Obuzilwa Bwa Abaantu
6
1 Abaantu kábaabaandíze kukánya no kusaámbaala omúunsi na abahalákazi kuzáalwa, 2 abatábani ba Múungua baábona abahalákazi áabo ni baluunzi. Habwéecho, baatóoza weéna wéena nkokwo baayeenzíle, bábe bakázi báabo. 3 Áaho Omukáma Múungu yaágaamba aáti, “Omwooyo gwaanze tígukuhicha kweémela abaantu obucha no obuchiile. Áaba ne ebihaángwa ebikwiile kufwa kwoónka. Habwéecho, ebilo byo obulami bwáabo tibíkusáaga emyáaka igána límo na makúmi ábili (120).”4 Obuchilo abatábani ba Múungu baabweene abahalákazi ba abaantu no kuzáala nabo, Abanefilib bakaba baliho ebilo bilinya no kuhicha ebilo ebyaakulaatiilého. Áaba Abanefili bakaba bali emaanzi na bakaba bakumuukile bwooli obuchilo óobwo bwa kala.
5 Omukáma Múungu akabona obuzilwa bwa abaantu omúunsi nkokwo bulíkuguma kwoongéla, no obuchilo bwóona abaantu baaguma kúba ne ebiteékuzo byóona byo obuzilwa. 6 Omukáma Múungu yeéfuuza habwaáchi akahaanga omuuntu omúunsi, no omuganyágwe gwaátámwa bwooli. 7 Habwéecho, Omukáma Múungu yaagaamba aáti, “Niinsiingaálicha olugaanda lwóona lwa abaantu áabo naahaangíle omúunsi óomu, hamo ne ebituungaánwa, enyameéswa, ebihaángwa byóona ebikweesa eenda ne enyonyi zo olugulu, habwo kuba neéfúuza habwaáchi nkabihaanga.” 8 Náho Núhu akaba ayina omugisa gwa Omukáma Múungu.
Múungu Yaalagila Núhu Akole Esafína
9 Éezi nizo empola zo oluzáalo lwa Núhu. Núhu akaba ali owe ntúungwa nzima hamugánya. Akaba ali omuuntu oómo weénka omúunsi obuchilo óobwo atéena entaambala omuméeso ga Múungu. Akaba naamuhulila Múungu no kumweésiga bwooli. 10 Núhu akaba ayina abaana básatu bali Shéemu, Háamu, na Yaáféeti.
11 Mbweenu Múungu akabona nkokwo éensi yaásiisikeele na abaantu bóona baábeele abazílwa na basaámbe. 12 Akaleeba éensi, mazima ekaba eyizwiile obuzilwa bwooli, habwo kuba buli chihaángwa echilikwiicha chikeeháho entuungwa mbi yo kukola obubi bwóona. 13 Habwéecho, yaagaambila Núhu aáti, “Naálamula kusiingaalicha ebihaángwa ebiina obulami byóona omúunsi, habwo kuba kulugiilila obuchilo bwa kala byaasuganísize obubi omúunsi yóona. Mazima naalamula kusiingaalicha abaantu ne ebihaángwa byóona ebiina obulami hamo ne éensi!
14 “Mbweenu oyikolele esafínac kuluga ahamuti nko omuzule, tamo ensiika omuunda, mála ozinyínye no kuzísiiga eláami omuunda na ahéelu. 15 Esafína ozikolo oóti, obula bwaáyo ebíta makúmi mwéenda ne ésatu (emíita igána límo na makúmi ásatu na mukáaga (136)), obugazi bwaáyo ebíta ikúmi na mukáaga (emíita makúmi ábili ne ésatu), ne echeemo chibe ebíta mwéenda (emíita ikúmi ne iína). 16 Esafína éezi eébe ne egolófad isatu ne echisasi chimo chiháango halubazu. Ozoómbekeleho oluswi, mála osigého omwáanya gwo kulabyáaho omwaanga ogulíkwiingana elobo ye echita chimo ahagáti yo olukúta lwe egolófa yo olugulu no oluswi.
17 “Mazima, iinye ndyaásiindika enzula ne enzwéeloe zo kwiikisa éensi yóona. Buli chihaángwa chóona echiina obulami chilyaásiingaalika. 18 Kwoónka iinye niinkola endagano neewe. Íiwe olyaátaaha omuli safína hamo na mukáawe, batábani baawe na bakázi báabo, babone kuchila. 19 Olaátamo omuli safína buli chihaángwa echiina obulami bibili bibili, chimo cho obukwaáta na chimo cho obukázi, bibone kuchila, bitaákusiingaalika. 20 Buli lugaanda lwe enyonyi ibili ibili, buli lugaanda lwe enyameéswa ne ebituungaánwa ibili ibili, na buli lugaanda lwe ebihaángwa byóona ebilibata ahaansi bibili bibili, nibiíza hali íiwe obyeémanye, bitaákusiingaalika. 21 Izúka kutwáala no kubíika buli lugaanda lwe ebyookulya ebihikile bye embága yaawe ne bye ebihaángwa byóona ebili omuli safína.”
22 Núhu yaakola byóona nkokwo Múungu yaamulagíile.