Kuchéeha Kwa Améenzi Halugulu Ye Éensi
8
1 Niho Múungu kwiizuka Núhu, enyameéswa ne ebituungaánwa byóona ebyaabeele bilimo hamo náze omuli safína.a Yaasiindika omuyaga halugulu ye éensi na améenzi gaábaanza kwoómeela. 2 Enzwéelo empáango za améenzi agalíkuluga okuzimu ye éensi ne enyiizi za améenzi go omwiigulu zaaba zaálekela ne enzula yaácha. 3 Améenzi gaázeendelela kwoómeela mpóla mpola omúunsi, na kábyaahiíngwiile ebilo igána límo na makúmi atáanu (150) améenzi gaaba gaayómeela bwooli. 4 Obuchilo óobwo, echilo che ikúmi na musaanzu, okwéezi kwa musaanzu, esafína yaágoba halugulu ya mabaanga ga Ararati. 5 Améenzi gaázeendelela kwoómeela mpóla mpola, ne echilo cha mbele cho okwéezi kwe ikúmi, emitwe ya mabaanga yaáloleenkána.Núhu Kusiindika Ikolokóozi Ne Echiiba
6 Kábyaahiíngwiile ebilo makúmi aána ebíindi Núhu yaachiingula endoleelo éezo yaakozile omwo omuli safína, 7 yaasohoza ahéelu ikolokóozi nalyo tililásubile omusafína, kwoónka lyaátuuntumuka óokwo no óokwo kuhika améenzi áaho gaáyomiile omúunsi. 8 Kaandi yaasohoza ahéelu echiiba kuleeba améenzi kágalaaba gaáyomiile. 9 Náho echiiba tichilábweene ahokweémeelela habwo kuba améenzi gakaba gachísweekeliiléensi yóona. Áaho echiiba chísuba hali Núhu omuli safína. Núhu yaagolola omukóno yaakwaata echiiba éecho yaachitaasha omuli safína. 10 Núhu yaategamilila ebilo musáanzu ebíindi, mála yaasohoza kaandi éecho chiiba ahéelu ye esafína. 11 Kwoónka éecho chiiba káchaasubile hali Núhu halweébazo, yaáchibona chiine ibabi libísi lyo omuzeyituni omukanwa kaácho. Áaho Núhu yaamanya nkokwo améenzi gaácheéhile omúunsi. 12 Yaategamilila ebilo musáanzu ebíindi, kaandi yaasiindika éecho chiiba, náho echilo éecho echiiba tichilásubile hali Núhu.
Kusohola Kwa Núhu Omuli Safína
13 Ihélezo lye byo, Núhu káyaahikize emyáaka magána mukáaga ne eémo (601), hachilo cho kubaanza cho kwéezi kwa mbele,b améenzi gakaba gaáyomiile omúunsi. Núhu yaachiingula endoleelo ye esafína, yaabona nkokwo éensi ekaba yaáyomile. 14 Echilo cha makúmi ábili na musáanzu cho okwéezi kwa kábili,c éensi ekaba yaáyomiile bwooli.
15 Niho Múungu kumugaambila Núhu aáti, 16 “Lugámo omuli safína, íiwe hamo na mukáawe, abaana baawe na bakázi báabo. 17 Kaandi sohoza ebihaángwa byóona ebiina obulami éebyo ebili hamo neewe: enyonyi, ebituungaánwa ne enyameéswa, ne ebihaángwa byóona ebilibata ahaansi, bibone kuzáala no kuzaálilána omúunsi.” 18 Habwéecho, Núhu yaasoholámo omuli safína hamo na mkazíwe, abaanábe na bakázi báabo. 19 Ebituungaánwa ne enyameéswa zóona, ebihaángwa byóona ebilikulibata ahaansi ne enyonyi zóona zaasoholámo omuli safína, nibikulaatilána chimo chimo, buli chihaángwa no olugaanda lwaácho.
Núhu Kuheéleza Múungu Echitáambo
20 Núhu yaayoombekéla Omukáma Múungu itaámbilo lya amabáale. Yaásoloola kuluga buli lugaanda lwe ebituungaánwa, enyameéswa ne enyonyi ezilikugasa kuheélezwa, yaamutáambila Múungu ebitáambo byo kusiingaalicha hamulilo halugulu yi itaámbilo éelyo. 21 Omukáma Múungu akeekiliza echitáambo cha Núhu no kusemelelwa no omulaango gwaácho, yaágaamba omumuganyágwe no kulamula aáti:
Tiíndícheena kaandi éensi habwa baantu, nóobwo biteékuzo ne ebikolwa byáabo biba byoolekiile obuzilwa kuluga ahabuto bwáabo. Mazima tiíndisiingaalicha kaandi ebihaángwa byóona ebiina obulami nkokwo naakozile.
22 Obuchilo bwóona éensi echaázeendelela kubaho,
kubyáala
no omwéezo,
embého ne echitagato,
echaanda ni itúumba,
echilo na nyémisana, byóona tibilihwaaho.