Echikóombe Cha Yozéfu
44
1 Beenebáabo Yozéfu kibaahikize kwiimuka kutaaha, Yozéfu yaalagila omwiímeelelezi we nzúye naagaámba, “Izuza ebyookulya bye enzuma omumagunila ga badugu áaba ebibaakuhicha kwiimucha, mála subyaamo empilya za buli muuntu halugulu ye ebyookulya omwiigunilálye. 2 Omwiiguníla lya mulúmuna wáabo wa hamuhélo, otémo echikóombe chaanze cho obukáani buháangoa hamo ne empilyáze.” Nawe óogwo mwiímeelelezi yaakola nkokwo yaalagílwa na Yozéfu.3 Kábwaachíile abadugu áabo baákuundilwa kutaaha owáabo hamo ne ensíkili záabo. 4 Batákahikile hala kuluga hachikaali, Yozéfu yaagaambila óogwo mwiímeelelezi we nzúye, “Bakulaatile bwaangu áabo baantu! Mazima noobakwaatila omumuháanda. Ahonyini babúuze, ‘Habwaáchi íimwe mwamuliha ebíbi Mukáma waanze obuchilo weényini abakoliile bizima byoónka? 5 Habwaáchi mwayiba echikóombe cho obukáani buháango cho mukáma waanze echaányweelámo, na kaandi nicho akolelámo obubáasi?b Mwaáhaba bwooli kukola mútyo!’ ” 6 Óogwo mwiímeelelezi káyaabakwaatiile omumuháanda, yaasubámo kubagaambila ebigaambo éebyo nkokwo yaabeele alagiilwe. 7 Náho boónyini baámusubiza omukumubúuza baáti, “Mukáma wéetu, oyine ensoongáchi kutubeéheleza oótyo? Ichwe, abahálila baawe, nitulahila titukwiíle no obuche bwa kati kukola echigaambo nke éecho! 8 Izúka Mukáma wéetu, tukasúbya empilya ezitwaasaangíle omumagunila géetu kuluga omúunsi yéetu ya Kanáani. Titúkuhicha kwíiba efeeza nali ezaháabu kuluga omúka yo Omukáma waawe! 9 Mbweenu, omuli íichwe kaálaasaangwa ayine echikóombe éecho, ayitwe, neechwe abáandi bóona nitúba abahálila baawe.”
10 Omwiímeelelezi yaágaamba, “Neékiliza, kwoónka óogwo alaaba ayina echikóombe éecho, níwe alaaba omuhálila waanze, náho abáandi bóona tibákuba ne entaambala.”
11 Áaho, buli muuntu yaatuula igunilálye bwaangu ahaansi no kulikómoolola. 12 Óogwo mwiímeelelezi yaaloondela omumagunila góona, kutaándikila omwiiguníla lyo omukúlu wáabo no kumaliiliza omwiiguníla lya mulúmuna wa hamuhélo. Echikóombe chiba chaásaangwa omwiiguníla lyo mwa Benyaámini. 13 Áaho, baateemula ebizwáalo byáabo habwo obuzune. Buli muuntu yeemucha igunilálye no kulíta haansikilíye, baaba bóona baásuba hachikaali.
14 Obuchilo Yuda na badugúbe kábaahikile omúka ya Yozéfu, weényini akaba achili omuunzu omwo. Ahonyini baamugwa omumagulu. 15 Yozéfu yaábabúuza, “Habwaáchi mwaankolela mútyo? Mumanye nkokwo omuuntu nkeenye nyina obuzizi bwo obubáasic bwo kumanya ebikolwa byéenyu ebiíselekile!”
16 Yuda yaámusúbiza, “Mukáma wéetu, tukugaambiléchi? Tusubye túta? Nali tweegaambe túta? Múungu yaaselekulula obuzilwa bwéetu. Óobu, íichwe chwéena twaaba abahálila baawe hamo no óogwo asaangilwe ne echikóombe chaawe.”
17 Náho Yozéfu yaábagaambila, “Mmahi! Iinye tinaákuhicha kukola ntyo! No óogwo weénka ayaásaangwa ne echikóombe chaanze níwe alaaba omuhálila waanze. Íimwe abáandi bóona mutáahe omúka no obuhóolo hali isíimwe.”
Yuda Kumuchiíngila Echifúba Benyaámini
18 Áaho niho Yuda kumwiílila héehi Yozéfu no kumugaambila, “Mukáma wéetu, niinkusába onkuúndile iinye, omuhálila waawe, nyiisoombóole butúnu omuméeso gaawe habigaambo bíche. Kaandi niinkusába otákunigahala habwo kuba íiwe ni nka Faráo weényini. 19 Mukáma wéetu, okatubúuza nkokwo twíina isíichwe nali mweenewéetu oóndi. 20 Neechwe Tukakusoomboolela nkokwo twiináze isíichwe, nawe yaabeele omunyaampala, na twíina mulúmuna wéetu ayaazeelwe obuchilo isíichwe yaabeele omunyaampala. Mukúlu wo óogwo musígazi aláfwiile no óogwo omulúmuna níwe weényini weénka asigeele omuunda ya nyinábo. Óogwo musígazi aba engaanzi bwooli ya isíichwe. 21 Íiwe mukáma wéetu okatúlagila kumuléeta hali íiwe óogwo mulúmuna wéetu omubóne. 22 Tukakusoomboolela nkokwo óogwo musígazi takwiíle kutáana na iíse, habwo kuba káyaakukola aátyo, iíse yaakaáfwa. 23 Náho íiwe waátugaambila nkokwo kátulaaleka kwiiza na mulúmuna wéetu, titulibubona kaandi obuso bwaawe. 24 Kátwaasubíle omúka hali isíichwe twaámuteékelela byóona éebi watulagíile. 25 Áaho isíichwe yaágaamba, ‘Musúbeyo Miísiri kutúgulila ebyookulya ebíindi.’d 26 26 Twaámusubiza, ‘Titúkuhicha kusubáyo óokwo tweénka. Nituzeénda kaálaba ali hamo neechwe mulúmuna wéetu. Óogwo omukúlu tákuhicha kutwaánaankula kátulaasiga mulúmuna wéetu.’
27 “Kaandi isíichwe yaátugaambila, ‘Nimumánya nkokwo iinye na mukaanze Raáhéeli tukazáala abaana bábili boónka. 28 Oómo akabúla, mazima akalaansamulwa no kulíibwa ne echikoókwa cho muchitúuntu habwo kuba tiínkamubonaga buluga óobwo. 29 Kámulatwáala Benyaámini nawe kuluga hali iinye, mála kayaakuhutáala, bityo nimuuntwaála omúunsi ya abáfwiilee ndyo omunyaampala azooliilwe bwooli.’
30-31 “Mbweenu, mukáma wéetu, tinaákuhicha kusubáyo hali isíichwe ntéena omusígazi óogu. Táata kaálaabona óogu musígazi atáli hamo neechwe, yaakaáfwa habwo kuba obulamíbwe nibweegamíla habulami bwo musígazi óogu. Nituleeteleza omunyaampala isíichwe aáfwe hakuzoolelwa bwooli. 32 Noolu kusaaga, mukáma wéetu, iinye nkalahila hali táata kúba omwiímeelelezi no kweémanya bwooli obulami bwo óogu musígazi. Nkamúgaambila nkokwo kaándaaba ntasubíze Benyaámini hali weényini, entaambala yóona yo kuleka kumusúbya hali táata eébe yaanze ebilo byóona.