Yozéfu Kumuléeta Yakobo Omuméeso Ga Faráo
47
1 Yozéfu káyaasubile kuluga Goshéeni, yaazeenda hali Faráo yaámugaambila, “Táata na beenebéetu beezíle ne ebiintu byáabo byóona, entaama ne ente kuluga omúunsi ya Kanáani. Óobu, bali omuchaalo cha Goshéeni.” 2 Yozéfu akaba abatweele batáanu omuli beenebáabo, yaábatwáala hali Faráo bamulámye.3 Faráo yaabuuza áabo beenebáabo Yozéfu, “Nimumánya milimóchi?”
Baasubiza Faráo, “Mukáma wéetu, íichwe omulimo gwéetu no kulíisa ebituungaánwa nkokwo abazeele béetu bakaba bákola. 4 Ichwe twiizile kutúula nka abahiínguzi omúunsi éezi, habwo kuba óokwo Kanáani tigalíyo amaliísizo ge ebituungaánwa kwiingana na iífwa liháango bwooli. Mbweenu mukáma wéetu, nitukusába otwiikílilize twiikale omuchaalo cha Goshéeni.”
5 Faráo yaagaambila Yozéfu, “Iíso na beenebáanyu beezíle hali íiwe. 6 Éensi éezi yóona ya Miísiri eli omuungalo zaawe. Báhe iíso na beenebáanyu ahaantu hazima kuchila hóona omúunsi. Báhe echaalo cha Goshéeni, batuúle óokwo. Kaandi kólaaba noomanya omuli beenebáanyu abalikumanya kulíisa kuzima ebituungaánwa, obatóoze bábe abeémeelelezi be ebituungaánwa byaanze.”
7 Mála Yozéfu yaátwáala iíse omuméeso ga Faráo kumulámya. Yakobo yaámufuuha Faráo, 8 nawe yaabuuza Yakobo, “Waáhikize emyáaka engáhi?”
9 Yakobo yaámusúbiza, “Emyáaka éezi nyinázo nko omuhiínguzi ni igána na makúmi ásatu. Emyáaka éezo ni míche, kaandi eyizwiile ebyaágalazo, náho echáali kwiingana ne emyáaka ya bazéele baanze yo obuchilo bwe batwíile nka bahiínguzi.” 10 Áaho kaandi Yakobo yaáfuuha Faráo no kumúlaga, yaalugáho omumeesóge.
11 Yozéfu yaábakola iíse na beenebáabo batuula omuchaalo cha Goshéeni,a hakubaha ahaantu aheene obunula omuli Miísiri nkokwo Faráo yaalagíile. 12 Yozéfu abáha ebyookulya iíse na beenebáabo hamo na abaantu abáandi bóona be embága éezo yo mwa iíse kwiingana no obwíinzi bwa abaana báabo.
Obutégeki Bwa Yozéfu Obuchilo Bwi Iífwa
13 Obuchilo óobu iífwa lyaaba liháango habwo kuba ebyookulya byaachéeha bwooli omúunsi ya Miísiri ne éensi ezili héehi. Habwéecho, abaantu bóona ba Miísiri na Kanáani baánanuka bwooli habwi iífwa. 14 Abaantu bakaba nibeéza Miísiri hakugula ebyookulya bye enzuma, nawe Yozéfu akaba asuúmbya empilya zóona zo omúunsi ya Miísiri na Kanáani no kuzitwáala omuunzu yo Mukáma Faráo hachikaali. 15 Kábaabeele abaantu bóona aba Miísiri na aba Kanáani baáhweeliilwe empilya záabo, Abamiísiri beeza hali Yozéfu no kumugaambila, “Túhe ebyookulya tutaákufwa habwi iífwa omuméeso gaawe. Leeba óobu empilya zéetu zaátuhwéela!”
16 Yozéfu yaábasubiza, “Habwo kuba empilya zéenyu zaábahwéela, mleéte ebituungaánwa byáanyu tuhiingánise habyookulya.” 17 Níkwo kumuleétela Yozéfu ebituungaánwa byáabo nké efaláasi, ente, entaama, embuzi ne ensíkili, nawe yaabaha ebyookulya hakuhiinganisa. Omwaaka óogwo Yozéfu yaabeémanya hakubaha ebyookulya omukuhiinganisa ne ebituungaánwa byáabo byóona.
18 Omwaaka ogwaakulaatiilého bakamwiizáho kaandi Yozéfu no kumugaambila, “Mukáma wéetu, kugaamba amazima, empilya zéetu zóona zaáhwa, ne ebituungaánwa byéetu byóona byáaba ebiintu byaawe. Óobu, Mukáma wéetu, íichwe titwíina choóna chóona éecho kukúha omukuhiinganisa ne ebyookulya. Lúundi, tweekéeze emibili yéetu ne ensaambo zéetu zoónka. 19 Ichwe tutaákufweela omuméeso gaawe no kuleka ensaambo zéetu zisisíkale, otugúle íichwe hamo ne ensaambo zéetu habyookulya, mála tube abahálila ba Faráo ne ensaambo zéetu zíbe ezoómwe. Túhe ebyookulya bye enzuma tubóne kulama ne embíbo zo kubyáala, tutaákwiiza kufwa ne ensaambo zéetu zitaákwooma zikaba peyege.”
20 Níkwo Yozéfu kugula ensaambo zóona za Miísiri zíbe zo mwa Faráo. Buli Mumiísiri yaáhatikwa agúze ensaambóye habwo kuba iífwa likaba lili liháango bwooli. Habwéecho, éensi yóona yaaba yo mwa Faráo. 21 Yozéfu yaábakola Abamiísiri bóona kúba abahálilab kutaándikila olubazu lúmo kuhika olubazu olúundi lwa Miísiri. 22 Náho Yozéfu taláguzile ensaambo zoóna zóona za abakulu be edíini. Áabo bakaba beene emigabo záabo zóona kuluga hali Faráo, nabo bakaba beene ebyookulya bihikile. Habwéecho, tibalazizile echihika cho kuguza ensaambo záabo. 23 Mála Yozéfu yaagaambila Abamiísiri, “Naabáguzile íimwe mwéena ne ensaambo zéenyu mube ebiintu byo mwa Faráo. Óobu, nimuhaábwa embíbo mubóne kuzibyaala omuunsaambo zéenyu. 24 Obuchilo bwo mwéezo mulyaámuha Faráo eémo ye itáanu ye embíbo. Iína ye itáanu ya amabonwa agalísigala gabe embíbo záanyu zo kubyáala ne ebyookulya hali íimwe hamo ne embága záanyu na abaana béenyu.”
25 Baámusubiza, “Mukáma wéetu, waachíza obulami bwéetu! Nitusába otwoóleke obuganyizi bwaawe neechwe nitúba abahálila ba Faráo.”
26 Kulugiilila áaho Yozéfu yaatáho obuteéka omúunsi ya Miísiri, no óobwo buteéka buchiliho, nkokwo eémo yi itáanu ya mabonwa eébe yo mwa Faráo. Náho ensaambo za bakulu be edíini nizo zoónka ezitalákomweezwého no óobwo buteéka habwo kuba tiziláguzilwe na Faráo.
27 Mbweenu abaantu ba Izilaelic bakatuula óokwo Goshéeni, omúunsi ya Miísiri. Baaba baábona no kukanyisa ebiintu bíinzi, baázaala baázaalílana.
Omulago Gwa Yakobo
28 Yakobo akeekala omúunsi ya Miísiri emyáaka ikúmi na musáanzu, habwéecho, emyáaka yo obulamíbwe ekaba eli emyáaka igána límo na makúmi aána na musáanzu (147). 29 Obuchilo bwa Izilaeli kufwa kábweeliliile héehi, yaayeta Yozéfu omwaanáwe, yaámugaambila, “Niinkusába, mazima kólaaba nonyeénda, oóte echigaanza chaawe ahaansi ye ebibelo byaanze, ondahílile nkokwo olyaánkoléla omulago gwaanze gwi itegezo. Nagwo ni, otaliínziika kunu Miísiri. 30 Kaándífwa otaliínziika omúunsi ya Miísiri, kwoónka ontwáale kuúnziika hamo na bazéele baanze, óokwo Kanáani.” Yozéfu yaámusúbiza, “Ndyaákola nkokwo waandagíla.”
31 Izilaeli yaaguma kumukómeenteleza, “Ondahílile!” Mála Yozéfu yaámulahilila. Ahonyini Izilaeli yeénamila hachitabóched omukusiima.