Enzula Ne Enzwéelo Zo Kwiikisa Éensi Yóona
A. Múungu Kulagila Núhu
7
1 Niho Omukáma Múungu kumugaambila Núhu aáti, “Táaha omuli safína,a íiwe na baawe bóona habwo kuba omubaantu bóona obuchilo óobu naabona nkokwo íiwe oyine ntúungwa nzima hamugánya omuméeso gaanze. 2 Twaála ebituungaánwa ne enyameéswa enzima musaanzu musaanzu za buli lubala, enkázi ne eséeza, ezilikugasa kuheélezwa. Kaandi twaála ebituungaánwa ne enyameéswa ibili ibili, enkázi ne eséeza, ezitakugasa kuheélezwa. 3 Kaandi twaála enyonyi enséeza ne enkázi musaanzu musaanzu, engaanda zóona zibóne kubiikwa omúunsi. 4 Kubaandiza leélo kábilaáhwa ebilo musáanzu, niindeéta omúunsi yóona enzula ye ebilo makúmi aána omuchilo na nyémisana, na buli chihaángwa echili lugulu ye éensi éecho naahaangíle niinchisiingaálicha.”B. Núhu Kuhulila Múungu
5 Núhu yaakola ebiintu byóona éebyo nka nikwo Omukáma Múungu yaamulagíile. 6 Enzula ne enzwéelo zo kwiikisa éensi kázaabaandíze, Núhu akaba ayine emyáaka magána mukáaga (600). 7 Núhu, mkazíwe, abaanábe na bakázi báabo baátaaha omuli safína kweéchiinga améenzi ge enzula ne enzwéelo éezo. 8 Ebituungaánwa hamo ne enyameéswa ezilikugasa ne ezitakugasa kuheélezwa, enyonyi, ne ebihaángwa byóona ebyeekweesa ahaansi, 9 byéeza hali Núhu bibili bibili, enséeza ne enkázi, byaataahámo omuli safína nka nikwo Múungu yaamulagíile. 10 Ebilo musáanzu kábyaahwéele améenzi ge enzula ne enzwéelo éezo gaáhicha kuswéeka éensi yóona.
C. Kusiingaalika Kwe Bihaángwa Byóona
11 Núhu káyaabeele ayine emyáaka magána mukáaga (600), echilo cha ikúmi na musaanzu cho kwéezi kwa kábili, echilo éecho niho zikaátika enzwéelo empáango zóona za améenzi agalíkuluga okuzimu ye éensi, ne enzula yaagwa yaágweeleza. 12 Enzula éezo ekagwa omúunsi ebilo makúmi aána omuchilo na nyemisana. 13 Éecho chilo enzula káyaabaandíze kúgwa, Núhu na mukazíwe, abaanábe Shéemu, Háamu, na Yaáféeti, na beengábe bakataahámo omuli safína. 14 Nabo baataahámo na buli lugaanda lwe enyameéswa ne ebituungaánwa, buli lugaanda lwe ebihaángwa ebyaázula, buli lugaanda lwe enyonyi ne bya manana ebituuntumuka. 15 Ebihaángwa byóona ebiina obulami bibili bibili enkázi ne eséeza byeeza hali Núhu no okutáahamo omuli safína. 16 Ebyaataahilémo, bikaba bili enséeza ne enkázi za buli chihaángwa echiina obulami nkokwo Múungu yaamulagíile. Mála Omukáma Múungu yaábachiíngila omuli safína.
17 Enzula ne enzwéelo éezo zikazeendelela ebilo makúmi aána, améenzi gaákonoka omúunsi gaayeleeza éezo esafína halugulu ye éensi. 18 Améenzi gaáguma kukónoka ahalugulu ye éensi ne esafína éezo yaayeleela halugulu. 19 Améenzi kaandi gaáyoongela kukánya múno halugulu ye éensi, gaáhicha kuswéeka amabaanga góona amala go omúunsi. 20 Améenzi gakazeendelela kukánya múno kuhika kuswéeka amabaanga góona amala no kuchiláho ebíta bina nechinogóka (4.5).b 21 Buli chihaángwa echiina obulami omúunsi: enyonyi, ebituungaánwa, enyameéswa, ebihaángwa ebíindi, na abaantu bóona byaásiingaalika. 22 Buli chihaángwa echilikwiicha lugulu ye éensi eyómile chikáfwa. 23 Ensoonga, nikwo Múungu akasiingaalicha buli chihaángwa echiina obulami omúunsi: abaantu, enyameéswa, ebituungaánwa, ebihaángwa ebyaázula ne enyonyi, byóona byaásiingaalika. Núhu weénka na aboómwe ne ebihaángwa byóona éebyo yaabeele ayinábyo omuli safína níbyo byaasígeele. 24 Améenzi áago gakasweeka éensi ebilo igána límo na makúmi atáanu (150).