Okwiimanyísa Kwa Yozéfu Hali Beenebáabo
45
1 Áaho káyaahuliile ebigaambo bya Yuda, Yozéfu yaálemwa kwiígumisiliza kulila omuméeso ga áabo abakozíbe abaabele bali héehi náze. Yaábalagila hakutéela empámo, “Mulúge omuméeso gaanze buli oómo!” Habwéecho, Yozéfu yaaba yaasigala weénka na beenebáabo boónka obuchilo naayimanyísa hali boónyini. 2 Mála, yaateela empámo mpaka abakozíbe Abamiísiri baámuhulila, ne empola éezo zaahika omuchikáali cha Faráo.3 Yozéfu yeémanyisa hali beenebáabo, “Iinye níinye Yozéfu.” Yaábabúuza, “Isíinye achili mwooyo?” Kwoónka beenebáabo baásobelwa, baálemwa kumusubiza habwo obutíini omumeesóge.
4 Níkwo Yozéfu kugaambila beenebáabo, “Munyilíle héehi,” nabo beelila héehi. Mála yaábazila aáti, “Iinye níinye Yozéfu óogwo mwagulíze kuza omúunsi ya Miísiri. 5 Óobu, mutába no obuzune nali mutesaáyila habwo kuúnguza kwiiza kunu. Kwoónka Múungu níwe yaandeésile kunu mbeebeembélele ambónese kuchiza obulami bwa abaantu béenzi. 6 Óogu no omwaaka gwa kábili gwi iífwa omúunsi yóona, na echáali elíyo emyáaka eéndi itáanu abaantu tibálilima nali kugesa. 7 Múungu akaandeeta kunu kubeébeembelela abóne kubachíza íimwe omuunáku zi iífwa habwo obuchuúnguzi buháango, no kuzeendeleza oluzáalo lwáanyu omúunsi. 8 Habwéecho, tí íimwe mwaandeésile kunu, kwoónka ni Múungu weényini níwe yaandeesile kunu. Níwe Múungu akankola mbe omuhánuuzi wo Omukáma Faráo, omwiímeelelezi mukúlu we ekáye yóona, no omutégeki we éensi yóona ya Miísiri. 9 Mbweenu muzeénde bwaangu hali isíinye, mumugaambile, ‘Omwaana waawe Yozéfu naagaámba, “Múungu akaantáho kúba mukúlu we éensi yóona ya Miísiri, habwéecho, oteélilwa, oyize bwaangu hali iinye. 10 Olaatuula omuchaalo cha Goshéeni omuli Miísiri, héehi neenye, íiwe hamo na abaana baawe, beézukulu baawe, ebituungaánwa byaawe na byóona éebyo oyinábyo. 11 Óokwo ndaaba niimbáha byóona éebyo kubagasa íiwe, embága yaawe, ne ebituungaánwa byaawe, mutaákwiiza kufwa ne enzala, habwo kuba echáali elíyo emyáaka itáanu eéndi yi iífwa.” ’ ”
12 Yozéfu yaaguma kubagaambila, “Óobu, neemwe hamo na mweene wéetu Benyaámini mweébonela haméeso gáanyu nkokwo iinye mazima ndi Yozéfu ndíkugaambagaamba neemwe. 13 Mumugaambile táata nkokwo nyina isima liháango omúunsi ya Miísiri. Kaandi mumugaambile byóona éebyo mwabona obuchilo muli áaha. Muzeénde mumuléete bwaangu táata áaha.”
14 Mála yaámufuúmbatila omulúmuna Benyaámini, yaálila. Nawe Benyaámini yaálila, kunu beéfuumbasile. 15 Yozéfu achaálila yaábanyweégela beenebáabo bóona. Káyaamazile, beenebáabo baahooya náze obutátiina.
Faráo Kulaálika Yakobo Kwiiza Miísiri
16 Empola éezo zo kwiiza kwa badugu ba Yozéfu zikahika hachikaali cha Faráo, na weényini hamo na abatwaalilizábe bakanulilwa bwooli. 17 Faráo yaagaambila Yozéfu, “Bagaambíle beenebáanyu bahiíke emigugu yáabo haansíkili záabo basúbe owáabo omúunsi ya Kanáani. 18 Bamuleete áaha isébo na badugu báabo bóona. Iinye niimbáha obutúulo buzima bwooli kuchila hóona omúunsi ya Miísiri. Óokwo balaáhicha kubonesa amabonwa mazima ge éensi éezi. 19 Kaandi niinkulagíla obagaambile beenebáanyu batwaále amagáali go kukweeswa ne ensíkili kuluga Miísiri babone kuleételámo abaana abato na bakázi báabo, bamuhíike isíimwe, na beéze náze áaha. 20 Obagaambile bataákusaaswa múno kabalaaléka ebiintu byáabo óokwo Kanáani habwo kuba niimbagabíla echaalo chizima kuchila byóona omúunsi ya Miísiri.”
21 Níkwo baakózile abaana ba Izilaeli.a Yozéfu yaabaha amagáali nkokwo Faráo yaalagíile. Kaandi yaabaha entaanda yo kulya omumuháanda. 22 Akaha buli muuntu emyéenda emísha yo kuhiindula omumuháanda, kwoónka Benyaámini akamuha eshekéeli magána ásatu na emyéenda itáanu emísha yo kuhiindula. 23 Kaandi yaatweekela iíse ebiintu nke éebi, ensíkili ikúmi ezisutwiile ebiintu bizima kuluga Miísiri, ensíkili ezíindi ikúmi ezisutwiile ebyookulya bye enzuma ne emikaate ne ebyookulya byo kulya omumuháanda. 24 Yozéfu yaalagana na beenebáabo. Omukutáana kwáabo, yaábahaambiliza, “Mutaákutiina omumuháanda.”b
25 Áaho baaluga Miísiri baásuba owáabo hali isébo Yakobo omúunsi ya Kanáani. 26 Kábaahikile, baágaambila isébo, “Táata, Yozéfu achili mwooyo! Mála kaandi weényini níwe omutégeki we éensi yóona ya Miísiri!” Kwoónka isébo yaátitihala habwo kusobelwa, taleésigile ebigaambo byáabo. 27 Kwoónka kábaamusoombooliile byóona éebyo balaagíilwe na Yozéfu, kaandi káyaabweene amagáali áago Yozéfu gayaamutumíile kwiiza kumutwáala, Yakobo yaateékaana no kunulilwa bwooli.
28 Izilaeli yaágaamba, “Óobu, neékiliza na mazima! Omwaana waanze Yozéfu achili mwooyo, habwéecho, nzeénde bwaangu kumubóna ntákafwiile.”