Izilaeli Kuzeenda Miísiri
46
1 Áaho Izilaelia akabaanza oluzeendólwe kuzeenda Miísiri hamo ne ebiintúbye byóona. Káyaahikile Beer-Shéba, yaataamba ebitáambo hali Múungu ayaabele naahabudiwa na Izáaka ali iíse.2 Omuchilo Múungu yaahooya na Izilaeli nka ali omubilooto, yaamweeta, “Yakobo! Yakobo!”
Yakobo nawe ayétabila, “Kaláme niinhuliilíza.”
3 Múungu yaámugaambila, “Iinye ndi Múungu, Múungu wa iíso. Otátiina kuzeenda Miísiri habwo kuba ndyaákukóla obe olugaanda luháango óokwo. 4 Iinye nyini niinzeénda hamo neewe óokwo Miísiri na ndyaásubya oluzáalo lwáaweb kunu. Neewe olyaáfweela omuungalo za Yozéfu.”c
5 Níkwo Yakobo kulugáyo Beer-Shéba. Abatábanid baatwaala isébo, abaana báabo abaabele bachili bato, na bakázi báabo omumagáali agakweeswa ne ensíkili. Amagáali áago bakahaabwa kuluga hali Faráo kubáhweela omuluzeendo lwáabo. 6 Baatwaala ne ebituungaánwa hamo ne ebiintu byáabo byóona ebyoobaatuúnzile omúunsi ya Kanáani, baázeenda Miísiri. Yakobo akazeenda no lugaandálwe lwóona. 7 Abaana na abeézukulu abo obukwaáta na abo obuhalákazi, bóona baázeenda hamo náze óokwo Miísiri.
Amazíina Ga Abaana Na Abeézukulu Ba Yakobo Abaziile Miísiri
8 Áaga nígo amazíina ga batábani ba Izilaeli na beézukulu áabo abaazeenzile óokwo Miísiri. Reubeeni akaba ali omwaanáwe wo obuzigeezo, nawe akaba ayina 9 batábani bali Hanóoki, Palu, Hezeróoni na Karimi.
10 Simeyoni akaba ayina batábani bali Yemwéeli, Yamíini, Oháadi, Yakíini, Soháari na Shauli ayaazeelwe hamukázi we Chikanáani.
11 Abatábani ba Láawi bakaba bali Gelishóoni, Koháati na Meráari.
12 Abatábani ba Yuda bakaba bali Eri, Onáani, Shéela, Peréesi na Zéera, náho Eri na Onáani bakafweela omúunsi ya Abakanáani. Abatábani ba Peréesi bakaba bali Hezeróoni na Hámuli.
13 Abatábani ba Isakáari bakaba bali Tóla, Púva, Yashubu na Shimuróni.
14 Abatábani ba Zebulúuni bakaba bali Seréedi, Elóoni na Yaléeli.
15 Áabo nibo abatábani ba Léeya áabo yaazeele na Yakobo óokwo Mesopotamiae hamo no muhala woómwe Dina. Abaanábe bóona na beézukulúbe bakaba bali abaantu makúmi ásatu na ásatu.
16 Gáadi akaba ayina batábani bali Sifiyoni, Hagi, Shuuni, Esibóoni, Eri, Aroodi na Aréeli.
17 Abatábani ba Ashéeri bakaba bali Ímuna, Íshiva, Íshivi, na Beria. Nawe Séera akaba ali munyaányabo. Abatábani ba Beria bakaba bali Hebéeri na Malikiyéeli.
18 Áabo ikúmi na mukáaga nibo abaana na beézukulu ba Yakobo na Zílipa ali omuzánakazi óogwo Labáani yaaheele omuhala woómwe Léeya.
19 Yakobo na Raáhéeli bakazáala abaana bábili bali Yozéfu na Benyaámini.
20 Óokwo omúunsi ya Miísiri, Yozéfu akazáala abaana bábili bali Manáase na Efraimu hamukazíwe Asenáati, muhala wa Potiféera, ayaabele ali mukúlu we edíini omuchikáali cha Oni.
21 Abatábani ba Benyaámini bakaba bali Beela, Bekéeri, Ashibéeri, Géra, Naamani, Ehi, Roshi, Mupímu, Hupímu na Aríidi.
22 Áabo ikúmi na bana nibo abaana na beézukulu ba Yakobo na Raáhéeli.
23 Omutábani wa Dáani akaba ali Hushimu.
24 Abatábani ba Naftáali bakaba bali Yaséeli, Guni, Yeséeri na Shilemu.
25 Áabo musaanzu nibo abaana na beézukulu ba Yakobo na Bíliha ali omuzánakazi óogwo Labáani yaaheele omuhala woómwe Raáhéeli.
26 Enzáalwa bóona áabo Yakobo yaazeenzile nabo Miísiri bakaba bali makúmi mukáaga na mukáaga, kwiihámo abeengábe. 27 Na abatábani ba Yozéfu áabo yaazaaliiléyo Miísiri bakaba bali bábili. Habwéecho, oluzáalo lwo mwa Yakobo olwazeenzíle Miísiri lukaba lwina abaantu makúmi musaanzu.f
Kuhika Kwa Yakobo Ne Mbagáye Omúunsi Ya Miísiri
28 Áaho Yakobo yaamwiíbeembeza Yuda hali Yozéfu azeénde kuháabwa akazeendele ko kwiiza Goshéeni. Yakobo ne embagáye kábaahikile omuchaalo cha Goshéeni, 29 Yozéfu yaaloonza igaalílye elíkweeswa ne efaláasi, yaazeenda kumwaánaankula iíse Izilaeli óokwo Goshéeni. Yozéfu káyaahikile hali iíse, ahonyini yaámubuúmbatila omubicha no kulilila omubichábye omwáanya mula. 30 Habwo obunulilwa bwíinzi Izilaeli yaagaambila Yozéfu, “Óobu, naakaáhicha kufwa habwo kuba naabona obuso bwaawe no kumanya nkokwo ochili mwooyo.”
31 Yozéfu yaagaambila beenebáabo ne embága yóona yo mwa iíse, “Óobu, nichigása nzeénde hali Faráo kumumanyisa nkokwo beenebéetu ne embága yóona yo mwa táata abaabele bali omuchaalo cha Kanáani beeza hali iinye. 32 Nniimusoomboólela nkokwo muba abatuúnga na abalíisa be ebituungaánwa. Neemwe mweeza ne embuzi, entaama, ne ente zéenyu hamo ne ebiintu byáanyu byóona. 33 Mbweenu Faráo kaálaabéeta no kubabúuza, ‘Mumánya milimóchi?’ 34 Mugaámbe, ‘Mukáma wéetu, íichwe tuli abalíisa be ebituungaánwa kulugiilila habuto bwéetu kuhika háti nkokwo bakaba bali abazeele béetu.’ Mugaambe mútyo mubóne kukuúndilwa kutúula omuchaalo cha Goshéeni, habwo kuba abalíisa be ebituungaánwa ni itamiso Habamiísiri.”