Kaíni Na Hábeeli
4
1 Adáamu akalyáama na mukazíwe Eva, nawe yaátwáala eenda, yaazáala omwaana wo obukwaáta, yaamweeta izíina Kaíni. Eva yaágaamba, “Naazaála omwaana wo obukwaáta habuhwéezi bwa Omukáma Múungu.” 2 Yaasúbyaaho entéelo ya kábili, yaazáala Hábeeli ali omulúmuna wa Kaíni. Kábaakúzile, Hábeeli yaaba omutuúnga, na Kaíni yaaba omulimi. 3 Obuchilo kábwaahiíngwiile Kaíni yaaheeleza Omukáma Múungu omuheélezo gwe ebyookulya byo omumusili. 4 Náho Hábeeli nawe yaataambila Múungu echitáambo che enzáalwa za mbele ze entaama zoómwe nzima ne enyama zaázo za masázu. Omukáma Múungu akeekiliza Hábeeli hamo ne echitaambóche. 5 Náho talánuliziibwe na Kaíni hamo no muheélezógwe. Echigaambo éechi chikamúnigahaza bwooli Kaíni, yaánuunza. 6 Omukáma Múungu yaagaambila Kaíni, “Tí kuzima kuhulumuka no kuhinya obuso oótyo! 7 Mazima kólaakola ebizima, nooyikílizibwa! Kólaaba otakozíle bizima, ebiheno nko mubísa nibikutéeba héehi bwooli, nibyeénda kukutégeka, náho íiwe okwiile bwooli obisíinge.”Kaíni Kumwíita Hábeeli
8 Kaíni akamugaambila Hábeeli omulúmuna, “Tuzeénde omuumbúga.” Obuchilo bachili omuumbúga, Kaíni yaámugulukila omulúmuna, yaamutéela, yaámwíita. 9 Omukáma Múungu yaabuuza Kaíni, “Mulúmuna waawe Hábeeli ali nkáhi?”
Kaíni yaámusúbiza ha kubéeha, “Tiínkumanya. Sii! Iinye mba omuleebelezi wa mulúmuna waanze?”
10 Omukáma Múungu yaámugaambila hakumuchaáhukíla, “Wakoláchi! Enságama ya mulúmuna waawe eyowaséesa neendilíla kuluga omwiitaka. 11 Mbweenu íiwe naákucheena. Ahamikóno yaawe watókooza itaka ne enságama ya mulúmuna waawe eyaaseeseka áaho wamwiitíla. 12 Habwéecho, koólaalíma itaka, tililikweéleza kuzima. Kaandi nooba omuuntu wo kutuumaanga tuumaanga otéene obwiikalo bwoóna bwóona omúunsi.” 13 Kaíni yaámulilila Omukáma Múungu, “Echaágalazo éechi ni chiháango múno, tiínkuhicha kucheémela. 14 Leeba, leélo waámbiinga kuluga itaka lyo obunula, no kuza hala no obubáho bwaawe. Óobu, naába omuuntu wo kutuumaanga tuumaanga atéena obwiikalo buhíkile omúunsi, no omuuntu weéna wéena alaambóna naanyíta.” 15 Omukáma Múungu yaámusúbiza aáti, “Mmahi, tí bityo. Omuuntu weéna wéena alaakwíita, nniimweehoólela entulo musaanzu kuchila echaágalazo chaawe.” Mála Omukáma Múungu yaatáho Kaíni oluméenko lwo kumanyisa omuuntu weéna wéena alaamubóna ataákumwiita. 16 Habwéecho, Kaíni yaaba hala no obubáho bwa Omukáma Múungu, yaatuula obutúluka bwa Edeni, omuchaalo echeetwa Nodi, ensoonga, “Kulibata libata.”
Oluzáalo Lwa Kaíni
17 Kaíni akalyáama na mukazíwe, nawe yaátwáala eenda, yaamuzáala Enoka. Obuchilo óobwo Kaíni akaba naayoombeka echikaali, yaacheeta Enoka, ahi izíina lyo mwaanáwe. 18 Enoka káyaakúzile, yaazáala Iráadi, nawe Iráadi yaazáala Mehuyaéeli, Mehuyaéeli yaazáala Metushaeli, Metushaeli yaazáala Laámeki. 19 Laámeki akataasha abakázi bábili, owa mbele iziinálye likaba lili Ada, owa kábili lili Zíila. 20 Ada yaazáala Yabáali, óogwo níwe echitáko cha abatuúnga abatuula omumaheéma. 21 Mweenewáabo Yabáali akaba naayetwa Yubáali, óogwo níwe echitáko cha abazíni na abateezi bóona be enaanga ne emiléela. 22 Zíila yaazáala Tubáali-Kaíni, omuheesi we ebiintu byóona bya masaba ne ebya amasíinza. Munyáanya Tubal-Kaíni akaba naayetwa Náama. 23 Laámeki yaábagaambila bakazíbe, “Ada na Zíila mumpúliilize, bakázi baanze muhuliilíze ebigaambo byaanze. Neeta omuuntu habwo kuúmputaaza, ensoonga omusígazi yaánsaasisa iinye. 24 Kaíni kaáleehoólelwa entulo musaanzu, mazima iinye ne entulo makúmi musaanzu na musaanzu.”
Séeti Na Enosi
25 Adáamu akalyáama kaandi na mukazíwe Eva, baázaala omwaana wo obukwaáta. Eva yaamweeta izíina Séeti,a naáteekuza aáti, “Naahíilwa, Múungu yaampa omwaana wo obukwaáta oóndi ha mwáanya gwa Hábeeli habwo kuba Kaíni akamwíita.” 26 Séeti nawe akazáala omwaana wo obukwaáta, yaamweeta Enosi. Áaho niho obuchilo abaantu baabaandíze kumulámya Omukáma Múungu ahi iziinálye.