Badugu Ba Yozéfu Kuzeenda Kaandi Miísiri Hamo Na Benyaámini
43
1 Obuchilo óobwo iífwa lyaáguma kukánya omúunsi ya Kanáani. 2 Kábyaahwéele ebyookulya bye enzuma bibaabeele baguzile kuluga Miísiri, Yakobo yaábagaambila kaandi abaanábe, “Musúbeyo Miísiri kutúgulila ebyookulya ebíindi.”a3 Náho Yuda yaasubiza iíse, “Táata, óogwo muuntu akatúhaambiliza hakutukómeenteleza naagaámba, ‘Tímuliimbona kámuliba mutamuleesile mulúmuna wáanyu.’ 4 Kólaamukuúndila mulúmuna wéetu azeénde hamo neechwe, nituza kukugulila ebyookulya. 5 Kólaayáanga azeénde neechwe, titúkuzáyo óokwo habwo kuba óogwo muuntu akatugaambila butúnu, ‘Tímuliimbona kaandi kámuliba mutamuleesíle mulúmuna wáanyu.’ ”
6 Izilaelib yaágaamba naadaáya, “Habwaáchi mukaandeétela enáku éezi habwo kumugaambila óogwo muuntu nkokwo mwiine mulúmuna wáanyu oóndi?”
7 Baámusubiza, “Óogwo muuntu akatubuúliliza bwooli empola zéetu ne za badugu béetu omukugaamba aáti, ‘Isíimwe achili mwooyo? Mwiine mweenewáanyu oóndi?’ Neechwe twaámusubiza nkokwo akaba naatubuúliliza. Mazima titulámanyile ihélezo lyoómwe nkokwo alaátulagila naagaámba, ‘Mumuléete áaha mulúmuna wáanyu!’ ”
8 Yuda yaagaambila iíse, Izilaeli, “Mulekúlile Benyaámini azeénde hamo neenye obunyíni, tuzeénde kusaka ebyookulya tutaákulaambuuka hamo neewe na abaana béetu. 9 Iinye niindahíla omuméeso gaawe kumweémanya Benyaámini. Kaándileka kumusúbya no kumuléeta áaha omuméeso gaawe, entaambala éezo yóona eébe hali iinye ebilo byóona. 10 Mánya kátwaakulekile kwiílilwa kuzeenda na Benyaámini, twaakuba twaázeenzile no kusuba entulo ibili.”
11 Níkwo Izilaeli isébo kubagaambila, “Kaálaaba naatuhatika kukola tútyo, mukole mútyo. Mutémo omunfulebe amabonwa mazima ge éensi yéetu mubóne kumutwaálila óogwo omukúlu engabilano nka amazúta mazima ge emiti go kweésiiga, obwochi, ebiluungo, emanemane,c ne enzuma ze emiti ze emikuungu ne ze emilozi. 12 Mutwaále empilya entulo ibili ye éezo ezilikwéendwa habwo kuba mazima musubye empilya éezo mwasaangíle halugulu yo omumagunila gáanyu. Lúundi abaantu áaba bakahaba kuzisúbyaamo. 13 Mutwaále mulúmuna wáanyu, musúbeyo bwaangu hamuuntu óogwo. 14 Múungu Omuzizi Wa Byóona abahwéele mubóne kuganyilwa omuméeso go óogwo muuntu, abóne kumulekulila mweenewáanyu Simeyoni na Benyaámini ataákukwaatwa, babone kusuba omúka bóona hamo neemwe. Habwaánze, kábilaaba bili bityo, iinye nkwiile kubúlwa abaana baanze, mbweenu na bibe bityo!”
15 Ahonyini bakulúbe Benyaámini beémucha engabilano ne empilya ezili entulo ibili ye éezo éezi baatwéele olwa mbele, baalugáho kuza Miísiri. Kábaahikile Miísiri hamo no mulúmuna wáabo Benyaámini, baázeenda, beemeelela omuméeso ga Yozéfu. 16 Yozéfu káyaabweene omulúmuna Benyaámini ali hamo nabo, yaalagila omwiímeelelezi weenzúye, “Obatwáale abaantu áaba omúka, obabaágile echituungaánwa chimo no kubáloongeza ebyookulya bizima habwo kuba abaantu áaba nibeekúla neenye.”
17 Omwiímeelelezi óogwo yaakola nkokwo yaalagíilwe, yaátwáala abazenyi omuchikáali cha Yozéfu. 18 Kábaabweene nibatwaálwa owa Yozéfu, baakwaatwa obutíini, beégaambila boónyini boónka, “Twaaleetwa kunu habwa éezo empilya ezibaatusúbiize omumagunila géetu obútweezile kunu olwa mbele. Weényini naayeénda echiitélelekezo cho kututéela, kutwáaka ensíkili zéetu no kutukóla kúba abahalilábe.”
19 Habwéecho, baamwiilila héehi óogwo mwiímeelelezi wéenzu ya Yozéfu, baahooya náze bachili hachisasi, 20 baámugaambila, “Nitusába otuhuliilize nyakutuula. Amazima íichwe tukeeza áaha olwa mbele kusaka ebyookulya. 21 Kátwaabeele nitutáaha owéetu, omuchilo tukahuúmula omuunzu yo kulyaama abazenyi. Áaho kátwaakomoolwele amaguníla géetu, tukasobelwa kusaanga empilya zóona za buli muuntu omuli íichwe halugulu ye ebyookulya omwiigunilálye. Habwéecho, óobu twaásubya empilya éezo. 22 Titúkumanya no oóhi ayaazisubizémo omumagunila géetu. Óobu, twaaleeta empilya ezíindi zo kugula ebyookulya.” 23 Óogwo mwiímeelelezi yaábasubiza, “Mutaákutiikatiika na kaandi mutátiina. Mazima Múungu wáanyu, Múungu wa isíimwe, níwe yaababónesize empilya omumagunila gáanyu. Iinye nkeenaankula empilya záanyu obuchilo óobwo.” Mála weényini akachiíngulila Simeyoni no kumuléeta hali beenebáabo.
24 Áaho óogwo mwiímeelelezi yaábanyegeza omuunzu ya Yozéfu, yaabaha améenzi go kunaaba amagulu gáabo ne ensíkili záabo yaáziliisa. 25 Kábahuliile Yozéfu naayiza kulya nabo omwiiháangwe, baaloonza engabilano záabo zo kumuha weényini.
26 Yozéfu káyeezile omúka, beénama nibamulamíliza no kumuha éezo engabilano. 27 Yozéfu yaábabúuza empola záabo, kaandi yaábabúuza, “Omunyaampala isíimwe óogwo mwaangaambíile ni muzima? Achili mwooyo?”
28 Baámusubiza, “Omuhálila waawe ali isíichwe ni muzima, achili mwooyo.” Baámala kugaamba éebyo, beénama hakwiícheesha omumeesóge.
29 Yozéfu káyeenamwiile améeso yaámubona Benyaámini omulúmuna, omwaana wa nyina, yaabuuza, “Kási! Óogu níwe mulúmuna wáanyu, óogwo mwaangaambíila empoláze?” Mála yaámugaambila, “Múungu akufúuhe, omwaana waanze.” 30 Yozéfu akaba ayine echihika no obunulilwa buháango bwo kumubóna kaandi omulúmuna mpaka yaáyeenda kulila. Habwéecho, yaalugáho bwaangu omuméeso gáabo, yaataaha omuchiseenge choómwe, omwo yaálila bwooli. 31 Káyaamazile kunaaba omubúso, yaalugámo omuchiseenge kunu neeyoomeléza, yaalagila, “Muleéte ebyookulya!”
32 Baámuloongeza Yozéfu olubazu lwo kulíiláho weénka, nabo beenebáabo olubazu boónka, na Abamiísiri abeezile náze, nabo olubazu boónka. Abamiísiri bakaba batálya ebyookulya hamo na Abahebrania habwo kuba gukaba guli omuzilo gwa Abamiísiri kulya hamo nabo. 33 Beenebáabo Yozéfu bakeekazíbwa omuméeso ga Yozéfu kwiingana akazaálilwe káabo kutaándikila omukúlu kuhika omuto. Baaba nibeléeba nibasobélwa nkokwo yaamanya akazaálilwe káabo. 34 Bakahaabwa ebyookulya kuluga aha meéza ya Yozéfu, náho Benyaámini akahaabwa entulo itáanu kuchila beenebáabo. Mála baálya, baánywa banuliilwe hamo na Yozéfu.