaadi (ahamaanda) lwaanze no obúta bwaanze.”