Oluzáalo Lwa Adáamu
5
1 Éechi ne echiteékelelo cho oluzáalo lwa Adáamu. Múungu káyaahaangile abaantu, akabahaanga ahaansusóye. 2 Akabahaanga omukwaáta no omukázi, mála yaábafúuha no kubaluka izíina, “Abaantu.”3 Adáamu káyaahikize emyáaka igána límo na makúmi ásatu (130), yaazáala omwaana alikususana náze, yaamweeta iziinálye Séeti. 4 Káyaabeele yaamuzéele Séeti, Adáamu yeekala emyáaka magána munáana (800) no omubuchilo óobwo, yaazáala abaana abáandi abo obukwaáta na abo obuhalákazi. 5 Adáamu káyaahikize emyáaka magána mwéenda na makúmi ásatu (930), yaáfwa.
6 Séeti káyaahikize emyáaka igána límo ne itáanu (105), yaazáala Enosi. 7 Káyaabeele yaamuzéele Enosi, Séeti yeekala emyáaka eéndi magána munáana na musaanzu (807) no omubuchilo óobwo, yaazáala abaana abáandi abo obukwaáta na abo obuhalákazi. 8 Séeti káyaahikize emyáaka magána mwéenda ne ikúmi ne ebili (912), yaáfwa.
9 Enosi káyaahikize emyáaka makúmi mwéenda, yaazáala Kenáani. 10 Enosi yeekala emyáaka magána munáana ne ikúmi ne itáanu (815) ezíindi no omubuchilo óobwo, yaazáala abaana abáandi abo obukwaáta na abo obuhalákazi. 11 Enosi káyaahikize emyáaka magána mwéenda ne itáanu (905), yaáfwa.
12 Kenáani káyaabeele ayine emyáaka makúmi musaanzu, yaazáala Mahalaléeli. 13 Kenáani akeekala emyáaka magána munáana na makúmi aána (840) ezíindi no omubuchilo óobwo, yaazáala abaana abáandi abo obukwaáta na abo obuhalákazi. 14 Kenáani káyaahikize emyáaka magána mwéenda ne ikúmi (910), yaáfwa.
15 Obuchilo Mahalaléeli ayine emyáaka makúmi mukáaga ne itáanu, yaazáala Yaréedi. 16 Káyaazeele Yaréedi, Mahalaléeli yeekala emyáaka magána munáana na makúmi ásatu (830) ezíindi no omubuchilo óobwo, yaazáala abaana abáandi abo obukwaáta na abo obuhalákazi. 17 Mahalaléeli káyaahikize emyáaka magána munáana na makúmi mwéenda ne itáanu (895), yaáfwa.
18 Yaréedi káyaabeele ayine emyáaka igána límo na makúmi mukáaga ne ibili (162), yaazáala Enoka. 19 Yaréedi yeekala emyáaka magána munáana (800) ezíindi no omubuchilo óobwo, yaazáala abaana abáandi abo obukwaáta na abo obuhalákazi. 20 Yaréedi káyaahikize emyáaka magána mwéenda na makúmi mukáaga ne ibili (962), yaáfwa.
21 Obuchilo Enoka káyaabeele ayine emyáaka makúmi mukáaga ne itáanu, yaazáala Metuséela. 22 Enoka yeekala emyáaka magána ásatu (300) ezíindi kunu naasiimbahála no kumweésiga Múungu. Omubuchilo óobwo, yaazáala abaana abáandi abo obukwaáta na abo obuhalákazi. 23 Obulamíbwe bwóona bwa Enoka bukatwáala emyáaka magána ásatu na makúmi mukáaga ne itáanu (365). 24 Enoka akaba naasiimbahála no kumweésiga Múungu, akabuza echilali habwo kuba Múungu akamutwáala.
25 Metuséela káyaabeele ayine emyáaka igána límo na makúmi munáana na musáanzu (187), yaamuzáala Laámeki. 26 Metuséela yeekala emyáaka magána musáanzu na makúmi munáana ne ibili (782) ezíindi no omubuchilo óobwo, yaazáala abaana abáandi abo obukwaáta na abo obuhalákazi. 27 Metuséela káyaahikize emyáaka magána mwéenda na makúmi mukáaga na mwéenda (969), yaáfwa.
28 Laámeki káyaabeele ayine emyáaka igána límo na makúmi munáana ne ibili (182), yaazáala omwaana wo obukwaáta, 29 yaamweeta izíina Núhu, naagaámba, “Óogu níwe alituzuna omumilímo yéetu egumile yo kulima éensi eyaacheénilwe no Omukáma Múungu.” 30 Laámeki akeekala emyáaka magána atáanu na makúmi mwéenda ne itáanu (595) ezíindi no omubuchilo óobwo, yaazáala abaana abáandi abo obukwaáta na abo obuhalákazi. 31 Laámeki káyaahikize emyáaka magána musáanzu na makúmi musáanzu na musáanzu (777), yaáfwa.
32 Núhu káyaabeele yaáhikize emyáaka magána atáanu (500), yaazáala abaana básatu abo obukwaáta bali Shéemu, Háamu, na Yaáféeti.