Okugwa Kwa Abaantu Omubihéno
3
1 Omunyameéswa zóona ezaahaangílwe no Omukáma Múungu, enzóka ekaba eli enchelúke bwooli kuchila zóona. Chilo chimo enzóka yaamwiibúuzisa óogwo omukázi, “Iíngu, na mazima Múungu akagaamba, ‘Mtaákulya amagoomba go omuti gwoóna gwóona kuluga omuunsaambu éezi?’ ”2 Omukázi yaázisubiza enzóka aáti, “Mmahi. Talátwaángiile kulya amagoomba ge emiti yoóna yóona, 3 kwoónka Múungu akatugaambila, ‘Mtaákulya amagoomba go omuti óogwo oguli ahagáti ye nsáambu, kaandi mutaákugukwaatáho mutaákwiiza kufwa.’ ”
4 Enzóka yaámugaambila, “No obuche bwa kati, timulífwa! 5 Múungu akagaamba aátyo habwo kuba, Múungu naamanya kámulaalya amagoomba go omuti óogwo nimuzila obwéenze, neemwe nimuba nka Múungu weényini omukumanya ebizima ne ebíbi.”
6 Áaho, omukázi káyaabweene omuti óogwo guli muluunzi, na amagoomba gaágwo nigagása bwooli hachookulya, na kaandi geene obuhicha bwo kuléeta obwéenze, yaatábula amagoomba go omuti óogwo, yaálya. Yaámuha iíba, Adáamu, óogwo akaba ali hamo náze, nawe yaálya. 7 Ahonyini améeso gáabo gaáhuumbuluka, baayémanya nkokwo bali busa, baakolwa ensóni. Habwéecho, baateelanisa amababi maháango ge emiti, beékoma babone kusweekelela enzúula záabo.
8 Olweébazo Adáamu na mukazíwe baahulíla emisíindo yo Omukáma Múungu naalibáta omumusili, baátiina, beéseleka omumiti Múungu atababona. 9 Omukáma Múungu yaayeta Adáamu, yaámubuuza, “Oli nkáhi?”
10 Yaámusúbiza, “Naákuhúlila noolibáta omuunsaambu, naátíina habwo kuba ndi busa. Habwéecho, neéseleka.”
11 Omukáma Múungu yaámubuuza, “Noóha ayaákugaambila nkokwo oli busa? Wakoláchi! Sii, waalya amagoomba go omuti áago naakwaángiile kulya?”
12 Adáamu yaámusúbiza, “Óogwo omukázi owo waampéele kwiikala neenye níwe yaampa igoomba lyo muti óogwo, neenye naálya.”
13 Mála Omukáma Múungu yaámuchahukila óogwo omukázi, “Íiwe, habwa chiíha wakola oótyo?”
Omukázi yaámusúbiza, “Enzóka niyo yaámbeeha, neenye naálya.”
Okucheenwa Kwe Nzóka
14 Habwéecho, Omukáma Múungu yaagaambila enzóka aáti, “Habwo kuba wakola oótyo, naákucheena íiwe weénka omubituungaánwa byóona no omunyameéswa zóona. Hamucheeno óogwo, kuluga leélo nooba noolibátisa eenda yaawe no kwiikala omunkuungu omubulami bwaawe bwóona. 15 Niimbahatánisa íiwe no óogu omukázi munobáne, kaandi ndyaáhatanisa oluzáalo lwáawe no oluzaalólwe banobane. Alyaákutábagula omutwe neewe olyaámutéela echisiínsilo.”
Okwaágalala Kwa Abaantu
16 Mála Múungu yaagaambila óogwo omukázi aáti, “Niinkwoongela bwooli emisobo omukutwáala eenda, olyaálumwa obusuungu buháango omukuzáala abaana. Kaandi noomuligíla bálo no kweenda kumutegeka, náho weényini naakusiínga omukukutegeka.”
17 Yaáhiindukíla Adáamu aáti, “Habwo kuba wahulila ebigaambo bya mukáawe, walya amagoomba áago naakwaángiile kulya kuluga omuti óogwo, naáchéena itaka habwaáwe. Nooyíha ebyookulya kuluga omwiitaka hakukola emilimo elíkuguma ebilo byóona byo obulami bwaawe. 18 Itaka nilizaála amáhwa no omwáata habwaáwe, náho noólya ebyookulya bye enzuma kuluga omuumbúga. 19 Nookola emilimo zo kukúhitaanisa, niho obóne ebyookulya. Nooba oótyo kuhika obuchilo bwooligaluka omwiitaka omwo hówalugíle. Okabuumbwa kuluga omwiitaka, olyaásuba kaandi omwiitaka.”
Okubiingwa Kwa Adáamu Kuluga Edeni
20 Adáamu yaamweeta mukazíwe izíina, “Eva,”a habwo kuba weényini níwe nyina wa abaantu bóona. 21 Mála Omukáma Múungu yaabakolela ebizwáalo bye eémpu, yaábazwéeka.
22 Omukáma Múungu yaágaamba, “Hakumanya ebizima ne ebíbi, Adáamu yaaba nkéechwe. Mbweenu atáhaabwa omwáanya gwo kutábula no okulya amagoomba go omuti gwo obulami, ataákwiiza akalama ebilo byóona.” 23 Habwéecho, Omukáma Múungu yaábabiinga Adáamu na mukazíwe kuluga omumusili omuli Edeni, yaábatwáala olubazu olúundi lwe éensi, Adáamu abóne kulima itaka éelyo yabuúmbiilwe. 24 Káyaamazile kubabíinga kuluga omumusili, Múungu yaatáyo amakelubi bali bamaléeka olubazu lwo obutúluka bwo musili hamo no lubáadi lulíkwaaka omulilo no kuhiinduka hiinduka embazu zóona, kutaángila omuháanda gwo kuzeenda ahamuti gwo obulami.