Beenebáabo Yozéfu Kuzeenda Miísiri
42
1 Yakobo akahuliza nkokwo hakaba heene ebyookulya bye enzuma óokwo Miísiri. Habwéecho, yaagaambila abaanábe hakukuúngana, “Habwaáchi kámweekala áaha mutuunkumeele mutéene mulimo? 2 Naahuliza nkokwo óokwo Miísiri heene ebyookulya bye enzuma. Mwiimúke muzeénde kusaka ebyookulya tutaákwiiza tukafwa ne enzala.” 3 Níkwo beenebáabo Yozéfu ikúmi kuzeenda Miísiri kusaka ebyookulya bye enzuma. 4 Náho Yakobo yaazibila Benyaámini, mulúmuna wa Yozéfu, ataákuzeenda hamo na beenebáabo habwo kuba akaba naáteekuza, “Ataákwiiza kusaangwa neébibi.” 5 Habwéecho, abaana ba Izilaelia bakaba bali omuli áabo baantu abaazeenzile kusaka ebyookulya bye enzuma óokwo Miísiri habwo kuba iífwa likaba lyaatiile omúunsi ya Kanáani hamo na Miísiri.6 Obuchilo óobwo Yozéfu níwe akaba ali mukúlu we éensi ya Miísiri. Akaba ali omwiímeelelezi wa abaguza be ebyookulya bye enzuma ha baantu bóona omúunsi. Badugúbe kábaahikile omumeesóge, baamugwa omumagulu no kumulámya. 7 Yozéfu káyaababweene beenebáabo, ahonyini yaábamanya, náho yeékola nka atákubamanya. Mála yaábabúuza hakubachaáhukila, “Mwaaluga nkáhi íimwe?” Nabo baámusubiza, “Twaaluga omúunsi ya Kanáani, tweeza kusaka ebyookulya bye enzuma.”
8 Nóobwo Yozéfu akaba yaábamanyile beenebáabo, boónyini tibálamumanyile. 9 Níkwo Yozéfu kwiizuka ebilootóbye bya kala, éebyo yaaloósile hali beenebáabo. Mála yaábagaambila, “Íimwe muli abatási!b Mweeza kuleeba obuchéne omubuliinzi bwe éensi yéetu.”
10 Boónyini baámusubiza omukweéhohola, “Mukáma wéetu, tí bityo. Ichwe tuli abahálila baawe tweeza kusaka ebyookulya bye enzuma. 11 Ichwe chwéena tuli abaana bo muzeele oómo, tuli abaantu abeésigwa, kwoónka tituli abatási.”
12 Áaho Yozéfu yaaguma kubaángilila, “Mmahi! Mweeza kuleeba obuchéne omubuliinzi bwe éensi yéetu.”
13 Boónyini baámusubiza, “Mukáma wéetu, íichwe tuli abahálila baawe, tukaba tuli enzáalwa ikúmi na bábili bo omuzéele oómo, omutúuzi we éensi ya Kanáani. Mulúmuna wéetu wa hamuhélo yaasigala na táata omúka, no oóndi akáfwa.”
14 Náho Yozéfu yaaguma kubagaambila, “Nikwo ndíkubágaambila. Muli abatási kwoónka! 15 Niimbaleengésa íimwe kámulaaba nimungaambila éebyo bya amazima. Naálahila ahi izíina lya Faráo, tiínkubálekulila kuluga áaha ntabweéne mulúmuna wáanyu. 16 Mutume oómo omuli íimwe azeénde kumleeta óogwo mulúmuna wáanyu. Abáandi bóona nimutwaálwa omwiibóhelo. Áaho niho ebigaambo byáanyu bilaamanyíika nkokwo na mazima. Kábilaaba bitali bityo, mazima go omubulami bwa Faráo, íimwe muli abatási.” 17 Mála yaábatwáala bóona omwiibóhelo ebilo bísatu.
18 Echilo cha kásatu Yozéfu yaábagaambila, “Iinye ni lutiina Múungu. Muzíle nkokwo naabagaambila mubóne kulama. 19 Kámulaaba muli abeésigwa, oómo omuli íimwe asigále omwiibóhelo omwo mwachiíngiilwe na abáandi babatwaálile ebyookulya badugu báanyu abeena enzala. 20 Náho niimbahatika kumuléeta áaha mulúmuna wáanyu iinye mbone kumanya no kukómela nkokwo ebigaambo byáanyu ne bya mazima. Kábilaaba bili bya mazima, no okufwa timúkufwa.” Nabo baákuunda kukola batyo.
21 Beégaambila omululimi lwáabo, “Kugaamba mazima nituchwaaziikilwa habwo kuba tukahénela mulúmuna wéetu. Tukamubona nkokwo akaba nayagalazibwa hakulilila obulamíbwe, kwoónka íichwe titulásaasilwe. Niyo ensoonga yo kwaágalazibwa kwéetu óoku.”
22 Reubeeni yaábagaambila, “Mazima nkabágaambila, mutaákumukolela choóna chóona echibi omusígazi óogu! Náho íimwe timúlaampulíile! Óobu, nituchwaaziikilwa habwo kuba tukamwíita.”c
23 Obuchilo óobwo tibalámanyile nkokwo Yozéfu naasoomboókelwa byóona éebyo balikuteékelela Omuchiebrania, habwo kuba hakaba haliho omumanyi we endími ze Echiebrania ne Echimiísiri, naamusoomboólela éebyo balikuhooya omuChimiísiri. 24 Mála Yozéfu yaalugáho, yaaza halubazu, yaabaanza kulila. Káyaateékeene, yaasuba kuhooya na beenebáabo. Mála yaátooza Simeyoni omuli áabo, yaakomwa emiguha omuméeso gáabo.
Beenebáabo Yozéfu Kusuba Omúka
25 Yozéfu yaalagila abahalilábe beezúze ebyookulya bye enzuma omumagunila ga beenebáabo na buli muuntu omuli áabo asubizíbwe empilyáze habwiiseléke omwiigunilálye. Kaandi yaalagila bahaábwe entaanda zo kulya omumuháanda. Abahálila bakakola ebigaambo éebyo byóona. 26 Beenebáabo Yozéfu baázitwéeka ensíkili záabo emigugu yáabo ye ebyookulya bye enzuma, mála baázeenda.
27 Kábaahikile ahaanzu yo kulyaama abazenyi, baatuula emigugu yáabo kuhuúmula, oómo omuli áabo yaákomoolola igunilálye abóne kwiihámo ebyookulya bye enzuma byo kulíisa ensikilíye. Yaásobelwa kusaangámo empilyáze zikomile, no kubona zili omwiiguníla halugulu ye ebyookulya bye enzuma. 28 Níkwo kugaambila bazeenzíbe, “Baansubize empilya zaanze, leeba nzizi áaha omwiiguníla lyaanze!” Kábaahúliile batyo, baázolelwa. Beéleeba bóona omukuzugúma nibeébuuza, “Ne echigaambóchi éechi Múungu yaátukoléla?”
29 Kábaahikile hali isébo Yakobo omuchaalo cha Kanáani, baámuteékelela byóona éebyo baakoliilwe óokwo Miísiri, nibamugaambila, 30 “Omukúlu we éensi éezo yaágaamba neechwe omukuchaáhala no kutuleega nkokwo íichwe tuli abatási omuunsíye. 31 Náho íichwe twaámusoomboolela, ‘Mukáma, íichwe tuli abaantu abeésigwa, tituli abatási. 32 Ichwe, tukaba tuli abaana ikúmi na bábili hali isíichwe oómo. Oómo omuli íichwe akakába na kwaángu wéetu asigeele omúka hali táata omúunsi ya Kanáani.’ 33 Níkwo omukúlu we éensi éezo kutúgaambila, ‘Kámulaaba nimungaambila amazima, msige oómo áaha omuli íimwe asigále neenye, neemwe abáandi mutwaále ebyookulya bye enzuma omúka hali badugu báanyu abeene enzala. 34 Náho íimwe mumuléete áaha kwaángu wáanyu. Niho ndyaámanya nkokwo muli abeésigwa, timuli abatási. Kámulikola mútyo, niimbasubiza mweenewáanyu, neemwe nimukuundilwa kusuluza omúunsi éezi.’ ”
35 Áaho kábaabeele nibafúka ebyookulya bye enzuma byóona kuluga omumagunila gáabo, buli muuntu yaákaamaala kusaanga enfulebe yomwe ye empilya omwiigunilálye. Kábaabweene bityo, abaana áaba hamo na isébo baátiina bwooli. 36 Yakobo, isébo yaábagaambila omukuzolelwa, “Mbweenu íimwe mwaanyaka abaana baanze! Yozéfu akakába, Simeyoni táchili hamo neechwe, óobu íimwe nimweénda kumutwáala na Benyaámini búmo. Byóona éebi nibigwéela iinye!”
37 Níkwo Reubeeni kumugaambila iíse, “Ompe Benyaámini abe omuungalo zaanze, neenye nniimweemánya no kumusúbya hali íiwe. Kaándaaleka kusúbya Benyaámini hali íiwe, habwéecho, noohicha kwiita abaana baanze bábili.” 38 Náho iíse yaámusúbiza, “Mmahi! Mutábani waanze tákuzeenda neemwe. Mukulúwe Yozéfu aláfwiile na weényini Benyaámini níwe ayaasigeelého weénka omuunda ya nyinábo, Raáhéeli. Iinye ndi omunyaampala ne enzwi, omusígazi óogu kaálaahutáala omuluzeendo lyáanyu, nimunkóla iinye omunyaampala infwee nzeénde omúunsi ya abáfwiile niinyalámila omwaana waanze.”